1 Naamani mkulu gwa lishonta lya mfalumi gwa Aramu kaweriti muntu kamanika yakafiritwi nentu na mtuwa gwakuyi, toziya kwa njira yakuyi Mtuwa Mlungu kayijegeriti isi ya Aramu ukanka. Kaweriti lishonta mgangamala, kumbiti kaweriti na ugumbula. 2 Munkondu yawaweriti wankulikomanga na Israeli, Waaramu waweriti wamtola mhinga yumu mdidini kulawa Israeli na yomberi kawera yaya gwa mdala gwa Naamani. 3 Lishaka limu kamgambira mdala gwa Naamani, "Kumbiti mtuwa gwangu mekagendi na kumwona yulii mbuyi gwa Mlungu yakawera Samalia! Mekamponiziyi ulweri wakuyi." 4 "Naamani pakapatiti visoweru avi, kagenda kwa mfalumi na kumgambira visoweru vya mwana ayu." 5 Mfalumi gwa Aramu kamgambira, "Hanimlembeli barua gumjegeri mfalumi gwa Israeli."

Su Naamani kawuka, agawu pakatola vipandi elufi selasini vya madini ga feza, vipandi elufi sita vya zahabu na nguwu lirongu za msambu. 6 Luhamba lwakalujegiti kwa mfalumi gwa Israeli, lulembitwi hangu, "Luhamba alu ndo lwa kummaniziya kwa gwenga mkulu gwaneni Naamani. Nfira gumponiziyi ulweli wakuyi awu."

7 Mfalumi gwa Israeli pakasomiti kala barua alu kapapula nguwu yakuyi na kulonga, "Ntambu gaa mfalumi Aramu kafira numponiziyi muntu ayu ugumbula wakuyi? Kalihola neni ndo Mlungu yakawera na uwezu wa kulaga ama kuzyukusiya? Su muvimani, handa muntu ayu kafira kunjegera ndewu."

8 Elisha, mbuyi gwa Mlungu, pakapatiti visoweru handa mfalumi gwa Israeli kapapulanga nguwu zakuyi, katumiti ulagilagi kwa mfalumi, kamkosiya, "Hashi gudeganga nguwu zaku? Gumjegi muntu ayu kwaneni, su kapati kuvimana handa kuna mbuyi gwa Mlungu Muisraeli!"

9 Naamani kagenda na farasi gwakuyi na mbutuka yakuyi yakukwega na nkanyama mpaka kuligomi lya Elisha. 10 Elisha kamtuma ntumintumi gwakuyi kamgambiri, "Gugendi gukogi mala saba kulushemba Yoridani na gwenga haguweli mkomu nakamu." 11 Kumbiti Naamu kakalala nentu, kagenda zakuyi pakalonga, "Niliholiti handa nakaka hakaniziri na kumluwa Mtuwa Mlungu, Mlungu gwakuyi na yomberi kapitiziyi mawoku gakuyi pahala palwala na kumponiziya! 12 Nshemba Abana na Faripari ya aku Damasiku ndo iherepandiri kuliku mishemba yoseri ya Israeli? Hashi, mewezi ndiri koga amu na kupona?" Kawuka na kuwuya ukaya, agawu pakakalala nentu.

13 Wantumintumi wakuyi wamgendera na kumgambira, "Mtuwa gwetu handa mbuyi gwa Mlungu mekakugambiri gutendi shitwatira tunga shikamala, hashi, megushitendindiri? Vinu, ndo kakugambira alihera, guligululi, su guponi!" 14 Su, Naamani kaselera kulushemba lya Yoridani kalidibiziya amu mala saba, ntambu yakalagaliritwi na Elisha mbuyi gwa Mlungu na yomberi kapona nakamu. Likuli lyakuyi liwera linama na liherepa handa ya mwana nonu. 15 Su Naamani kawuya kwa mbuyi gwa Mlungu pamuhera na wantu wakuyi, pakalonga, "Vinu nivimana handa kwahera Mlungu yoseri ila hera Mlungu gwa Israeli, shondi gwanki lifupu lya neni ntumintumi gwaku Naamani."

16 Elisha kankula, "Nilirapa nakaka hapeni nanki lifupu lyolyoti."

Naamani kamluwa, kumbiti Elisha kalema nakamu. 17 Naamani kalonga, "Payiwera gwanki mafupu ganeni, su shondi gumpanani ntumintumi gwaku litapaka lyaliweza kupapwa na punda wawili, toziya kwanjira leru neni *ntumintumi gwaku hapeni ndaviyi tambiku ya kulunguziwa pota tambiku za wamlungu wamonga ilahera kwa Mtuwa Mlungu. 18 Hangu nduwa Mtuwa Mlungu kandekiziyi panalikolerana na mfalumi gwaneni kugenda kumguwira mu Hekalu ya Rimoni mlungu gwa Aramu. Nduwa Mlungu kandekiziyi!"

19 Elisha kamgambira, "Gugendi kwa ponga." Naamani kagenda zakuyi.

Pakaweriti kankali kugenda kutali, 20 Gehazi, ntumintumi gwa Elisha mbuyi gwa Mlungu, kalitakuziya mumoyu, "Mtuwa gwangu kamlekeziya hera hangu Naamani Mwaramu kagendi pota kwanka shoseri shakajegiti. Nakaka hanimfati su kampanani shintu kulawa kwakuyi." 21 Su kawuka kumfata Naamani. Naamani pakamoniti muntu kankumfata, kasuluka mumbutuka mwakuyi kagenda kuliwona na yomberi. Su, kamkosiya, "Hashi, kwana ponga?"

22 Gehazi kankula, "Vitwatira vyoseri ndo teratera ilahera mtuwa gwaneni kandagalira nikugambiri handa vinu kampanana wantu wawili wa shipinga sha wambuyi wa Mlungu muisi ya Efraimu yanamigongu na yomberi mekefiri guwapanani vipandi elufi tatu vya feza na nguwu doti mbili za msambu."

23 Naamani kalonga, "Shondi gutoli vipandi elufi sita vya madini ga feza." Kamluwa Gehazi, shakapanu kamtawira mafungu mawili na kumpanana nguwu doti mbili za msambu, kawapanana wantumintumi wakuyi wawili muwamu mwa wantumintumi wawlii na kuwalagalira walilonguziyi na Gehazi. 24 Pawasokiti kulugongu pakalikaliti Elisha, Gehazi katola vintu kulawa kwa wantumintumi wa Naamani na kuvijega mngati, ukaya kwakuyi. Shakapanu kawalekiziya walii wantumintumi wagendi zawu na womberi wawuka.

25 Shakapanu Gehazi kingira ukaya kwa Elisha na kwanja kumtendera. Elisha kamkosiya,

"Gugenditi koshi?" Gehazi kankula, "Ng'endandiri pahala poseri."

26 Kumbiti Elisha kamgambira, "Hashi rohu yaneni iwerandiri pamuhera na gwenga shaka muntu yulii pakalawiti mumbutuka mwakuyi na kwiza kuliwona na gwenga? Hashi, ashi ndo shaka sha kwanka mpiya na nguwu, malambu ga mizyetuni na mizabibu, kondolu na ng'ombi ama wantumintumi wa shipalu na wa shidala? 27 Hangu ugumbula wa Naamani hawukukoli gwenga, na wiwuka waku mashaka goseri!"

Su, Gehazi kawukiti pakawera na ugumbula na likuli lyakuyi liweriti neru mbuwu.