1 Mushinja sha lirongu na saba sha ukolamlima wa Peka mwana gwa Remaliya mfalumi gwa Israeli, Ahazi mwana gwa Yotamu mfalumi gwa Yuda kanjiti kukolamlima. 2 Ahazi Kaweriti na vinja ishilini pakanjiti kukolamlima. Kakolitimlima kwa shaka sha vinja lirongu na sita aku Yerusalemu. Katenda ndiri maheri kulongolu kwa Mtuwa Mlungu handa Dawudi mbuyi gwakuyi Ahazi ntambu yakatenditi, 3 kafatiti njira ya wafalumi wa Israeli. Nentu ya aga, ata kamlaviyiti mwana gwakuyi kaweri tambiku ya kulunguziya tolosu kwa shinyagu, pakafata njira idoda ya wantu wa maisi gamonga yagawingwitwi na Mtuwa Mlungu gwa Israeli pawaweriti wankwingira muisi ayi ya Kanani. 4 Ahazi kalaviyiti tambiku na kutumiziya ubani pahala pampindi, pavigongu na pasi pa kila mtera mkulu gwana lisisi.

5 Shakapanu Resini mfalumi gwa Aramu na Peka mwana gwa Remalia mfalumi gwa Israeli walawiliti su kulikomanga nkondu na Yerusalemu na womberi wamzyengeta Ahazi, kumbiti waweza ndiri kumkanka. 6 Shaka ashi, mfalumi gwa Aramu kagulopoliti mji gwa Elati kawawuzilira Waaramu na kuwawinga wantu wa Yuda yawalikaliti amu. Na Waaramu wingira Elati na kulikala aku mpaka vinu. 7 Su Ahazi kalagalira wantu kwa mfalumi Tigilati Pileseri gwa Ashuru pawawera na ulagilagi awu. "Neni ndo ntumintumi gwaku mwaminika. Gwizi gunopoli kulawa kwa wafalumi wa Aramu na Israeli weni wankungomanga." 8 Ahazia katola madini ga feza na zahabu yaviweriti mu Hekalu na luhanja lwaluweriti munumba ya mfalumi na kumjegera handa lufupu mfalumi gwa Ashuru. 9 Tigalati Pileseri, kitikiriti luwa ya Ahazi, kagukomangiti mji gwa Damasiko na kugulopola. Kamlaga mfalumi Resini na kuwajega malopola Kiri.

10 Mfalumi Ahazi pakasokiti Damasiko kuliwona na mfalumi Tigalati Pileseri, kawoniti shitalawanda aku. Su, kamjegeriti mtambika Uria mfanu gwa shitalawanda ashi na mpangu gwa kunyawa shitalawanda handa ashi pamuhera na matakuziya gakuki na unyawa awu. 11 Uria kanyawa shitalawanda ashi kulinganira na mfanu agu na kushimalira pamberi pa Ahazi kawuya ukaya. 12 Ahazi pakasokiti kulawa Damasiko, kashiwoniti shitalawanda ashi shipera kunyawiwa. 13 Kalaviya tambiku yakuyi ya kulunguziya tolosu ya viboga na ya virandu, kamishira mwazi gwa tambiku ya ponga. 14 Shitalawanda sha shaba sheni shilumikitwi kwa Mtuwa Mlungu, kashiwusiyiti kulongolu kwa numba kulawa lupeni lwakuyi pakati pa shitalawanda shakuyi na numba ya Mtuwa Mlungu, kashitula kulupenu lwaluwera uwega wa kushana mwa shitalawanda shakuyi. 15 Shakapanu kamlagalira Uria, "Gutenderi shitalawanda shangu ashi shikulu kwa kulunguziya tambiku za mandawira na tambiku za viboga za pamihi, tambiku za kulunguziwa za viboga za mfalumi mweni na tambiku za kunguziwa zyazilaviwa na wantu woseri na viraa tambiku za virandu za wantu. Gumishili mwazi gwa wankanyama woseri wa kulunguziwa weni walaviyitwi tambiku. Kumbiti shitalawanda shilii sha shaba hantendeli neni kwa kukosilira galii Mlungu kafira ntendi." 16 Hangu Uria katenditi teratera handa mfalumi Ahazi ntambu yakamlagaliriti.

17 Mfalumi Ahazi kaziwusiya vikoleru yaviweriti zigoloziwa aku, kawusiya bilika yayishemitwi bahali yeni iweriti pampindi pa ng'ombi shipalu kumi na mbili wa shaba na kuyitula pampindi pa lyanjiru lya mabuwi. 18 Su kumfiriziya mfalumi gwa Ashuru Tigirasi Peresa mfalumi Ahazi kabomoliti liringu lya kuguwira lishaka lya kwoyera na kudiwa njira ya gweka yayiweriti yankutenderwa na wafalumi kwingira kunumba ya Mlungu.

19 Matendu gamonga goseri ga mfalumi Ahazi galembwa mu Shitabu sha maholu ga wafalumi wa Yuda. 20 Ahazi kahowa na kufindilwa mumasembi ga shifalumi mmuji gwa Dawudi na yomberi Hezekia kakolamlima pahala pakuyi.