1 Mushinja sha kumi na mbili sha ukolamlima wa mfalumi Ahazi gwa Yuda, Hoshea mwana gwa Ela kanjiti kukolamlima Israeli, kakolamlima pakawera aku Samaria kwa vinja tisa. 2 Katenditi vidoda kulongolu kwa Mtuwa Mlungu tembera handa ndiri wafalumi wa Israeli yawamlongoleriti. 3 Mfalumi Shalimanesa gwa Ashuru kizi kulikomanga nayu nkondu na yomberi Hoshea kajimira kusinda na kaweriti ntumintumi gwakuyi na kumlipa kodi mukila shinja. 4 Shinja shimu mfalumi Shalimanesa gwa Ashuli kayambuliti handa mfalumi Hoshea kamgalambuka toziya katuma ulagilagi kwa mfalumi Soo gwa Misri. Aku mfalumi pakawera kaleka kulipa koda yakuyi ya kila shinja kwa mfalumi gwa Ashuru shakapanu Shalimanesa kambata na kumtatira mushibetubetu.

5 Mfalumi gwa Ashuru kayikangala isi yoseri na kusoka mji gwa Samalia na kuguzyengeta kwa shaka sha vinja vitatu. 6 Mushinja sha tisa sha ukolamlima wa Hoshea, mfalumi gwa Ashuru kayilopoliti Samalia na kuwatola wantu wa Israeli malopola mpaka Ashuru, wamonga wawu kawatula walikali kumji gwa Hala, wamonga mji gwa Gozani pakwegera na lushemba Habori na wamonga mumiji ya Media.

7 Goseri aga gatendikiti toziya wantu wa Israeli wamgalambukiti Mtuwa Mlungu, Mlungu gwawu, mweni kawalaviyiti kulawa mmawoku ga mfalumi gwa Misri, viraa wawaguwiriti wamlungu wamonga, 8 na kufata njira za wantu wa isi zimonga zyeni Mtuwa Mlungu kawawingiti palongolu pa Waisraeli na kutenda matendu yagayingiziwitwi muisi na wafalumi wa Israeli. 9 Wantu wa Israeli watenditi kwa bada mirandu yayiweritindiri miheri palongolu pa Mlungu, Mlungu gwawu. Wanyawiti pahala pampindi pavigongu vya kuguwira wamlungu wa mpayu mukila mji, kwanjira mji mdidini mpaka kumji gwana shibambaza. 10 Pampindi pa kila shigongu na pasi pa kila mtera mkulu gwana lisisi, wanyawiti mpanda za mabuwi na vinyagu vya mlungu gwa shidala Ashera, 11 na watumiziya ubani kuvitalawanda vyoseri vya wamlungu wa mpayu kufata ntambu wantu wa isi zimonga wawingitwi na Mtuwa Mlungu. Wamtenda Mtuwa Mlungu kakalali nentu na matendu gawu makontola, 12 na waguwira vinyagu vyeni Mtuwa Mlungu kaweriti kawabera, pakalonga, "Namtenda hangu."

13 Mtuwa Mlungu kawalagalira wambuyi na walola kuyikalipira Israeli na Yuda pakalonga, "Mzileki njira zyenu zidoda na pamjimira lagiru zyangu na malagalira gangu kulinganira na lagiru zyanawapananiti watati wenu na zyeni niwapananiti kupitira kwa wantumintumi waneni wambuyi." 14 Kumbiti womberi wajimirandiri, waweriti wakamala gambira wambuyi wawu weni wamwaminindiri Mtuwa Mlungu, Mlungu gwawu. 15 Walemiti kujimira malagalira gakuyi, walikolandiri lipatanu lyakatenditi na watati wawu na kulema makalapiru gakuyi. Waviguwiriti vinyagu vyaviweritindiri na mana ata womberi waweritindiri na mana kayi, wafatiti shitiba sha wantu wa maisi yagawazyengekiti. Walema amuli za Mtuwa Mlungu pota kuzitenda.

16 Walemiti amuli zoseri za Mtuwa Mlungu, Mlungu gwawu, wanyawa shinyagu sha wamlungu wana wa ng'ombi wawili wadidini wa kuponda, viraa virii wanyawa shinyagu sha mlungu gwa shidala Ashera washiguwira na vintu vyoseri vya kuliyera viraa wamtendera Baali. 17 Wawalaviyiti wana wawu wapalu na wadala kuwera tambiku ya kulunguziya tolosu kwa wamlungu wawu wa mpayu, wagenda kwa walolera na wahawi. Wafiriti nentu kutenda makontola palongolu pa Mtuwa Mlungu, wamkalaliziya nentu. 18 Su Mtuwa Mlungu kawakalalira nentu wantu wa Israeli na kuwawinga nakamu kulawa muisi yakuyi, kamlekandiri muntu ila likabila lya Yuda gweka yakuyi.

19 Kumbiti ata wantu wa Yuda wajimirandiri lagiru la Mtuwa Mlungu, Mlungu gwawu, su wafata njira za wantu wa Israeli. 20 Mtuwa Mlungu kawalemiti Waisraeli woseri na Wayuda woseri, kawakomanga na kuwaleka mmawoku mwa wankondu wakalipa na shakapanu kawawinga palongolu pakuyi.

21 Pa Mtuwa Mlungu kuwatula gweka wantu wa Israeli na lukolu lwa Dawudi, wantu wa Israeli wamlumika Yeruboamu mwana gwa Nebali kuwera mfalumi. Na Yeruboamu kawatenda wantu wa Israeli kumleka Mtuwa Mlungu na kutenda vidoda vikulu nentu. 22 Waisraeli watenditi vidoda vyakatenditi Yeruboamu, wasinditi kuvileka, 23 Upeleru Mtuwa Mlungu kawawinga kulawa palongolu pakuyi, ntambu yakaweriti kawaberiziya kupitira kwa wantumintumi wakuyi woseri wambuyi. Hangu wantu wa Waisraeli watolitwi lopola kulawa isi yawu weni wajegwa mpaka Ashuru kweni walikala mpaka vinu.

24 Shakapanu mfalumi gwa Ashuru kawatola wantu kulawa Babeli na Kutha na Ava na Hamati na Sefarivaimu na kuwatula mumiji ya Samalia pahala pa wantu wa Israeli wawajegitwi muuhamisiya. Wayitola miji ayi na kulikala amu. 25 Pawanjiti kulikala amu, wamguwirandiri Mtuwa Mlungu, hangu Mtuwa Mlungu kalagalira simba muwamu mwawu na womberi walaguwa na simba ayu. 26 Shakapanu wantu wamgambira mfalumi gwa Ashuru, "Wantu wa isi zimonga yaguwatoliti na kuwatula mumiji ya Samalia wavimanandiri mirandu yakafira Mlungu gwa isi ayi, hangu Mlungu ayu katumiti simba mweni wankuwalaga." 27 Mfalumi gwa Ashuru kalonga, "Mwuziyi mtambika yumu pakati pa walii yatuwajegiti lopola, mumuwuziyi kagendi na kulikala aku, su kawafundi wantu lagiru ya Mlungu gwa isi ayi." 28 Hangu yumu gwa watambika yawalopolitwi kulawa Samalia kagenditi na kulikala Beteli na aku kawafunda wantu ntambu ya kumguwira Mtuwa Mlungu.

29 Kumbiti wantu woseri yawalikaliti mumiji ya Samalia walinyawiliti wamlungu wawu na kuyitula pahala pakuguwira papanyawitwi na Waisraeli. 30 Wantu kulawa Babeli wanyawa vinyagu vya mlungu Sukoti Benoti na wantu kulawa Kuti wanyawa vinyagu vya mlungu Nerigali, wantu wa Hamati wanyawa vinyagu vya mlungu Ashima, 31 Wantu kulawa Iva wanyawiti vinyagu vya wamlungu Nibihazi na Taritaki na Wasefarivaimu walaviyiti wana wawu kuwera tambiku ya kulunguziwa tolosu kwa wamlungu wawu Adrameleki na Anameleki. 32 Wantu awa viraa wamguwiriti Mtuwa Mlungu. Wasyagula kulawa pakati pawu wantu wa kila ntambu na kuwatenda watambika kutenderwa pahala pakuguwira na kulaviya tambiku aku toziya yawu. 33 Hangu wamguwiriti Mtuwa Mlungu, kumbiti shaka shiraashi waguwiriti viraa wamlungu wawu yawayitoliti kulawa isi yawu.

34 Ata vinu wankutenda ntambu yawatenditi mashaka gapititi. Wamguwira ndiri ntambu yayifiruwa Mlungu, pota kufata malagalira ama lagiru zyeni Mtuwa Mlungu kawagambiriti wana wa Yakobu, mweni kampananiti Yakobu litawu lya Israeli. 35 Mtuwa Mlungu kaweriti katenda lipatanu na wantu wa Israeli na kuwagambira, "Namguwira wamlungu wamonga, namuwasundamalira, namwitendera pota namwitambikira. 36 Hamung'uwiri neni Mtuwa Mlungu, yaniwalaviyiti aku Misri kwa uwezu na likakala livuwa. Hamnsuntamaliri neni na kundavilira tambiku. 37 Shaka shoseri hamfati shaniwagambira, malongoziya na lagiru zyeni nembiti toziya ya mwenga, mashaka goseri hamtendi weri. Namuwaguwira kayi wamlungu wamonga, 38 pota namlwaluwa lipatanu lyandenditi na mwenga, namuwaguwira wamlungu wamonga, 39 ila hamnguwiri neni Mtuwa Mlungu, Mlungu gwenu, naneni haniwalopoli kulawa mumawoku ga wankondu wenu." 40 Kumbiti wantu awa wapikanirandiri, su wendeleyiti kutenda ntambu yawatenditi mashaka gapititi.

41 Su wantu wa isi ayi wamguwiliti Mtuwa Mlungu, kumbiti viraa washiguwiriti shinyagu shawu. Mpaka vinu, walelwa wawu wendeleya kutenda ntambu yawatenditi wambuyi wawu.