1 su pashisokiti shaka sha Mtuwa Mlungu kumtola Eliya kugenda kumpindi muliyega lya shivyulavyula, Eliya na Elisha waweriti mnjira, pawalawa Giligali. 2 Shakapanu pawaweriti mnjira, Eliya kamgambira Elisha, "Shondi gwenga gulikali panu, Mtuwa Mlungu kandagalira ng'endi Beteli."

Kumbiti Elisha kamgambira, "Nilirapa nakaka hapeni nikuleki." Su, wagenda pamuhera mpaka Beteli.

3 Lipinga lya wambuyi wa Mlungu yawaweriti aku wamgendera Elisha, wamkosiya, "Hashi, guvimana handa leru Mtuwa Mlungu hakamtoli mtuwa gwaku?" Elisha kankula,

"Yina! Nivimana, mnyamali."

4 Eliya kamgambira, "Shondi Elisha gulikali panu, Mtuwa Mlungu kandagalira ng'endi Yeriku." Kumbiti Elisha kalema pakalonga, "Nilirapa nakaka hapeni nikuleki." Su, wagenda pamuhera mpaka Yeriku.

5 Lipinga lya wambuyi wa Mlungu kulawa Yeriku wamgendera Elisha na kumkosiya, "Hashi, guvimana handa leru Mtuwa Mlungu kamtola mtuwa gwaku?" Elisha kawawankula,

"Yina! Nivimana, mnyamali."

6 Shakapanu Eliya kamgambira Elisha, "Shondi gwenga gulikali panu, Mtuwa Mlungu kandagalira ng'endi kulushemba lya Yoridani."

Kumbiti Elisha kalonga, "Nilirapa nakaka hapeni nikuleki." Su, wagenda pamuhera. 7 Wambuyi wa Mlungu amusini wawafata mpaka kulushemba lwa Yoridani. Eliya na Elisha wagoloka pakwegera na lushemba na womberi wambuyi wa Mlungu wagoloka patali padidini. 8 Shakapanu Eliya kavula lihabiti lyakuyi, kayipinda na kugakoma mashi, mashi galibagulana pahala pawili na womberi waloka mpaka kumwambu, wapita pahala payuma. 9 Pawasokiti kumwambu, Eliya kamgambira Elisha, "Gung'ambili shagufira nikutenderi pamberi nenewusiwi kwagwenga." Elisha kamgambira, "Nduwa hali seemu mbili za uwezu waku wa kutenda mawuzawuza welinawu."

10 Eliya kankula, "Luwa yaku ndo ikamala, ata hangu hagwanki likakala ali payiwera hagumoni shaka pambusiwa kwagwenga, kumbiti pagumonandiri, su hapeni gupananwi."

11 Pawaweriti wankugendagenda na kuyowera, vumu mbutuka ya motu yayikwegitwi na farasi gwa motu viwatula gweka na yomberi, Eliya katolwa kumpindi mushivyulavyula shashizyengeta. 12 Elisha pakashiwoniti shitwatira ashi kalira, "Tati gwangu, tati gwangu! Mlolera mkulu gwa Israeli guwuka!" Su, Elisha kamwonandiri kayi Eliya.

Ndo Elisha kanika lihabiti lyakuyi na kupapula vipandi viwili. 13 Shakapanu kasoliti lihabiti lya Eliya yalimtulikiliti, kawuya na kagoloka pawunenemu wa lushemba Yoridani. 14 Kagakoma mashi kwa lihabiti lya Eliya pakalonga, "Kakoshi Mtuwa Mlungu, Mlungu gwa Eliya?" Pakagakomiti mashi, galibagula pahala pawili na yomberi kaloka mpaka kumwambu. 15 Lipinga lya wambuyi wa Mlungu kulawa Yeriku pawamwoniti, walonga, "Rohu ya Eliya ya kwa Elisha." Su, wagenda kumwanka na kumsuntamalira. 16 Wamgambira, "Twenga wantumintumi waku tuwera makambaku amusini, shondi gutuleki tugendi kumsakula mtuwa gwaku. Pamonga rohu ya Mtuwa Mlungu impapa na kumwasa pampindi pa lugongu tunga ama mlulalanda."

Elisha kankula, "Ndala, namgenda."

17 Kumbiti womberi wahimiziyiti mpaka Elisha kawonasoni, kawagambira "Mgendi." Hangu wawatuma wantu hamusini wagenda wamsakula kila pahala kwa shaka sha mashaka matatu wamwonandiri. 18 Shakapanu wawuya kwa Elisha yakaweriti kalikala aku Yeriku. Elisha kawakosiya, "Hashi, niwagambirandiri namgenda?"

19 Shakapanu wantu wamu wa Yeriku wamgendera Elisha, wamgambira, "Mtuwa, ntambu yaguluwona lushi alu ndo luherepa, kumbiti mashi gatuwerananga ndo madoda na gatenda zinda zikolopoki."

20 Elisha kawagambira, "Mlekeri munu mngati mubakuli yasyayi, shakapanu mnjegeri." Na womberi wamjegera. 21 Elisha kagenda kumbwiru za mashi, kasa munu agu mngati na kalonga, "Mtuwa Mlungu kalonga hangu. Nigatenda mashi aga gaherepi, kwanjira vinu hapenigajegi viwembu ama kukolopola zinda." 22 Na mashi aga gaherepa mpaka leru, ntambu yakalongiti Elisha.

23 Elisha kawukiti Yeriku, kagenda Beteli. Pakaweriti mnjira, wantemba tunga walawa kumji wanja kumbolera pawalonga, "Ayo kana shipala!"

24 Elisha kagalambuka kawalola na kuwapangira kwa litawu lya Mtuwa Mlungu. Dubu wawili wa shidala walawa mushidowi, wawapapula wantemba alubayini na wawili muwamu mwawu.

25 Elisha kendereya na mwanja gwakuyi mpaka kulugongu lwa Karimeli na kulawa shakapanu kawuya Samalia.