1 Elisha kamwankula, "Gupikaniri shisoweru sha Mtuwa Mlungu, shirawu shaka handa ashi, muligomi lya Samalia kilu ntatu za ubumu uherepa hauweri ligwala shekeli yimu ya mpiya na kilo sita za shayili ntambu iraa haziweli feza shekeli yimu."

2 Mkulu gwa mashonta yakatumbirwa na mfalumi kamgambira Elisha, "Handa Mtuwa Mlungu mweni mekatendi madilisha kumpindi, hashi, mlandu agu haguwezikani!" Elisha kamwankula,

"Haguwoni kwa masu gaku gamweni, kumbiti gwenga haguliyindiri."

3 Kuweriti na wantu wamsheshi wana ungumbula yawaweriti kunja kuligomi lya mji gwa Samalia weni walitakuziya, wenigweka, "Hatulikali panu mpakandii, patuhowa njala? 4 Kwahera mana ya kwingira kumji toziya aku hatuhowi. Hangu su tugendi kulugonjeru lwa Waaramu, pamonga hawatulagi ama kutuleka." 5 Hangu, luwindu palwanjiti kwingira, wagenda kulugonjeru lya Waaramu, pawasokiti aku, kumbi paweritindiri na muntu. 6 "Toziya Mtuwa Mlungu kalitenditi lishonta lya Waaramu lipikaniri liziwu handa lya lishonta likulu lyaliweriti na mbutuka na farasi. Waaramu walisheriti kuwera mfalumi gwa Israeli kawashema na kuwalipa mashonta ga Wahiti na Wamisri kwiza kuwakomanga." 7 Su, pashiru panu, Waaramu watugiti woseri su kugalopola makaliru gawu pawaleka malingu gawu, farasi na punda wawu na ata ng'onjeru zawu ntambu yaziweriti.

8 Wangumbula walii wamsheshi pawasokiti pambwega pa ngonjeru, wingiriti mngati mwa liringu limu, waliya na kulanda vintu vyawavipatiti amu, watola mpiya, zahabu na nguwu, wagenda kufifa. Wingira muliringu limonga na kutenda ntambu iraayi. 9 Kumbiti waligambirana, "Shatutenda ndo teraterandiri! Ashi ndo shisoweru shiwagira shatuweriti nashi leru na payiwera hatuweli mpaka mandawira, shondi hatukomangwi. Tugendeni kalongola twakawagambiri wantu wa numba ya mfalumi!" 10 Hangu, wawuka mulugonjeru lya Waaramu na kuwashema walolera ligomi lya mji na kuwagambira. "Tugenditi mulugonjeru lwa Waaramu na tuwezitindiri kuwawona muntu pota kumpikanira yoseri. Farasi na punda wankali wankutawalilwa na malingu ga ntambu yawalekiti."

11 Walolera migomi wavibwera visoweru avi mpaka visoka ukaya kwa mfalumi. 12 Tembera Iweriti kwankali luwindu, mfalumi kimuka na kuwagambira walonguziya wakuyi, "Neni nivimana mgomiziwu gwa Waaramu! Wavimana twana njala kumji, vinu waleka ng'onjeru zawu wagenda kulififa su patugenda kusakula shiboga, watubati twawoseri wakomu na kugulopola mji."

13 Yumu pakati pa walonguziya wakuyi kalonga, "Wantu wavuwa watenduwa handa walii yawahowiti kala. Shondi guwalagaliri wantu wadidini na farasi mhanu wa walii yawasigaliti su wagendi kulola shilawira shishi." 14 Wasyagula wantu na kuwapanana mbutuka mbili. Mfalumi kawalagalira wagendi kulola shashiwalawiriti Waaramu pakalonga, "Mgendi mwakaloli." 15 Wantu wawafatiti mpaka Yoridani na mnjira wayiwona nguwu na vintu vimonga Waaramu vyawavilekiti pawaweriti wankutuga. Wawuya na kumgambira mfalumi visoweru avi. 16 Wantu wa Samaliya walawa na kutola lopola kung'onjeru ya Waaramu, Mtuwa Mlungu ntambu yakalongiti. Kilu mhanu za ubumu uherepa wa nganu ama kilu lirongu za shayili ishuuzitwi kwa shipandi shimu sha feza.

17 Na mfalumi kaweriti kamtula mkulu gwa mlolera, kulolera ligomi lya mji. Mkulu ayu katimbagwa palaapalii kuligomi na kulaguwa na wantu, ntambu yakatakuliti Elisha mbuyi gwa Mlungu,mfalumi pakagenditi kumlola. 18 Elisha kaweriti kamgambira mfalumi shaka handa ashi lishaka lyalifatiti, vibaba mhanu vya ubumu uherepa wa nganu ama kilu lirongu lya shayiri melishuuzwi kwa shipandi shimu sha mpiya kuligomi lya mji, palii kwanja 19 mkulu gwa mashonta kaweriti kambelera Elisha, pakalonga, "Shitwatira ashi hapeni shilawiri ata handa Mtuwa Mlungu mweni mekatendi madilisha kumpindi" Elisha kaweriti kamwankula, "Haguwoni yagatendeka, kumbiti shiboga sheni hapeni gushiliyi." 20 Hangu ndo ntambu yayilawiriti, mkulu gwa lishonta kahowa kwa kutimbagwa na wantu ligomi ali lya mji.