1 Shaka ashi Hezekia kalwaliti pakwegera na kuhowa. Mbuyi gwa Mlungu Isaya, mwana gwa Amozi kamgenderiti na kumgambira, "Hangu ndo ntambu yakalonga Mtuwa Mlungu, gutuli weri mirandu ya munumba yaku toziya haguhowi, hapeni guponi."

2 Hezekia kagalambukira kushibambaza na kumluwa Mtuwa Mlungu pakalonga, 3 "Gwee Mtuwa Mlungu, nikuluwa guholi ntambu yanikutendiriti kwa waminika na kwa moyu gwangu goseri na kutenda yagawera teratera kulongolu kwaku." Hezekia kalira kwa utama nentu.

4 Kumbiti Isaya pamberi hakenipiti ligeleri lya pakati, Mtuwa Mlungu kamgambira, 5 "Guwuyi gwakamgambiri Hezekia, mkulu gwa wantu wa Mtuwa Mlungu. Neni Mtuwa Mlungu, Mlungu gwa tati gwaku Dawudi, mpikanira kuluwa kwaku na mona masozi gaku. Hangu hanikuponiziyi na pa mashaka matatu hagugendi Munumba ya Mtuwa Mlungu. 6 Hanikongeleli vinja kumi na tano vya kulikala. Hanikulopoli gwenga na mji agu mumakakala ga mfalumi gwa Ashuru. Haniluloleli lushi alu toziya ya ligoya lyaneni na toziya ya shii shantakuliti kwa ntumintumi gwangu Dawudi."

7 Shakapanu Isaya kalonga, "Mnyawi mgota gwa kumatika gwagulawirana na tini mlituli kulipu lyakuyi, su kaponi." 8 Hezekia kamkosiya Isaya, "Ndo lilangaliru gaa halinanguziyi handa nakaka Mtuwa Mlungu hakamponiziyi na mulishaka lya tatu hambezi kugenda mu Hekalu?"

9 Isaya kamwankula, "Ali haliweri lilangaliru kwagwenga kulawa kwa Mtuwa Mlungu, handa Mtuwa Mlungu hakatendi ntambu yakalongiti. Hashi, lisisi lya kulikweneru ligendi maleka lirongu kulongolu ama liwuyi kumbeli maleka lilongu?"

10 Hezekia kamwankula, "Iwezekana lisisi kugenda kulongolu maleka lirongu! Kuliku kuwuya maleka lirongu."

11 Isaya kamluwa Mtuwa Mlungu na yomberi Mtuwa Mlungu kalitenda lisisi maleka lirongu kulukwenelu lyalunyawitwi na Ahazi.

12 Shaka ashi, mfalumi Merodaki Baladani, mwana gwa Baladani mfalumi gwa Babeli kapikaniriti handa Hezekia kaweriti kalwala na vinu kapona, kamjegera ulagilagi pamuhera na lifupu. 13 Su, Hezekia kawankiti na kuwalanguziya lunda yakuyi. Numba yakuyi ya luhanja, madini ga feza na zahabu na utuli na viwungu vya kulekera mushiboga, lipaki lya beyi nkulu na numba ya vintu vyakuyi vyoseri vya shishonta na vintu vyoseri vyaviweriti muhanja zakuyi. Shiweritindiri shoseri muliboma lyakuyi, ama isi yakuyi sheni kawalanguziyandiri. 14 Shakapanu mbuyi gwa Mlungu Isaya pakamgendiriti mfalumi Hezekia na kumkosiya, "Wantu awa watakula shishi? Wiza kulawa koshi?" Na yomberi Hezekia kamwankula, "Wanizira kulawa isi ya kutali aku Babeli."

15 Shakapanu kamkosiya, "Waona shishi muliboma lyaku?"

Hezekia kamwankula, "Waona vyoseri vyaviweriti muliboma lyangu. Kwahera shintu shoseri muhanja zyangu zyeni niwalanguziyitindiri."

16 Shakapanu Isaya kamgambira Hezekia, "Gupikaniri shisoweru sha Mtuwa Mlungu. 17 Guloli, shaka shakwiza peni vyoseri yaviwera munumba mwaku na vintu vyoseri vyawajojoniriti wambuyi waku mpaka shaka ashi, havijegwi mpaka Babeli. Kwahera shintu shoseri hashisigali, hangu ndo ntambu yakalonga Mtuwa Mlungu. 18 Kayi wana waku wapalu hawalopolwi na womberi hawatendwi wasaulwa na kuwera wantumintumi muliboma lya mfalumi gwa Babeli."

19 Hezekia kamgambira Isaya, "Shisoweru sha Mtuwa Mlungu ntambu yagulongiti ndo teratera, hashi nayiwera hangu, mfalumi kalongiti hangu toziya kaliholiti hakuweri na ponga na ulolera mumashaka ga ukolamlima waneni"

20 Mirandu yimonga ya Mfalumi Hezekia, ugangamala wakuyi na matakulu kuusu ntambu yakanyawiti litanda na kubawa shishemba sha kujega mashi kumjini, galembwa mu Shitabu sha Mahola ga Wafalumi wa Yuda. 21 Hezekia kahowiti na mwana gwakuyi Manasi kakolamlima pahala pakuyi.