1 Katepu Atalia mawu gwakuyi mfalumi Ahazia, pakawoniti kuwera mwana gwakuyi kalagwa kalagaliliti, kaya yoseri ya shifalumi ilagwi. 2 Kumbiti Yehosheba mhinga gwa mfalumi Yehoramu, dada gwakuyi Ahazia, kamtoliti kwa bada Yoashi mwana gwa Ahazia, kulawa muwamu mwa wana wa mfalumi yawaweriti pakwegera kulagwa. Kamfifiti yomberi pamuhera na yaya gwakuyi mushumba sha kugonja. Hangu wamfifiti su Atalia kamwonindiri na kumlaga. 3 Yehosheba kamfifiti Yoashi kwavinja sita shaka ashi kaweriti kafifwa mngati mwa mu Hekalu, shaka Atalia pakaweriti kakolamlima isi.

4 Kumbiti mushinja sha saba mtambika Yehoyada kalagaliriti ulagilagi na kuwajojonira wakulu wa mashonta na walolela wa shifalumi na walolela, kawagambira wamwiziri mu Hekalu na yomberi katenda nawa mapatanu na kuwalapisiya waweri waminika mu Hekalu amu. Shakapanu kawalanguzia Yoashi mwana gwa mfalumi Ahazia. 5 Viraavirii kalonga. "Hamtendi hangu, mwenga yamuwera muvipinga vitatu pamsoka kutenda lihengu Mulishaka lya kwoyera, shipinga shimu hashiloleli numba ya mfalumi, 6 shipinga shimonga hashiloleli ligomi lya Suri na yashisigaliti hashiloleli kuligomi pamberi pa walolera. Hangu ndo ntambu yanamloleri, su liboma lya mfalumi nayimegwa. 7 Vipinga viwili vyeni vimalira ulolera wawu lishaka lya kwoyera vikoli lolera mu Hekalu kumlolera mfalumi. 8 Mumloleri mfalumi Yoashi, kila muntu na vintu vya kulikomangila vyakuyi muliwoku na muntu yoseri yakafira kuwasegelera kalaguwi. Mpaka mlikali na mfalumi, kaweri kankulawa ama kankulikala."

9 Wakulu wa mashonta wajimiriti lagila zoseri zyakalaviyiti mtambika Yehoyada. Kila mkulu gwa lishonta kawatola wantu wakuyi woseri, walii yawaweriti wamalira lolera na walii yawaweriti wakwingira lishaka lya Kwoyera, su wamgendera mtambika Yehoyada. 10 Shakapanu kawapanana wakulu wa mashonta migoha na nsegeyu zyaziweriti zya mfalumi Daudi na zyeni ziweriti mnumba ya Mtuwa Mlungu, 11 na walolela wagolokiriti kwanjira uwega wa kusika wa Hekalu mpaka uwega wa kushana wa Hekalu na kuzyengeta shitalawanda sha Hekalu su kumzyengeta mfalumi, kila muntu kaweriti kakola vikomangira mumawoku mwakuyi. 12 Shakapanu kamlaviya kunja mwana gwa mfalumi na kumpanana malagaliru ga shifalumi, kamvalizia lijenjeri mumtuwi na kumbwera kuwera mfalumi, wamlumika na kummiminira lipaki, wakoma vipopu na kulonga, "Kalikali mfalumi!"

13 Atalia pakapikaniriti liziwu lya walolela pamuhera na wantu wamonga, kawagendiriti wantu awa yawaweriti mu Hekalu. 14 Pakasunguliriti kamwona mfalumi gwasyayi kagoloka pakwegera na mpanda kuligomi lya Hekalu gambira ntambu yawu, aku wakulu wa mashonta wagomba magoli pawawera pambwega pa mfalumi na wenikaya woseri pawanemelera na kugomba magoli, ndo kapapuliti nguwu yakuyi na kubota, "Tugalambukwa! Tugalambukwa!"

15 Shakapanu mtambika Yehoyada kawagambira wakulu wa mashonta pakalonga, "Mumlaviyi kunja pakati pa lishonta, na kalagwi muntu yoseri yakafirakumfata." Toziya mtambika kalongiti, "Nakalagwa mu Hekalu." 16 Su, wambata, wamjega na kumpitizia Kuligomi lya Farasi kugenda kuliboma na yomberi kalaguwa aku.

17 Shakapanu Yehoyada katenda lipatanu pakati pa Mtuwa Mlungu na Mfalumi na wantu, handa hawaweli wantu wa Mtuwa Mlungu. Ntambu iraayi katenditi lipatanu pakati pa mfalumi na wantu. 18 Shakapanu wenikaya woseri wagenda kulihekalu lya Baali na kuyibomola, wameganga shitalawanda pamuhera na vinyagu vyakuyi, ata wamlaga Matani mtambika gwa Baali palongolu pa shitalawanda.

Mtambika Yehoyada katula walolela waloleli kuhekalu 19 Kawatoliti wakulu wa mashonta, walolera wakuyi mfalumi na walolera wa liboma na wenikaya woseri na womberi wagenda pamuhera na mfalumi kulawa Mulihekalu pawapitira muligomi lya walolela mpaka kuliboma nayomberi kakolitimlima. 20 Hangu, wenikaya woseri wamemitwi nemeleru na mji goseri guweriti na ponga, pa Atalia kulaguwa kwa ligumba muliboma.

21 Yoashi kanjiti kukolamlima Yuda pakawera na vinja saba.