1 Elisha kaweriti kamgambira mdala yakalikaliti Shunemu yakaweriti kamzyukusiya mwana gwakuyi, "Guwuki na mlongu gwaku, guhamili kushihenga toziya Mtuwa Mlungu kajega njala yayiwerimlamu muisi kwa shipindi sha vinja saba." Kamgambira kahami kagendi pahala pamonga. 2 Mdala ayu kawuka katenda handa mbuyi gwa Mlungu ntambu yakalongiti kagenda pamuhera na mlongu gwakuyi na kulikala handa mhenga muisi ya Filisiti kwa mivinja saba.

3 Vinja saba paviperiti, kawukiti Filisiti kawuya Israeli na kugenda kwa mfalumi kuluwa kawuzililwi numba yakuyi na lirambu lyakuyi. 4 Kamwoniti mfalumi kankuyowera na Gehazi, pakalonga, "Shondi gung'ambili mauzauza gagatendwa na Elisha." 5 Shaka Gehazi pakaweriti kankumgambira mfalumi, Elisha ntambu yakamzyukisiyiti muntu yakahowiti, su mdala ayu kiziti kumluwa mfalumi. Gehazi kalonga, "Gwee mfalumi, mdala mweni ndo ayu, Elisha kamzyukusiyiti mwana gwakuyi!" 6 "Mfalumi pakamkosiyiti mdala ayu nayomberi kamgambiriti, shakapanu mfalumi kamshema mlonguziya gwa wantumintumi wakuyi na kumgambira kamwuziliri mdala ayu ulunda wakuyi woseri, pamuhera na mota yoseri ya malambu gakuyi mushipindi ashi shoseri sha vinja saba."

7 "Lishaka limu Elisha kagenditi Damasiko. Shaka ashi mfalumi Beni Hadadi kaweriti mlweri na pakagambiritwi handa Elisha kaweriti Damasiko," 8 kamgambira mlonguziya gwa wantumintumi wakuyi Hazaeli, "Gumjegeri mbuyi gwa Mlungu lifupu gumgambiri kamkosiyi Mtuwa Mlungu handa hamponi ama ahowi." 9 Hazaeli kajega mafupu ga kila ntambu ga vintu vyoseri viherepa vya Damasiko pamuhera na visanka vyavipapitwi na ngamiya arobaini na kumjegera Elisha. Pakasokiti kwa Elisha kamgambira, "Ntumintumii gwaku, Beni Hadadi, mfalumi wa Aramu kantuma kwaku, yomberi kakosiya, hamboni ulweri awu?"

10 Su, Elisha kamwankula, gugendi gukamgambiri "Nakaka hakaponi, kumbiti Mtuwa Mlungu kananguziya handa hakahowi." 11 Ndo Elisha kamloladii pakawera na lyoga ata Hazaeli kawona lyoga. Vumu, Elisha mbuyi gwa Mlungu, kanja kulira. 12 Hazaeli kamkosiya, "Mtuwa gwangu, hashi gwankulira?"

Elisha kamwankula, "Toziya nivimana madoda geni haguwatenderi wantu wa Israeli. Hagulunguziyi maboma gawu kwa motu, na kuwalaga wantemba wawu kwa ligumba, haguwapontangi na kuwapapula wadala wana zinda."

13 Hazaeli kakosiya, "Kumbiti neni ntumintumi gwaku nahera shoseri shaweza hawezi hashi kutenda mirandu mikulu?" Elisha kankula, "Mlungu kananguziya handa haguweri mfalumi gwa Aramu."

14 Elizaeli ndo kawukiti kwa Elisha, kawuya kwa mkulu gwakuyi. Mfalumi Beni Hadadi kamkosiya, "Elisha kakugambiriti shishi?" Hazaeli kamwankula, "Kang'ambiriti nakaka haguponi." 15 Kumbiti shirawu yakuyi Hazaeli katola libulangeti kalilekera mumashi, shakapanu kamgubikira nalu kusheni mpaka kahowa.

Hazaeli kakolamlima pahala pakuyi.

16 Mushinja sha mhanu sha ukolamlima wa Yoramu mwana gwa Ahabu, mfalumi gwa Israeli, Yehoramu mwana gwa Yehoshafati, mfalumi gwa Yuda kanjiti kukolamlima. 17 Pakanjiti kukolamlima kaweriti na vinja selasini na viwili. Kakolitimlima aku Yerusalemu vinja vinani, 18 Mdala gwakuyi kaweriti mhinga gwa Ahabu. Yolamu kafatiti njira zidoda za wafalumi wamonga wa Israeli handa kaya ya Ahazi na katenda makontola kulongolu kwa Mtuwa Mlungu. 19 Kumbiti Mtuwa Mlungu kafirandiri kuwagamiziya wantu wa Yuda, toziya ya Dawudi ntumintumi gwakuyi, ntambu katakuliti handa walelwa wakuyi hawendereyi kukolamlima mashaka goseri.

20 Shaka sha ufalumi wa Yehoramu, wantu wa Edomu walemiti ukolamlima wa Yuda, wamlumika mfalumi gwawu. 21 Hangu Yehoramu kawukiti na mbutuka zakuyi zoseri zakukwega na farasi kagenda Zairi kweni Waedomu waweriti wawazyengeta. Shaka sha pashiru kalawiti na wakulu wa mashonta wakuyi wa mbutuka kawakomanga Waedomu, kumbiti watoloka na lishonta lyakuyi litugiti na kuwuya ukaya. 22 Hangu wantu wa Edomu walemiti kukolwamlima na Yuda mpaka vinu. Shaka shiraashi, wenikaya wa Libina na weni walemiti.

23 *Kila shintu shakatediti mfalumi Yehoramu shilembwa mu Shitabu sha Maholu ga Wafalumi wa Yuda. 24 Yehoramu kahowa na kufintirwa mumalisembi ga shifalumi mumji gwa Dawudi na yomberi Ahazia, mwana gwakuyi Yehoramu, kakolamlima pahala pakuyi.

25 Mshinja sha lirongu na mbili sha ukolamlima wa Yoramu mwana gwa Ahabu mfalumi gwa Israeli, Ahazia mwana gwa Yehoramu mfalumi gwa Yuda, kanjiti kukolamlima. 26 Ahazia kanjiti kukolamlima pakawera na vinja ishilini na mbili, kakolamlima kulawa Yerusalemu kwa shaka sha shinja shimu. Mawu gwakuyi wamshemiti Atalia, mzyukulu gwa mfalumi Omri yakaweriti mfalumi gwa Israeli. 27 Toziya Ahazia kaweriti nahonga gwa mlongu gwa Ahabu na yomberi kafatiti njira ya kaya ayi ya Ahabu, katenditi makontola palongolu pa Mtuwa Mlungu, handa kaya ya Ahabu ntambu yawatenditi.

28 Mfalumi Ahazia kagenda na Yoramu mwana gwa Ahabu kulikomanga na Hazaeli mfalumi gwa Aramu aku Ramoti Gileadi pahala Waaramu pawamtenditi Yoramu. 29 Shakapanu mfalumi Yoramu kawuya kumji gwa Yezireeli su kapati kuponiziwa vironda vyakuyi vyakapatiti aku Rama, pakalikomangiti na Hazaeli mfalumi gwa Aramu. Nayomberi Ahazia mwana gwa Yehoramu mfalumi gwa Yuda kamgenderiti Yoramu mwana gwa Ahabu aku Yezreeli, toziya kaweriti mlweri.