1 Mushinja sha tatu sha ukolamlima wa Hoshea mwana gwa Ela, pakawera mfalumi gwa Israeli, Hezekia mwana gwa Ahazi mfalumi gwa Yuda kanjiti kukolamlima. 2 Hezekia kaweriti na vinja ishilini na mhanu kanjiti kukolamlima. Kakolitimlima vinja ishilini na tisa aku Yerusalemu. Mawu gwakuyi kaweriti Abiya, mhinga gwa Zakalia. 3 Hezekia katenditi maheri palongolu pa Mtuwa Mlungu, ntambu yakatenditi Dawudi mbuyi gwakuyi. 4 Kapawusiya pahala poseri pa kuguwira wamlungu wa mpayu na kuzipantanga mpanda za mabuyi za kutambikira na za mlungu Ashera. Viraa, kampantaga njoka gwa shaba mweni Musa kamnyawiti na kumshema Nehushitani. Mpaka shaka ashi, wantu wa Israeli waweriti wankushitambikira. 5 Hezekia Kamtumbiriti Mtuwa Mlungu, Mlungu gwa Israeli, kwahera yakaweriti handa yomberi pakati pa wafalumi wa Yuda yawafatiti ama yawamlongoleriti. 6 Yomberi kamgalambukandiri Mtuwa Mlungu pota kalekandiri kumfata, su kazikola lagiru za Mtuwa Mlungu zyakawapananiti wantu wa Israeli kupitira Musa. 7 Su Mtuwa Mlungu kaweriti pamuhera na yomberi na kamtenditi kila shakatenditi. Na mfalumi kamtenda kamgalambukira mfalumi gwa Ashuru na kulema kumtendera. 8 Kawakomangiti Wafilisiti mpaka lushi lwa Gaza na isi yayizyengetitwi, kwanjira shindwaringu sha walolera mpaka mji gwana liboma.

9 Mushinja sha msheshi sha ufalumi wa Hezekia, sheni viraa shiweriti shinja sha saba sha ufalumi wa Hoshea mwana gwa Ela mfalumi gwa Israeli, Shalimanesa mfalumi gwa Ashuru kagukomangiti mji gwa Samaria na kuguzyengeta kwa mashonta. 10 Mushinja sha tatu Waashuru wawakankiti wantu kulawa Samalia. Iweriti mushinja sha sita wa ufalumi wa Hezekia na viraa shinja sha tisa sha ufalumi wa Hoshea mfalumi gwa Israeli, Samalia ilopolitwi. 11 Mfalumi gwa Ashuru kawatoliti lopola wantu wa Israeli mpaka Ashuru na kuwatula wamonga wawu mumji gwa Hala wamonga mumji gwa Habori wamonga kumji gwa Gozani, viraa na wamonga kumji gwa Media.

12 Aga galawira toziya Waisraeli wajimirandiri liziwu lya Mtuwa Mlungu, Mlungu gwawu, kumbiti walemiti lipatanu lyakuyi, ata wapikanirandiri pota kujimira goseri Musa ntumintumi gwa Mtuwa Mlungu, ntambu yakawagambiriti.

13 Mushinja sha kumi na nne sha ufalumi wa Ezekia, mfalumi Senakeribu gwa Ashuru kayikomangiti miji yoseri yana maboma ga Yuda na kuyilopola. 14 Ezekia kalagaliriti ulagilagi kwa mfalumi Senakeribu yakawera aku Lakishi na mfalumi Ezekia kamgambira, "Ndenda likosa, shondi, gumaliri makomangu gaku kwaneni, naneni handipi shoseri shagufira." Mfalumi gwa Ashuru kamlagalira Hezekia kamjegeri tani lirongu za mpiya na tani yimu za zahabu. 15 Hezekia kamjegera feza zoseri zyaziweriti mu Hekalu na muhanja za numba ya mfalumi. 16 Ntambu iraa, kabandula zahabu kulawa mumigomi ya Hekalu na zahabu yeni mweni kayituliti mumpanda ya migomi yoseri kamjegera Senakeribu. 17 Mfalumi gwa Ashuru kalagalira lishonta likulu palilongoziwa na wakulu wa mashonta watatu kulawa Lakishi kugenda kwa mfalumi Hezekia aku Yerusalemu. Wasoka Yerusalemu na kugoloka pakwegera na lushemba lwa lwaluweriti uwega wa pampindi munjira nkulu yayigenda lulalanda lwa Waputa nguwu. 18 Shakapanu wamshema mfalumi Hezekia kawankitwi na Eliakimu mwana gwa Hilikia, ndo yakaweriti mgolokera gwa liboma na Shebina, yakaweriti mlemba na Yoa mwana gwa Asafu, mlemba gwa maholu ga mfalumi. 19 Mkulu gwa mashonta wa Ashuru kawagambira, "Mmugambiri Hezekia, hangu ndo ntambu yakalonga mfalumi mkulu, mfalumi gwa Ashuru, mmukosiyi Hezekia shakalitumbira shishi? 20 Hashi, gulihola kuwera visoweru hera ndo viweza kukanka kunkondu? Gumtumbira gaa mpaka gung'alambuka? 21 Vinu guloli, gulitumbira Misri kukutanga, ndo handa kulutumbira luteti kuwela luhonga lya kutyangira halumegeki na kukutenda muliwoku. Hangu ndo ntambu ya kumtumbira Falawu mfalumi gwa Misri ntambu yakawera kwa woseri walii yawamtumbira."

22 "Kendereya kulonga handa pamung'ambira, twankumtumbira Mtuwa Mlungu, Mlungu gwetu, Muvimani handa Hezekia ulaayu mweni kapahalibisiya pahala pampindi na shitalawanda sha Mlungu na kuwagambira wantu wa Yuda na wantu wa Yerusalemu waguwiri hera palongolu pashitalawanda shashiwera mu Yerusalemu? 23 Vinu mwizi, mtendi majimiranu na mtuwa gwangu mfalumi gwa Ashuru, neni haniwapanani farasi elufi mbili handa pamuweza kupata wakwena farasi. 24 Gwenga na lishonta laku didini haguwezi hashi kulewelera yumu gwa mkulu gwa lishonta lididini na lyahera makakala la mtuwa gwangu, tembera gutumbira Misri kwa mbutuka za nkondu na wakwena farasi?" 25 Nentu ya aga, hashi, mlihola niza pota amuli ya Mtuwa Mlungu su kuyikomanga na kuyihalibisiya isi ayi? Mtuwa Mlungu ndo yakang'ambiriti, "Guyikomangi isi ayi na kuyihalibisiya."

26 Su, Eliakimu mwana wa Hilikia na Shebina na Yoa wamgambira mkuulu gwa lishonta ayu, "Shondi, gutakuli natwenga kwa Shiaramu, toziya tuyimana, nagutakula na twenga kwa Shiebrania, toziya wantu yawawera mshibambaza wankupikanira."

27 Kumbiti mkulu gwa mashonta kawagambira, "Hashi, mtuwa gwangu kandagalira kulaviya ulagilagi awu kwa mtuwa gwenu na kwa mwenga hera? Hashi, kantumandiri viraa kwa wantu yawalikala mshibambaza sheni watozwa pamuhera na mwenga haniwatimbi mpaka vyamunumba vilawi."

28 Shakapanu mkulu gwa lishonta ayu kagoloka, kabota na kulonga kwa luga ya Shiebrania, "Mpikiniri visoweru vya mfalumi mkulu, mfalumi gwa Ashuru vyakawagambira! 29 Hangu ndo ntambu yakalonga mfalumi, namjimira Hezekia kawapayiri, toziya hapeni kawezi kuwalopola. 30 Namjimira kuzyangwa su mumtumbiri Mtuwa Mlungu, pakalonga, Mtuwa Mlungu hakatulopoli na mji agu hapeni gutulwi mumawoku mwa mfalumi gwa Ashuru. 31 Nammupikinira Hezekia, ira mumpikaniri mfalumi gwa Ashuru yakalonga, mjimiri kukolwamlima yomberi, su hakawalekeziyi mwenga muwezi kuliya mabwajubwaju ga mazabibu gakuyi mweni na mabwajubwaju ga mtera gwakuyi mweni na kulanda mashi ga linegu lyakuyi mweni, 32 mpaka panizaku na kuwajegera kutali muisi handa ayi ya mwenga, isi yeni yana viboga na divai na isi yana malambu ga nganu yagalaviya mabumunda na isi yana mizeituni na lwashi, su mpati kulikala, namwiza kuhowa. Nammupikanira Hezekia pakawatanda pakalonga, Mtuwa Mlungu hakatulopoli. 33 Hashi, kwana yoseri pakati pa wamlungu wa wantu yakalopoliti isi yakuyi kulawa mumawoku mwa mfalumi gwa Ashuru? 34 Hashi, wakoshi wamlungu wa Hamati na Aripadi. Wakoshi wamlungu wa Sefarivaimu, Hena na Iva? Hashi, ilopola Samalia mumawoku mwaneni? 35 Ndo wamlungu gaa muwamu mwa isi azi yakalopoliti isi zawu kulawa kwaneni? Ntambu gaa Mtuwa Mlungu kaweza kugulopola mji gwa Yerusalemu kulawa kwaneni?"

36 Kumbiti wantu woseri wanyamaliti jii, pota kumwankula shisoweru, ntambu yakagambiritwi na mfalumi Hezekia, pakalonga, "Namumwankula." 37 Shakapanu Eliakimu mwana wa Elikia, Shebina mlemba na Yoa mwana gwa Asafu, mlemba, wamgendera Hezekia aku nguwu zawu paziweri zidegekanga, wamgambira visoweru vya mkulu gwa mashonta ulii.