1 Mushinja sha pili sha ukolamlima wa Yehoashi mwana gwa Yehoahazi aku Israeli, Amazia mwana gwa Yoashi mfalumi gwa Yuda kanjiti kokalamlima, 2 pakanjiti kukolamlima kaweriti na vinja ishilini na mhanu na yomberi kakolitimlima Yerusalemu kwa shaka sha vinja ishilini na tisa. Mawu gwakuyi kashemitwi Yehoadini kulawa Yerusalemu. 3 Katenditi maheri palongolu pa Mtuwa Mlungu, kumbiti kaweritindiri mwaminika nakamu ntambu yakaweriti mbuyi gwakuyi Dawudi. Su katenditi mirandu yoseri handa Yoashi tati gwakuyi. 4 Ata hangu pahala pa kuguwira kumigongu pahalibisiwandiri na wantu wendireyiti kutambikira na kutumiziya ubani pahala panu.

5 Katepu hera Amaziya pakaligangamaziyiti muukolamlima, kawalagiti wakulu yawamlagiti mfalumi Yoashi tati gwakuyi. 6 Kumbiti kawalagandiri wana wa walaga, ntambu yayilembitwi mu Shitabu sha Lagiru lya Musa, palii Mtuwa Mlungu kalonga, "Walela hawalaguwindiri toziya ya wana wawu na wana hapeni walaguwi toziya ya walela wawu, kumbuti kila muntu hakalagwi toziya ya vidoda vyakuyi mweni."

7 Amazia kawalagiti wamashonta wa Edomu elufi lirongu Mululalanda lya Munu, kagutoliti kwa makakala mji gwa Sela na kugushema Yekiteeli na hangu ndo ntambu yagushemwa mpaka vinu.

8 Shakapanu Amazia kawalagalira walagilagi kwa Yehoashi mwana gwa Yehoahazi, mwana gwa Yehu mfalumi gwa Israeli pakalonga, "Gwizi tulikomangi." 9 Kumbiti mfalumi Yehoashi kamwuzilira ulagilagi Amaziya mfalumi gwa Israeli, pakalonga, "Lishaka limu mmbigili gwa Lebanoni kagugambiriti mwelezi, gwa aku Lebanoni, gumheteri mhinga gwaku kwa mwana gwangu. Kumbiti nkanyama gwa kushitogolu kapita panu na kugutimbangatimbanga mmbigili agu. 10 Vinu gwenga Amazia guwakanga nakamu Waedomu, gulitumba. Gutosiwi na uweru waku, gwankulikali ukaya, ntambu gaa kulisakulira ntabika zyazifira kukwagamiziya gwenga gamweni pamuhera na wantu waku wa Yuda?"

11 Kumbiti Amazia kalisherandiri. Hangu Yehoashi mfalumi gwa Israeli kalawiti kuliwona sheni kwa sheni na Amazia kunkondu aku Beti Shemeshi, muisi ya Yuda. 12 Wamashonta wa Yuda wakankitwi na wamashonta wa Israeli na kila yumu kawuyiti ukaya kwakuyi. 13 Yehoashi mfalumi gwa Israeli kamlopoliti Amahazi mfalumi gwa Yuda, mwana gwa Yehoashi, mwana gwa Ahazia aku Beti Shemeshi, shakapanu kagugendera mji gwa Yerusalemu na kushibomola shibambaza shakuyi kulawa Ligomi lya Efraimu mpaka Ligomi lya Pambwega, utali wa pakwegera mita mia mbili. 14 Katoliti zahabu yoseri na madini ga feza, ata na vintu vyoseri vyaviweriti mu Hekalu na muluhanja lwa liboma, viraa katoliti lopola, shakapanu kawuya Samaria.

15 Matendu gamonga goseri ga Yehoashi, ugangamala wakuyi na nkondu ntambu yakalikomangiti na mfalumi Amazia gwa Yuda galembwa Muvitabu vya Maholu ga Wafalumi wa Israeli. 16 Yehoashi kahowiti, kafindirwa mumasembi ga shifalumi aku Samaria. Mwana gwakuyi, Yeruboamu kakolitimlima pahala pakuyi.

17 Amazia mwana gwa Yoashi mfalumi gwa Yuda kalikaliti vinja kumi na tanu pa mfalumi Yehoashi gwa Israeli kuhowa. 18 Matendu gamonga goseri ga Amazia galembwa Mushitabu sha Maholu ga Wafalumi wa Yuda.

19 Watenditi majimiranu ga bada kumlaga Amazia aku Yerusalemu, hangu katugiriti Lakishi, kumbiti walagaliriti wantu nakumlaga aku. 20 Mauti gakuyi gajegwa pampindi pa farasi na kufindirwa mumasembi ga shifalumi aku Yerusalemu mumji gwa Dawudi. 21 Shakapanu wantu woseri wa Yuda wamtola Uzia pakawera na vinja kumi na sita, wamlumikiti pahala pa Amazia tati gwakuyi 22 Pakahowiti kala tati gwakuyi, Uzia kagunyawa syayi mji gwa Elati na kuguwuziya Yuda.

23 Mushinja sha kumi na tanu sha ukolamlima wa Amazia mwana gwa Yoashi mfalumi gwa Yuda, Yeruboamu mwana gwa Yehoashi mfalumi gwa Israeli kanjiti kukolamlima aku Samaria, kakolamlima kwa vinja alubayini na moja. 24 Katenda makontola pamasu ga Mtuwa Mlungu kafata mfanu gwa mlongolera gwakuyi mfalumi Yeruboamu mwana gwa Nebati, yakawapotuziyiti wantu wa Israeli watenda vidoda. 25 Yomberi kawuziyiti mbaka zoseri za Israeli, kulawa libokera lya Hamati mpaka Bahari ya Araba. Hangu ntambu yakalongiti Mtuwa Mlungu kupitira ntumintumi gwakuyi Yona mwana gwa Amatayi, mbuyi gwa Mlungu, kulawa Gati Heferi.

26 Toziya Mtuwa Mlungu kawoniti ntabiku nkulu yawapatiti Waisraeli mana paweritindiri na muntu yoseri gwa kuwatanga. 27 Kumbiti Mtuwa Mlungu kaweritindiri kalonga handa hakayiyagamiziyi Israeli nakamu, hangu kawalopoliti kwa kupitira mfalumi Yeruboamu mwana gwa Yehoashi.

28 Matendu gamonga goseri ga Yeroboamu, nkondu yakalikomangiti kwa ugangamala na ntambu yakayilopoliti Damasiko na Hamati na kuyitenda iweri ya Israeli, goseri galembwa mu Shitabu sha Maholu ga Wafalumi wa Israeli. 29 Yeruboamu kahowiti na kufindirwa mumasembi ga shifalumi na mwana gwakuyi yawamshemiti Zekaria kakolamlima pahala pakuyi.