1 Mfalumi Hezekia pakapikaniriti visoweru avi, kapapula nguwu yakuyi, kavala lifafa kingira mu Hekalu. 2 Kawalagalira Eliyakimu mkulu gwa liboma, Shebina yakaweriti mlemba gwakuyi na wazewi wa watambika, wamgenderi mbuyi Isaya mwana gwa Amozi, pawawera wavala nguwu za mafafa. 3 Na womberi wamgambira Isaya, Hezekia kalonga hangu, "Leru ndo lishaka lya kwinginika, lishaka lya kubeliziwa na lya kusoniziwa. Twenga tuwera gambira mawu yakafira kulera mwana, kumbiti kahera makakala ga kumlera. 4 Hangu Mtuwa Mlungu, Mlungu gwaku kapikaniriti visoweru vya mkulu gwa mashonta, mweni kalagalilwa na mfalumi gwa Ashuru, mtuwa gwakuyi, su kumwigira Mlungu yakawera mkomu na yomberi ndo Mtuwa Mlungu, Mlungu gwaku, hakakalipili visoweru vyakapikaniriti, hangu muwaluwi wantu yawasigaliti."

5 Su, wantumintumi awa wa mfalumi Hezekia pawasokiti kwa Isaya na pawamgambiriti kala, 6 su yomberi kawagambiriti, "Mmugambiri mtuwa gwenu handa, Mtuwa Mlungu kalonga hangu, nagutira toziya ya visoweru vyagupikaniriti, vyeni wantumintumi wa mfalumi gwa Ashuru wavitakula kwa kunjongera. 7 Guloli hanimtendi mfalumi kapikaniri visoweru vyanavimtendi kawuyi ukaya kwakuyi, shakapanu aku hanimtendi kalaguwi kwa ligumba."

8 Shakapanu mkulu gwa lishonta ulii pakapikiniliti handa mfalumi gwa Ashuru kaweriti kawuka Lakishi. Kawukiti na kumwona pakagukomanga mji gwa Libina. 9 "Shakapanu mfalumi pakapikaniriti handa Tirihaka mfalumi gwa Kushi, kakwiza kulikomanga na yomberi, katumiti walagilagi kwa Hezekia, pakalonga," 10 "Mmugambiri Hezekia mfalumi gwa Yuda, nagumjimira Mlungu gwaku yagumtumbira kakupayiri kwa kukugambira handa mji gwa Yerusalemu hapeni gulopolwi na mfalumi gwa Ashuru. 11 Gwenga gupikanira kala handa wafalumi wa Ashuru ntambu yawazitenditi isi zimonga na kuzihalibisiya nakamu. Hashi, gulihola gwenga haguponeki? 12 Hashi, wamlungu wa wantu yawawera Gozani na Harani na Resefu na Waedeni yawalikaliti Telasari, wantu weni wambuyi waneni wawagamiziyiti? 13 Wakoshi wafalumi wa Hamati na Aripadi na Sefarivaimu na Hena na wa Iva?"

14 Mfalumi Hezekia kankiti luwamba kulawa kwa walagilagi na kulubetula. Shakapanu kagenda na kwingira mu Hekalu na yomberi kalutula palongolu pa Mtuwa Mlungu. 15 Shakapanu kamluwa Mtuwa Mlungu pakalonga, "Gwee Mlungu, Mlungu wa Israeli, yagulikala mushiti cha shifalumi pakati pa makerubi, ndo gwenga hera yaguwera Mlungu, yagukolamlima falumi zoseri za pasipanu. Gwenga gunyawiti isi na mpindi. 16 Gwee Mtuwa Mlungu, gugubatuli masu gaku guloli, guyambiki likutu lyaku, gupikanili visoweru vya Senakeribu kakwigira gwenga Mlungu yaguweri mkomu. 17 Gwee Mtuwa Mlungu, tuvimana handa wafalumi wa Ashuru wahowiziya wantu na isi zawu. 18 Wasa wamlungu wawu mumotu toziya waweritindiri wamlungu wa nakaka, ila vinyagu vya mitera na mabuwi yavisongolitwi na mawoku ga wantu. 19 Vinu, gwee Mtuwa Mlungu, Mlungu gwa twenga, nikuluwa gutulopoli kulawa kwa Senakeribu, wafalumi woseri wa pasi panu wavimani handa ndo gwenga gweka yaku, gwee Mtuwa Mlungu, yaguwera Mlungu."

20 "Shakapanu Isaya mwana gwa Amozi katuma ulagilagi kwa mfalumi Hezekia, pakalonga, hangu ndo ntambu yakalonga Mtuwa Mlungu, Mlungu wa Israeli, mpikinira luwa yaku kwaneni toziya ya Senakeribu mfalumi gwa Ashuru." 21 Shisoweru sha Mtuwa Mlungu shilonga hangu, "Mji gwa Yerusalemu gukuseka gwenga na Senakerubi kankukujongera gwenga. 22 Gaa, yagumtendera lidufiya na kumjongera? Gaa yagumbotera na kumlola dii? Pampindi pa mnanagala gwa Israeli! 23 Kwakuwalagalira walagilagi waku gumwigira Mtuwa Mlungu na gutakula, nana mbutuka zivuwa za nkondu, nkwena mpeleru zya vigongu mpaka upeleru wa Lebanoni. Ndumula mierezi yakuyi mitali na misonubali ihelepa ningira mpaka mngati mwakuyi na mngati mwa shitogolu shakuyi shikulu. 24 Mbawa manegu na kulanda mashi gashihenga yumiziyiti nshemba zoseri za Misri kwa nzayu za magulu gangu."

25 "Vinu Mtuwa Mlungu kalonga, Hashi, hagwenipikaniri handa mpangiti shitwatira ashi kwanjira mashaka gapititi? Shantenditi vinu mpangiti makashu. Nikutuliti gunyawi miji yana maboma kwa limamatiru lya numba za makashu. 26 Wantu wakuyi waheriti makakala, watwezuka na kusoniziwa, wawera gambira vimeru vya mumalambu, handa mihamba mitekiteki. Handa vimeru vyavimera pampindi pa shitwiku, yaviyuma pamberi pa kukula"

27 "Nivimana kulivaga kwaku na kwimuka kwaku na kwingira kwaku na mipangu yaku toziya ya neni. 28 Toziya gutenda mipangu kuusu neni na mpikanira mtiti gwaku, hantuli ndowani yangu mumbula mwaku. Na shimpingapinga shaneni mulomu mwaku. Hanikuwuziyi njira iraili yagwiziliti."

29 Shakapanu Isaya kamgambira mfalumi Hezekia, "Na ayi ndo hayiweli lilangaliru kwagwenga Hezekia. Shinja ashi na shinja shashiza hamliyi shashimera sheni pota kuyalwa. Kumbiti mushinja sha tatu hamyali na kubenanga viboga, hamyali mizabibu na kuliya mabwajubwaju gakuyi. 30 Walii wawafira kusigala mulukolu lwa Yuda hawongeleki na kuwera wavuwa handa mtera ntambu yagumera mumishigira yakuyi mlitapaka na kulera mabwajubwaju pampindi. 31 Mana hakuweri wantu yawasigala aku Yerusalemu na kulugongu Siyoni hakuweri wantu wavuwa ndiri wawaponeka, toziya Mlungu kafira kumalira aga"

32 "Mtuwa Mlungu kalonga hangu kuusu mfalumi gwa Waashuru. Hakingiri ndiri mji agu pota kuguguma msali ama kugwizira kwa lusegeyu na kuguzyengeta. 33 Hakawuyi kwa njira iraili yakiziriti na hapeni kingiri mji agu, ndo ntambu yakalonga Mtuwa Mlungu. 34 Yina, kwajili ya ligoya lyangu na toziya ya shilii shantakuliti kwa ntumintumi gwaneni Dawudi haniguloleli na kugulopola mji agu."

35 Su, pashiru panu ntumintumi gwa Mtuwa Mlungu kingiriti kulugonjeru lwa Waashuru na kuwalaga wantu laki yimu na semanini na mhanu. Wantu pawimukiti, wawonikiti wahowiti kala. 36 Shakapanu Senakeribu mfalumi gwa Ashuru kawukiti kagenda zakuyi na kulikala Ninawi. 37 Lishaka limu shaka Senakeribu pakaweriti kankuguwira munumba ya Nisiroki mlungu gwakuyi, wanawakuyi wawili, Adirameleki na Sharezeri wamlagiti kwa ligumba, shakapanu watugira muisi ya Ararati. Na Esarihadoni, mwana gwakuyi kakolamlima pahala pakuyi.