1 Lishaka limu, shipinga sha wambuyi wa Mlungu wamlalamikiriti Elisha pawalonga, "Pahala panu patulikala ndo padidini nentu kwatwenga! 2 Gutujimili tugendi Yoridani tuyidumuli mitera su tulinyawili pahala pakututosha."

Elisha kawankula, "Mgendi."

3 "Yumu gwawu kamluwa pakalonga, shondi gugendi na twenga wantumintumi waku. Na yomberi kankula, hang'endi," 4 hangu kagenda pamuhera na womberi na pawasokiti kulushemba Yoridani wanja kudumula mitera. 5 Yumu gwawu pakaweriti kankudumula mitera, liwagu lwakuyi lisomoka na kutulukira mumashi, kalira, pakalonga, "Vinu mtuwa gwangu hantendi hashi?" "Liwagu ali twazika kwa muntu!"

6 Elisha kankosiya, "Litulukira koshi?"

Muntu ayu kamlanguziya, Elisha kadumula lubiki na kwasa mumashi na palaa palii liwagu liyeruka mumashi. 7 "Elisha kamgambira kalitoli. Yomberi kalitalipisiya liwoku, kalitola."

8 "Shaka shimu kuweriti na nkondu pakati pa Aramu na Israeli. Su, mfalumi gwa Aramu waligambiziyana na wakulu wa mashonta kuusu pahala pakutula malingu gawu." 9 "Kumbiti Elisha kamjegera shisoweru mfalumi wa Israeli kalikali weri na pahala panu, toziya Waaramu waweriti kala kupakomanga." 10 Su, mfalumi gwa Israeli kawalagalira mashonta wakuyi pakwegera na pahala pakagambiritwi. Elisha kendiriyiti kumberiziya mfalumi na mfalumi kaweriti kalilolera weri. Shitwatira ashi shitendikiti mala zivuwa.

11 Mfalumi gwa Aramu ashi shimkalaziya nentu, kawashema wakulu wakuyi, kawakosiya, "Mng'ambiri gaa pakati pamwenga gaa yakagenda kulaviya visoweru kwa mfalumi wa Israeli?"

12 Yumu gwawu kankula, "Mfalumi kwahera yakatugalambuka. Ayu ndo Elisha, mbuyi gwa Mlungu yakawera aku Israeli. Yomberi kamgambiraga mfalumi gwa Israeli shoseri shagulonga ata paguwera mushumba shaku sha kugonja."

13 Mfalumi kawagambira, "Mgendi mkamloliloli muvimani pahala pakawera naneni haniwatumi wantu wambati."

Su, pawamgambiriti handa Elisha kaweriti aku Dotani, 14 mfalumi kalagalira lishonta likulu pamuhera na farasi na mbutuka za kukwega. Lishonta ali lisoka aku pashiru na kuguzyengeta mji. 15 Shirawu yakuyi mandawira putiputi ntumintumi gwa Elisha pakimukiti na kulawa kunja, kawona lishonta pamuhera na farasi na mbutuka za kukwegwa ziguzyengeta mji. Kawuya mnumba na kalonga, "Shodi twenga, gwee, Mtuwa gwangu! Vinu hatutendi hashi?"

16 Elisha kankula, "Nagutira toziya yawawera pamuhera na twenga ndo wavuwa kuliku yawawera pamuhera na womberi." 17 Shakapanu Elisha kaluwa, "Gwee Mtuwa Mlungu, gumgubutuli masu su kapati kuwona!" Su, Mtuwa Mlungu kagavugula masu ga mntemba ayu, kawona farasi na mbutuka za motu ziwera kila pahala mulugongu loseri, kumzyengeta Elisha.

18 Waaramu pawakomangiti, Elisha kamluwiti Mtuwa Mlungu pakalonga, "Nikuluwa guwatendi wantu awa waweri na lwisi!" Mtuwa Mlungu kapikanira luwa yakuyi na kuwatenda waweri na lwisi. 19 Elisha ndo kawagendera na kuwagambira, "Mwagamira agu ndo mjindiri yamgusakula mnfati naneni haniwajegi kwa yulii yamumsakula." Na yomberi kawalongoziya mpaka Samalia.

20 Katepu pawingiriti kumji, Elisha kaluwa, pakalonga, "Gwee Mtuwa Mlungu, guwagubutuli masu su waloli." Mtuwa Mlungu kapikanira luwa yakuyi, kawagubutula masu. Na womberi waliwona wa pakati pa mji gwa Samalia.

21 Mfalumi gwa Israeli pakawawoniti Waaramu, kamkosiya Elisha, "Mtuwa hashi, niwalagi?"

22 Elisha kankula, "Ndala, naguwalaga, toziya gwenga guwabatitindiri kwa ligumba lyaku. Guwapanani shiboga na mashi waliyi na kulanda shakapanu guwaleki wawuyi kwa mtuwa gwawu." 23 Mfalumi gwa Israeli kawatendera msambu mkulu, pawamaliriti kuliya na kulanda, kawawuziya kwa mtuwa gwawu. Kulawa shaka ashi, Waaramu wayikomitikayindiri isi ya Israeli kwa shaka shitangala.

24 Shakapanu, mfalumi Beni Hadadi gwa Aramu kajojonira lishonta lyakuyi lyoseri kalawa na kuguzyengeta mji gwa Samaliya. 25 Shitwatira ashi shijegiti njala nkulu kumji gwa Samalia. Mtuwi gwa punda shishuuzwa kwa beyi vipandi selasini vya feza na gramu miya mbili za mapimba ga ng'unda gashuuzitwi vipandi vya mhanu vya feza.

26 Lishaka limu mfalumi gwa Israeli pakaweriti kankutyanga pampandi pa shibambasa sha mji, kapikanira mdala yumu pakamshema, "Guntangi, gwee mtuwa gwangu mfalumi!"

27 Mfalumi kamgambira, "Mtuwa Mlungu pakakutangandiri neni hawezihashi kukutanga? Hashi nana shiboga ama divayi yakukupanana gwenga? 28 Ntabiku yaku ndo shishi?"

Kamwankula, "Mashana mdala ayu kang'ambiriti tumliyi mwana gwangu na Shirawu yakuyi tumliyi mwana gwakuyi. 29 Tumtereka mwana gwangu, tumliya. Shirawu yakuyi nimgambira tumliyi mwana gwakuyi, kumbiti kaweriti kamfifa!"

30 Katepu mfalumi pakapikaniriti visoweru vya mdala ayu kapapuliti nguwu zakuyi kwa hinginika na wantu yawaweriti pakwegera na shibambaza wawoniti handa kaweriti kavala nguwu ya liguniya mngati mwakuyi. 31 Na yomberi kalonga, "Mlungu kandagi, Handa Elisha mwana gwa Shafati pakadumuluwandiri mtuyi leru!" 32 Ndo kamtuma mlagilagi kugenda kumjega Elisha.

Shaka ashi Elisha kaweriti ukaya pamuhera na wazewi yawamtyangiriti. Pamberi pa mlagilagi gwa mfalumi kusoka, Elisha kawagambira wazewi, "Mlaga ulii kamtuma muntu kizi kundumula mtuyi! Pakasoka panu, mtati ligomi, nammuleka kingiri. Viraa mtuwa gwakuyi kankumfata kumbeli." 33 Pamberi ata hakenimaliri kutakula, mfalumi kasoka, nakulonga, "Mirandu ayi idoda ilawa kwa Mtuwa Mlungu! Ntambu gaa nendereyi kumuhepera Mtuwa kantangi?"