1 Mushinja sha saba sha ukolamlima wa mfalumi Yehu gwa Israeli, Yoashi kanjiti kukolamlima Yuda aku Yerusalemu, yomberi kakolitimlima kwa vinja alobayini aku Yerusalemu. Mawu gwakuyi kaweriti Sibiya, kulawa Beeri Sheba. 2 Mukulikala kwakuyi kwoseri katenditi maheri palongolu pa Mtuwa Mlungu, toziya mtambika mkulu Yehoyada kaweriti kankumfunda. 3 Ata hangu, pahala pampindi pakuguwira wamlungu pahalibisiwandiri na wantu wendereyiti kutambikira na kutumiziya ubani aku.

4 Yoashi kawashema watambika wa Mlungu na kuwalagalira, pakalonga, "Mpiya zoseri yazijegwa mu Hekalu handa tambiku nanagala payiwera ijegwa toziya ya kuwalanga wantu ama ilawa kulawirana na nazili ama mpiya zoseri yazijegwa handa lifupu, 5 watambika wanki kulawa kwa kila muntu na womberi wanyawi syayi numba zoseri zyazifiruwa kunyawa syayi."

6 Kumbiti ata pamberi pa vinja ishilini na tatu wa ukolamlima wa mfalumi Yoashi watambika waweriti watendandiri manyawa goseri ga numba. 7 Hangu mfalumi Yoashi kamshemiti mtambika Yehoyada na watambika wamonga na kuwakosiya, "Hashi mnyawandiri Hekalu? Su, namtola mpiya kulawa kwa wantu yawatula ila mzijegi, su numba inyawiwi syayi." 8 Watambika wajimira nawanka mpiya kayi kulawa kwa wantu na viraa wajimirana nawatenda kayi manyawa ga Hekalu

9 Yehoyada katola lisanduku na kutobola shitoboli kushifuniku shakuyi, shakapanu kashitula kushitalawanda uwega wa kumliwu wa muntu pakingira Kuhekalu. Na watambika yawaweriti mlihengu kuligomi watuliti mpiya zoseri zyazijegitwi mu Hekalu. 10 Kila pawawona kwana mpiya zivuwa mlisanduku, mlemba gwa mfalumi na watambika wingiriti wazilaviya na kuwalanga na kuzitawa mushifungu sha feza zoseri zyazipatikaniti mu Hekalu. 11 Shakapanu pawazipimiti kala wawapananiti watenda lihengu yawagolokiriti Hekalu na womberi wawalipa wanyawa mbawu na wanyawa numba, wawanyawiti syayi numba ya Mtuwa Mlungu, 12 Viraa wanyawa mbawu na wapantanga mabuwi, zitenderwa kuhemelera mbawu na mabuwi yagasongolitwi su kutenda manyawa syayi ga Hekalu 13 Kumbiti mpiya azi zitenderwandiri kwa kulipira unyawa wa mabakuli yaganyawitwi kwa madini ga feza, mikasi ya kudumulira tambi za mimiliku zyaziweriti Muhekalu, mabakuli na mapenga, pota kwa vyombu vimonga vyoseri vya zahabu ama vya feza. 14 Zoseri zitendiritwi kwa kuwalipa watenda lihengu yawazitenderiti kutenda manyawa syayi ga Hekalu. 15 Watenda mahengu yawagolokiriti lihengu ali waweriti waaminka nentu, wafiruwandiri kulonga ntambu yawazitenderiti feza azi. 16 Mpiya zyazilaviyitwi kuwera tambiku ya kuwusiya likosa na tambiku za kuwusiya vidoda ziyingiziwandiri mu Hekalu, azi ziweriti za watambika.

17 Shipindi ashi Hazaeli mfalumi wa Aramu kagukomanga mji gwa Gati na kugulopola. Shakapanu Hazaeli kagenditi Yerusalemu su kagukomangi, 18 Yoashi mfalumi gwa Yuda katoliti tambiku zoseri zyazilumikitwi na wambuyi wakuyi wafalumi wa Yuda. Yehoshafati na Yehoramu na Ahazia na kongera zilii zakuyi, pamuhera na zahabu yoseri yayiweriti muluhanja lwa Hekalu na muliboma, kazituma kwa Hazaeli mfalumi gwa Aramu. Na yomberi Hazaeli kawuka na kayikomangandiri Yerusalemu.

19 Mirandu imonga yoseri ya mfalumi Yoashi ilembwa mu Shitabu sha Maholu ga Wafalumi wa Yuda.

20 Walonguziya wakuyi wa mashonta wagalambukiti, wamlagira aku Beti Milu munjira yayigenda Sila. 21 Yawamlagiti ndo Yozakari mwana gwa Shimeati na Yehozabadi mwana gwa Shomeri wantumintumi wakuyi. Shakapanu Yoashi wamfintira mumasembi ga shifalumi mumji gwa Dawudi. Na Amazia mwana gwakuyi, kakolamlima pahala pakuyi.