1 Sedekia kamgalambukiti mfalumi Nebukaderaza gwa Babeli, mulishaka lya lirongu lya mwezi gwa lirongu gwa shinja sha tisa sha ukolamlima wakuyi Sedekia, Nebukadineza mfalumi gwa Babeli kasokiti na lishonta lyakuyi, kagukomanga mji gwa Yerusalemu, kaguzyengeta na kunyawa liboma kuguzyengeta. 2 Mji gwendereyiti kuzyengetwa mpaka shinja sha kumi na moja sha ukolamlima wa Sedekia. 3 Mulishaka lya tisa lya mwezi gwa msheshi njala iweriti nkulu nentu mu mji ata paweritindiri shiboga shoseri kwaajili ya wenikaya wakuyi. 4 Su, seemu ya shibambaza sha mji shibomolitwi na wamashonta woseri watuga shaka sha pashiru pawapitira mushiwunga sha mfalumi kuligomi pakati pa vibambaza viwili, wagenda uwega wa Araba, tembera Wababuloni waweriti waguzyengeta mji. 5 Kumbiti lishonta lya Wakalidayu limfatiti Mfalumi na kumlopola kululalanda lya Yeriku na mashonta wakuyi woseri wamlekiti na kutuga. 6 Su, Wakalidayu wamlopoliti mfalumi Sedekia wamjega kwa mfalumi gwa Babeli aku Ribila na yomberi kamtoza. 7 Shakapanu kawalagiti wana wakuyi na Sedekia mweni pakawona, viravilii wipa masu gakuyi. Upeleru wamtawa minyololu na kumjegera Babeli.

8 Mulishaka lya saba lya mwezi gwa mhanu gwa shinja sha lirongu na tisa sha ukolamlima wa Nebukadineza mfalumi gwa Babeli, Nabuzaradani mlonguziya gwa walolera wa mfalumi, kasokiti Yerusalemu. 9 Kayilunguziyiti motu Numba Nkulu ya Mtuwa Mlungu, liboma na numba zoseri za Yerusalemu, iweri nkulu ama ndidika kayilunguziyiti motu. 10 Na wamashonta woseri wa Babeli yawaweriti pamuhera na mlonguziya gwa walolera wa mfalumi wabomoliti vibambaza vyavizyengetiti mji gwa Yerusalemu. 11 Nebuzaradani mlonguziya gwa walolera wa mfalumi, kawajegiti muwuhamiziya wantu yawaweriti wasigala mumji na woseri yawaweriti waliponiziya kwa mfalumi gwa Babeli pamuhera na wantu wamonga woseri. 12 Kumbiti Nebuzadani kalekiti wamu wa wantu yawaweriti wahushu nakamu muisi. Kawalekiti waloleri mizabibu na kulima malambu.

13 Wababeloni wamegiti vipandivipandi mpanda za shaba zyeni ziweriti mu Numba ya Mlungu, pamuhera na vikaliru vyakuyi, libilika likulu lya shaba lyaliweriti amu mu Numba Nkulu ya Mlungu, mpaka Babeli. 14 Viraavirii watoliti viwiga, vipalira malivu, mikasi na mitera yakatendiriti kulunguziya ubani na vyombu vimonga vyoseri vya shaba vyavitendiritwi muutenderu wa Numba Nkulu ya Mlungu lya Mlungu. 15 Watola kila vyetezu na mabakuli. Mlonguziya gwa walolera wa mfalumi kajegiti Babeli kila vyombu vya zahabu na kila vyombu vya feza. 16 Shaba yoseri yakatenderiti mfalumi Selemani kunyawira mpanda mbili zilii, bilika nkulu na vikaliru kwajili ya Numba Nkulu ya Mlungu iwezitwindiri kupima kwa utopa. 17 Kila mpanda iweriti na utali wa mita nani na pampindi pakuyi paweriti na mtuwi gwa shaba, utali wa kila mtuyi guweriti mita yimu na nukuta ishilini na mhanu. Kila mtuyi guzyengetwa malembiziya ga makomamanga, goseri ga shaba ntitu.

18 Shakapanu Nebuzaradani mlonguziya gwa walolera wa mfalumi wamtoliti lopola Seraya mtambika mkulu, Sefania mtambika gwa pili pamuhera na wanguziya wamonga watatu wa Numba Nkulu ya Mlungu. 19 Kamtoliti mlonguziya yumu mumji gweni kaweriti kawalonguziya mashonta kunkondu, pamuhera na wantu mhanu wamanika wa mfalumi weni wawawoniti aku. Viraa, kambatiti mlonguziya mkulu gwa lishonta mweni katuliti maholu ga mashonta pamuhera na wantu sitini wamanika weni kawawoniti Yerusalemu. 20 Nebuzaradani mlonguziya gwa walolera kawatoliti wantu awa, kawajega kwa mfalumi gwa Babeli aku Ribila. 21 Mfalumi Nebukadineza gwa Babeli kawakomangiti na kuwalaga wantu awa aku Ribila muisi ya Hamati.

Hangu wantu wa Yuda watolitwi lopola kunja kuisi yawu.

22 Mfalumi Nebukadineza gwa Babeli kamsyaguliti Gedalia, mzukulu gwa Shafani, kaweri mkolamlima gwa wantu woseri wa Yuda weni wajegwandiri Babeli. 23 Shakapanu wakulu woseri wa mashonta pamuhera na wantu wawu pawapikiniliti kuwera mfalumi gwa Babeli kamsyaguliti Gedalia kuwera mkolamlima, wamgenderiti Gedalia aku Mizipa. Wantu awa waweriti Ishimaeli mwana gwa Netania, Yohanani mwana gwa Karea, Seraya mwana gwa Tanihumeti muntu gwa kulawa Netofati na Yezania muntu kulawa Maaka. 24 Na Gadalia kalirapa kulongolu kwawu na wantu wawu, kalonga, "Namtira toziya ya wakulu wa Babeloni. Mlikali muisi mumtenderi mfalumi gwa Babeli na mirandu yoseri hayiwagendeli weri."

25 Mumwezi gwa saba, Ishimaeli mwana gwa Natania, mzukulu gwa Elishama yakaweriti gwa lukolu lwa shifalumi, kiziti kwa Gedalia pakalikolana na wantu lirongu, kamkomanga Gedalia na kamlaga. Viravirii kawalagiti Wayahudi na Wababeli yawaweriti na yomberi. 26 Shakapanu Waisraeli woseri yawaweriti wahushu pamuhera na wakulu wa mashonta, wawukiti wagenda Misri, toziya wawatiriti Wababeli.

27 Mushinja sha selasini na mbili, Evili Merodaki mfalumi gwa Babeli, pakanjiti kukolamlima, shinja shiraashi kamlekeziyiti Yehoyakini mfalumi gwa Yuda na kamlaviya mkutatilwa. Ali liweriti lishaka lya ishilini na saba lya mwezi gwa lirongu na mbili, shaka sha selasini na saba kwanjira Yehoyakini pakatolitwi lopola. 28 Kayoweriti na yomberi weri na kumupanana lupenu lya ligoya kuliku wafalumi wamonga yawaweriti pamuhera na yomberi aku Babeli. 29 Su, Yehoyakini kagalambula nguwu zakuyi za kutatilwa. Kila lishaka kaweriti kapata shiboga shakuyi kwa mfalumi. 30 Kapananwa na mfalumi vintu vyakaweriti kavifira lishaka kwa lishaka, makaliru gakuyi goseri.