1 Mushinja sha ishilini na saba sha ukolamlima wa Yeroboamu gwa pili mfalumi gwa Israeli, Uzia mwana gwa Amazia kanjiti kukolamlima aku Yuda. 2 Kaweriti na vinja kumi na sita pakanjiti kukolamlima. Kakolitimlima kwa vinja amusini na mbili aku Yerusalemu. Mawu kashemitwi Yekolia kulawa Yerusalemu. 3 Katenditi maheri palongolu pa Mtuwa Mlungu teratera na goseri gakatenditi Amazia tati gwakuyi. 4 Ata hangu pahala pakuguwira kulugongu pahalibisiwitwindiri na wantu wendiriyiti kutambikira na kutumiziya ubani aku. 5 Mtuwa Mlungu kamkoma kwa ulweri wa ungumbula mpaka pakahowiti. Kalikaliti munumba yagweka yakuyi na Yotamu mwana gwa mfalumi kawera mgolokera gwa Numba ya shifalumi na kukolamlima wantu wa isi.

6 Mirandu imonga yoseri ya Uzia ilembwa mu Shitabu sha Maholu ga Wafalumi wa Yuda. 7 Uzia kahowiti na kufindirwa mumasembi ga wafalumi kumji gwa Dawudi na mwana gwakuyi Yotamu kakolitimlima pahala pakuyi.

8 Mushinja sha selasini nanani sha ukolamlima wa Uzia mfalumi gwa Yuda, Zekaria mwana gwa Yeroboamu kanjiti kukolamlima Israeli pakawera ku Samalia, kakolitimlima kwa shaka sha miyezi sita. 9 Na yomberi, handa walongolera wakuyi, katenditi makontola palongolu pa Mtuwa Mlungu. Kafatiti mfanu mdoda gwa mfalumi Yeroboamu mwana gwa Nebati, mweni kawatenda wana wa Israeli watenda vidoda. 10 Shalumu mwana gwa Yabeshi katenditi majimiranu ga bada ga kumlaga mfalumi Zekariya, kamkomanga palongolu pa wantu na kumlaga, shakapanu kakolamlima pahala pakuyi.

11 Mirandu imonga yoseri ya Zekaria ilembwa mu Shitabu sha Maholu ga Wafalumi wa Israeli.

12 Hangu shisoweru sha Mtuwa Mlungu shakamgambiriti mfalumi Yehu shitendeka, pakalonga, "Wiwuka waku hawukolimlima Israeli mpaka viyiwuku vya msheshi."

13 Mushinja sha selasini na tisa sha ukolamlima wa mfalumi Uzia gwa Yuda, Shalumu mwana gwa Yabeshi kanjiti kukolamlima Israeli, kakolitimlima pakawera aku Samalia kwa shaka sha mwezi gumu.

14 Manehemu mwana gwa Gadi kawukiti Tiriza kugenda Samaria na aku kamlaga Shalumu mwana gwa Yabeshi, shakapanu kakolamlima pahala pakuyi. 15 Mirandu imonga yoseri ya Shalumu na majimiranu gakuyi ga bada goseri gakatenditi, galembwa mu Shitabu sha Maholu ga Wafalumi wa Israeli. 16 Menahemu pakaweriti mnjira kulawa Tiriza, kagubomola mji gwa Tapua na kuwalaga wenikaya wakuyi pamuhera na isi yoseri yakaizyengekiti, toziya walemiti kukolwamlima na yomberi. Su kawatumbuliti wadala wana zinda woseri.

17 Mushinja sha selasini na tisa sha ukolamlima wa mfalumi Uzia gwa Yuda, Menahemu mwana gwa Gadi kanjiti kukolamlima Israeli, kakolitimlima pakawera aku Samalia kwa vinja lilongu. 18 Yeroboamu katenditi makontola kulongolu kwa Mtuwa Mlungu mashaka goseri ga ukolamlima kalekandiri makontola ga Yeroboamu mwana gwa Nebati, mweni kawatenditi wantu wa Israeli watenda vidoda. 19 Shakapanu, Puli mfalumi gwa Ashuru, kayikankala Israeli na Menahemu kampanana kilu selasini na msheshi za feza su kamtangi kugangamaziya ukolamlima muisi ya Israeli. 20 Menahemu kapatiti mpiya azi kwa kukakaniziya walunda wa Israeli kulaviya mshangu gwa vipandi amusini vya feza kila yumu. Shakapanu Puli kalikalandiri Israeli su kawuyiti muisi yakuyi.

21 Matendu gamonga goseri ga Menahemu galembwa mu Shitabu sha Maholu ga Wafalumi wa Israeli. 22 Menahemu kahowiti na mwana gwakuyi Pekahia kakolitimlima pahala pakuyi.

23 Mushinja sha amusini sha ukolamlima wa mfalumi Uzia gwa Yuda, Pekahia mwana gwa Menahemu kanjiti kukolamlima Israeli, kakolitimlima pakawera aku Samalia kwa shaka sha vinja viwili. 24 Katenditi makontola kulongolu kwa Mtuwa Mlungu na kufata mfanu mdoda gwa mfalumi Yeroboamu mwana gwa Nebati, mweni kawatenditi wantu wa Israeli watendi vidoda. 25 Peka mwana gwa Remalia, ndo kaweriti mkulu gwa lishonta lya Pekahia, pawaweriti pamuhera na wantu wamonga amusini kulawa Gileadi, kamlaga Pekahia muliboma lya mngati mwa liboma lya mfalumi pakawera aku Samalia na kawera mfalumi pahala pakuyi.

26 Matendu gamonga ga Pekahia na goseri gakatenditi galembwa mu Shitabu sha Maholu ga wafalumi wa Israeli.

27 Mshinja sha amusini na mbili sha ukolamlima wa mfalumi Uzia gwa Yuda, Peka mwana gwa Remalia kanjiti kukolamlima pakawera aku Samalia, kakolitimlima kwa shaka sha vinja ishilini. 28 Katendi makontola palongolu pa Mtuwa Mlungu kwa kufata mfanu mdoda gwa mfalumi Yeruboamu mwana gwa Nebati, yakawatenditi wantu wa Israeli watendi vidoda.

29 Shaka sha ukolamlima wa Peka mfalumi gwa Israeli, Tigalati Pileseri mfalumi gwa Ashuru, kayitoliti miji ya Iyoni na Abeli Betimaaka na Yanoa na Kadeshi na Hozari, pamuhera na isi za Gileadi na Galilaya na Nafutali na kuwatola lopola wenikaya wawu.

30 Mshinja sha ishilini sha ukolamlima wa Yotamu mwana gwa Uzia mfalumi gwa Yuda, Hoshea mwana gwa Ela kamgalambukiti Peka, mwana gwa Remalia na kumlaga, shakapanu kakolamlima pahala pakuyi. 31 Mirandu imonga ya Peka na goseri gakatenditi galembwa mu Shitabu sha Maholu ga Wafalumi wa Israeli.

32 Mshinja sha pili sha ukolamlima wa Peka mwana gwa Remalia aku Israeli, Yotamu mwana gwa Uzia mfalumi gwa Yuda kanjiti kukolamlima Yuda. 33 Kaweriti na vinja ishilini na mhanu pakanjiti kukolamlima. Kakolitimlima aku Yerusalemu kwa shaka sha vinja kumi na sita. Mawu gwakuyi kashemitwi Yerusha, mhinga gwa Sadoki. 34 Handa Uzia tati gwakuyi, Yotamu katenditi mirandu yayimfiriziyiti Mtuwa Mlungu. 35 Ata hangu, pahala pa kuguwira wamlungu wampayu pahalibisiwitindiri na wantu waendireyiti kulaviya tambiku na kutumiziya ubani pahala pampindi. Yotamu kanyawa ligomi lya kushana lya Hekalu.

36 Mirandu imonga ya Yotamu na goseri gakatenditi galembwa mu Shitabu sha Maholu ga Wafalumi wa Yuda. 37 Shaka sha ukolamlima wa Yotamu, Mtuwa Mlungu kanjiti kumtuma mfalumi Resini gwa Aramu na mfalumi Peka gwa Israeli su kuyikomanga Yuda. 38 Yotamu kahowiti na kufindirwa mumasembi ga shifalumi mumji gwa Dawudi na mwana gwakuyi Ahazi kakolitimlima pahala pakuyi.