1 Yosia kaweriti na vinja vinani pakanjiti kuwera mkolamlima aku Yerusalemu, kakolamlima kwa vinja selasini na yimu. Mawu gwakuyi kaweriti Yedida, mhinga gwa Adaya, kulawa mji gwa Bosikati. 2 Yosia katenditi maheri na kamfiriziyiti Mtuwa Mlungu. Kafatiti mfanu gwa mfalumi Dawudi yakamlongoliriti na kuzifata kwa waminika lagiru za Mtuwa Mlungu.

3 Mushinja sha lirongu nanani sha ukolamlima wakuyi, Mfalumi kamtumiti mlemba Shafani, mwana gwa Azalia, mzukulu gwa Meshulamu, mu Hekalu la Mtuwa Mlungu pakalonga, 4 "Gugendi kwa mtambika mkulu Hilikia gumgambili kawalangi mpiya zirii zyazijegitwi mu Hekalu, zyeni walolera wazijojoniriti kulawa kwa wantu. 5 Shiyashi sha mpiya azi zipananwi wagolokera wa manyawa ga Hekalu, su wawalipi wanyawa yawatenda manyawa, 6 weni ndo wasongola mbawu, wanyawa na watenda lihengu wamonga. Zimonga zitenderwi kuhemera mbawu na mabuwi yagasongolitwi toziya ya kutendera kwa syayi manyawa ga numba. 7 Wantu yawagolokera unyawa nawafiruwa kulaviya walanga ya matendera ga mpiya zyawapanananwa, toziya wazitendera kwa waminika."

8 Shakapanu mtambika mkulu Hilikia kamgambiriti mlemba Shafani, "Nishipata shitabu sha Lagiru mu Hekalu." Hilikia kampanana shitabu Shafani na yomberi kashibetula. 9 Mlemba Shafani, kamgendera mfalumi na kulaviya shisoweru, pakalonga, "Wantumintumi waku walaviya senti zyazipatikaniti mu Hekalu shakapanu wawapanana wanyawa yawagolokera manyawa syayi ga numba ya Mtuwa Mlungu." 10 Shakapanu mlemba Shafani, kawagambira mfalumi, "Hilikia kampanana shitabu." Na Shafani kashibetula palongolu pa mfalumi.

11 Mfalumi pakapikaniriti yagalembitwi mu Shitabu sha Lagiru, kapapuliti nguwu zakuyi, 12 nakawalagalira mtambika Hilikia, Ahikamu mwana gwa Shafani na Akibori mwana gwa Mikaya pamuhera na mlemba Shafani na Asaya ntumintumi gwa mfalumi, pakalonga, 13 "Mgendi mwakasakuli shakutenda kulawa kwa Mtuwa Mlungu kwajili yaneni na wantu wa Yuda woseri kuusu vyoseri vyavilembitwi mu shitabu ashi shashiwonikiti. Mtuwa Mlungu katukalalira, mana wambuyi watwenga wajimirandiri yagalembitwi mu shitabu ashi na kutenda vyoseri vyavilembitwi kwajili yatwenga."

14 Hangu mtambika Hilikia na Ahikamu na Akibori na Shafani na Asaya, woseri wagenditi kwa mawu yumu mbuyi litawu lyakuyi Hulida kaweriti mdala gwa Shalumu yakaweriti mtula nguwu za Hekalu. Na ayu Shalumu kaweriti mwana gwa Tikiva na Tikiva mwana gwa Harihasi. Shaka ashi Hulida kaweriti kankulikala mumtaa gwa pili gwa Yerusalemu na womberi wayowera nayu. 15 "Su kawagambira Mtuwa Mlungu, Mlungu gwa Israeli kalonga, mmugambiri ayu yakawalagaliliti kwaneni," 16 Mtuwa Mlungu kalonga hangu, "Hanjegi makontola toziya ya pahala panu na kwajili ya wenikaya wakuyi ntambu yayiwera mushitabu shashibetulitwi na mfalumi gwa Yuda. 17 Toziya wandeka na kuwatumiziya ubani wamlungu wamonga na hangu kunkalaziya kwa lihengu lyoseri lya mawoku gawu, maya gangu kwa Yerusalemu hagakalipi na hapeni ganyamaziwi. 18 Kumbiti mfalumi gwa Yuda yakawalagaliriti kusakula utakulu wa Mtuwa Mlungu, mmugambiri handa, hangu ndo ntambu yakalongiti Mtuwa Mlungu, Mlungu gwa Israeli, kuusu visoweru vyagupikaniriti, 19 toziya gupikanira ntambu yantakuliti kwajili ya pahala panu na wenikaya wakuyi handa hawaweri ushiwa na pangira, su gulinanagaziya na kupapula nguwu zyaku su neni nikupikanira. 20 Masu gaku hapeni gawoni ukontola yaniujega kwajili ya pahala panu. Guloli, hanikutul i pamuhera na wambuyi waku nagwenga hagutulwi mlisembi kwa ponga." Su walagilagi wamjegera mfalumi Yosia visoweru avi.