1 Su, mdala yumu muwawu mwa wadala wa wambuyi wa Mlungu wamgendera Elisha, kamgambira, "Ntumintumi gwaku, mpalu gwangu kahowa na ntambu yaguvimana, kaweriti kampanana nentu ligoya Mlungu, kumbiti yakaweriti kamwazimira senti kiza kuwatola wanawangu wawili waweri wamanda wakuyi."

2 Elisha kamkosia, "Vinu nikutangi hashi? Gung'ambili shilii shaguwera nashi ukaya." Mawu ayu mkenja kamwankula,

"Neni ntumintumi gwaku nahera shintu shoseri ila supa ndidini ya lipaki."

3 Elisha kamgambira, "Gugendi kwa wapakwegera waku kazimi vulu vyavyahera shintu vyagufira kupata. 4 Shakapanu gugendi, gwenga pamuhera na wanawaku, mlitatiri mngati mnumba na mwanji kumemiziya lipaki muvulu azi. Kila vulu yamumemiziya, mshituli pampeku."

5 Mkenja uli kagenda mnumba kulitatira mngati na wana wakuyi na kwanja kumintira lipaki muvulu. 6 Pavimemiti vintu vyoseri mkenja ulii kamgambira mwana gwakuyi yumu, "Gunjegeri vulu imonga." Mwana gwakuyi kamwankula, "Vyoseri vimema!" Panu lipaki lileka kunyililika. 7 Su mdala ayu kawuya kwa muntu gwa Mlungu na kumgambira shisoweru ashi. Na muntu gwa Mlungu kamgambira, "Gugendi gwakashuwuzi lipaki ali na kulipa uwanda waku, senti yayisigala mtenderi mwenga na wana waku."

8 Lishaka limu Elisha kagenditi Shunami, kweni kalikaliti mawu yumu mlunda. Mawu ayu kamshemera Elisha kushiboga na kwanjira lishaka lilii kila shaka Elisha pakagendi Shunemu kagenditi kuliya shiboga kwa mawu ayu. 9 Mawu ayu kamgambira mpalu gwakuyi, "Nahera lyoga na muntu ayu yakasokaga kwa twenga kila mala ndo mnanagala gwa Mlungu. 10 Su tumnyawili shumba shididini pagolofa pa numba yetu na aku tumtuliri shitanda na meza na shiti na lumuliku, su kashitenderi kila pakatutyangira."

11 Lishaka limu Elisha kiza aku na kakwena kushumba shilii su kwoyeri. 12 Kamlagalira ntumintumi gwakuyi Gehazi, "Gumshemi mawu ayu Mshunami." Pakamshemiti kiziti na kugoloka palongolu pa Gehazi. 13 Na Elisha kamgambira Gehazi, "Gumgambiri, tuwona ntambu yagututendiriti, vinu kafira tumtenderi mlandu gaa? Hashi, mekafiri kaluwilwi shoseri kwa mfalumi ama kwa mkulu gwa lishonta?" Mawu Mshunami kamwankula,

"Neni na wantu wangu twana kila shintu shatufira."

14 Elisha kalonga, "Su tumtenderi shishi?"

Gehazi kamwankula, "Nakaka kahera mwana na mpalu gwakuyi mzewi."

15 Elisha kamgambira, "Gumshemi kayi." Na yomberi kamshema. Kiza na kagoloka paligomi. 16 Elisha kamgambira, "shaka handa ashi shinja shashiza, haguweli na mwana mpalu." Mawu ayu kamwankula,

"Ndala, Mtuwa gwangu! Gwenga ndo muntu gwa Mlungu, nagumpayira neni ntumintumi gwaku!"

17 Kumbiti mdala ayu kapata yinda na kulera mwana shaka handa ashi shinja shashifatiti, ntambu yakamgambiriti Elisha.

18 Mwana ayu pakakuliti, kalawa lishaka limu pamuhera na tati gwakuyi, yakalilongoziyiti na wabenanga, 19 vumu mwana kamlilira tati gwakuyi, "Mtuwi guntama! Mtuwi guntama!" Tati gwakuyi kamgambira ntumintumi gwakuyi yumu,

"Gumjegi kwa mawu gwakuyi." 20 Pakamsokiziyiti kwa mawu gwakuyi, kamkisira mwana gwakuyi mpaka paluwala, shakapanu kahowa. 21 Mawu gwakuyi kamjega na kumgonjeka pashitanda sha muntu gwa Mlungu, kalitata ligomi na kuwuka. 22 Shakapanu kamshema mpalu gwakuyi na kumgambira, "Gumpanani ntumintumi yumu na punda yumu, su nimgenderi kalongola Elisha muntu gwa Mlungu, shakapanu hambuyi."

23 Mpalu gwakuyi kamkosiya, "Ntambu gaa gufira kumwona leru? Leru ndo lishakandiri lya msambu gwa lyezi lya syayi pota lishaka lya kwoyera?" Mdala ulii kamwankula, "Nagulishera." 24 Mdala ayu kamyalika punda na kumgambira ntumintumi ayu gumtugiziyi, "Vinu gukamaliri, nakupungula kutuga mpaka panikugambira." 25 Su, kawuka, kagenda mpaka kulugongu lwa Karimeli pakaweriti Elisha muntu gwa Mlungu.

Muntu gwa Mlungu pakamwoniti kankwiza, kamgambira Gehazi ntumintumi gwakuyi, "Guloli, nimwona mdala uli Mshunami kankwiza, 26 Gutugi kalongola gukaliwoni na yomberi na kumgambira, gwakashina? Mpalu gwaku kakashina? Mwana kakashina?"

Na mdala kulawa Shunami kankula, "Twakashina." 27 Pakasokiti kulugongu kwa Elisha muntu wa Mlungu kamkola magulu na yomberi Gehazi kasegelera su kamwusiyi, kumbiti muntu gwa Mlungu kamgambira, "Gumleki, toziya kana utama nentu na Mtuwa Mlungu kang'ambirandiri shitwatira ashi."

28 Mawu ayu kamgambira, "Mtuwa gwangu, hashi, ndo nikuluwitindiri mwana? Neni nikugambiriti viraa nagumpayira?"

29 Elisha kamgabira Gehazi, "Gutoli luhonga lwa neni, guwuki ula vinu. Nagugoloka mnjira kumlamsiya muntu yoseri na muntu yoseri pakakulamsiya mnjira nagukawalira kuwuziya lamsiya. Gugendi longulongu mpaka ukaya na kutula luhonga lwa neni pampindi pa mwana."

30 Mdala ayu kamgambira Elisha, " Nilirapa nakaka hapeni nikuleki." Su Elisha kawuka na kulilonguziya na yomberi. 31 Gehazi kalongolera kulongolu na pakasokiti katula luhonga lwa Elisha pampindi pa sheni sha mwana, kumbiti kuwonekanandiri langaliru lyoseri lya ukomu. Kawuya na kuliwona na Elisha, kamgambira, "Mntemba kimukandiri."

32 Elisha pakasokiti, kingira gweka mushumba na kugawona mauti ga mntemba mshitanda. 33 Su, katata ligomi na kumluwa Mtuwa Mlungu. 34 Ndo kaligonjeka pampindi pa mwana, mlomu gwakuyi pampindi pa mlomu gwa mwana na masu gakuyi pampindi pa masu ga mwana na mawoku gakuyi pampindi pa mawoku ga mwana. Na pakaweriti kankutenda hangu, nshimba ya mwana yanja kupata livuki. 35 Elisha kagoloka na kugendagenda mushumba, shakapanu kawuya na kuligonjeka kayi panani pa mwana. Mwana katyamula mala saba, shakapanu katumula masu. 36 Elisha kamshema Gehazi na kumgambira, "Gumshemi mdala Mshunami ulii." Pakashemitwi Elisha kamgambira, "Gumtoli mwana gwaku." 37 Mdala ayu kasuntama palongolu pa Elisha agawu pakalonga mayagashiyi na kumtola mwana gwakuyi na kulawa kunja.

38 Elisha kawuya Giligali shaka muisi kuweriti na njala. Lishaka limu, pakaweriti kankufunda shipinga sha wambuyi wa Mlungu, kamgambira ntumintumi gwakuyi, "Gujereki shiwiga shikulu mumotu, guwatelekeri wambuyi wa Mlungu." 39 Yumu gwawu kagenda kulirambu kwapa likolu aku kawona mapukuyu ga muntundu kagapa na kugajega gavuwa ntambu yakaweziti kujega kagadumulanga na kugalekera mshiwiga pota kuvimana kuwera waliya ama waliyandiri. 40 Shiboga shipulwa. Kumbiti pawashilawaliriti wamlilira Elisha pawalonga, "Gwee muntu gwa Mlungu, shiboga ashi ashitulagi!" Na womberi wasinditi kushiliya. 41 Elisha kalagalira wamjegeri ubumu. Kajegelwa ubumu na yomberi kawutula mngati mu shiwiga na kulonga, "Vinu guwapanani shiboga walii." Washiliya na wambukandiri.

42 "Muntu yumu kulawa Baali Shalisha, kamjegera Elisha mabumunda kumi na mbili yaganyawitwi kwa shayiri yayiweriti ya kwanja kubena na mikunguwi miwisi ya nganu mlifafa. Elisha kamlagalira Gehazi kawapanani wantu waliyi." 43 Ntumintumi gwakuyi kalonga, "hapeni niwapanani toziya shiwatoshandiri wantu miya."

Elisha kalonga, "Guwapanani waliyi, toziya Mtuwa Mlungu kalonga handa pawaliya hawikuti na shimonga hashisigali." 44 Ntumintumi gwakuyi kawatandira shiboga, waliya woseri wikuta na shimonga shisigala, Mtuwa Mlungu ntambu yakalongiti.