1 Mushinja sha kumi na nani sha ukolamlima wa mfalumi Yehoshafati gwa Yuda, Yoramu mwana gwa Ahabu kanjiti kukolamlima Israeli, kakolitimlima kulawa Samalia kwa shaka sha vinja kumi na mbili. 2 Yoramu katenditi makontola palongolu pa Mtuwa Mlungu, kumbiti yomberi kaweritindiri mdoda handa tati gwakuyi Ahabu na mawu gwakuyi Yezibeli, toziya kabomola nakamu shindwalingu sha Baali yashinyawitwi na tati gwakuyi. 3 Ata hangu, Yoramu kalekandiri vidoda handa mfalumi Yeruboamu mwana gwa Nebati yakamlongoliriti, mweni ndo katenda vidoda na kuwatenda wantu wa Israeli watenda vidoda.

4 Mfalumi Mesha gwa Moabu kaweriti mfuga kondolu na kila shinja katozwa na mfalumi gwa Israeli, wanakondolu laki yimu na mibahira kulawa kondolu elufu yimu. 5 Kumbiti Ahabu pakahowiti, mfalumi gwa Moabu kamgalambukiti mfalumi gwa Israeli. 6 Hangu mfalumi Yoramu kawuka Samalia, kalijojonira lishonta lyoseri lya Israeli. 7 Katuma ulagilagi kwa mfalumi Yehoshafati gwa Yuda, kamgambira, "Mfalumi gwa Moabu kangalambuka. Hashi, hagulikolani naneni tulikomangi na yomberi?"

Mfalumi Yehoshafati kamwankula, "Nakala! Neni na gwenga ndo shintu shimu, wantu waneni ndo wa gwenga, farasi waneni ndo wa gwenga. 8 Hashi, hatuwakomangi kulawa uwega woshi?"

Yoramu kankula, "Tuwakomangi kulawa kushiwala sha Edomu."

9 Su, mfalumi Yoramu kawuka pamuhera na mfalumi gwa Yuda na mfalumi gwa Edomu. Pa mwanja gwa mashaka saba, mashi gawapelera. Wawerandiri na mashi kwa mashonta wawu pota kwa wankanyama wawu. 10 Panu mfalumi gwa Israeli kalonga, "Su tupera! Mtuwa Mlungu katujojonira twawoseri wafalumi watatu katutuli mmawoku mwa mfalumi gwa Moabu."

11 Mfalumi Yehoshafati kakosiya, "Hashi, kwahera mbuyi gwa Mtuwa Mlungu yoseri panu mweni tuweza kumkosiya shakutenda kwa Mtuwa Mlungu?"

Ntumintumi yumu gwa mfalumi Yoramu gwa Israeli kankula, "Elisha mwana gwa Shafati kapanu. Yomberi kaweriti ntuminmtumi gwapakwegera gwa Eliya."

12 Yehoshafati kalonga, "Ayu ndo mbuyi gwa Mlungu gwa nakaka." Shakapanu wafalumi awa watatu wamgendera Elisha.

13 Elisha kamkosiya mfalumi gwa Israeli, "Hashi neni nikutangi gwenga? Gugendi gwakawaluwi shakutenda wambuyi wa Mlungu weni tati gwaku na mawu gwaku wawagendiriti." Mfalumi gwa Israeli kankula,

"Ndala!" Joramu kamwankula, "Mtuwa Mlungu ndo yakatushemiti twenga wafalumi watatu twizi su mfalumi gwa Moabu katubati."

14 Elisha kalonga, "Ntambu yakalikala Mtuwa Mlungu yakana likakala mweni neni nankumtendera, nilirapa handa meyiwerindiri kwa ligoya lyaweranali kwa ganja gwaku mfalumi Yehoshafati gwa Yuda, meniwapikinilindiri ata shididini. 15 Kumbiti vinu mnjegeri mgomba shinanda,"

Wamjega mgomba shinanda na pakaweriti kankugomba shinanda, likakala lya Mlungu limwizira Elisha, 16 Kalonga, "Mtuwa Mlungu kalonga hangu, mubawi malindi kila pahala kululalanda. 17 Mtuwa Mlungu kalonga tembera hapeni muwoni lyega pota mvula, lulalanda halumemi mashi na mwenga hamlandi, mwenga pamuhera na wang'ombi wenu na wakanyama wenu. 18 Kumbiti ashi ndo shitwatira shikamalandiri kwa Mtuwa Mlungu, yomberi hakawapananeni, viraa ukanka kuusu Moabu. 19 Hamgukanki kila mji mkulu na kila mji guherepa, hamyidumuli mitera yawu yoseri, hamdiwi mbwiru zoseri za mashi na kugahalibisiya malambu gawu goseri gana mota kwa kugamemiziya mabuwi."

20 Shirawu yakuyi mandawira, shaka sha kulaviya malaviwu, vumu mashi ganyililika kulawa uwega wa Edomu na kwiza kila pahala kululalanda.

21 Wamowabu pawapatiti shisoweru handa wafalumi watatu awa wiza kuwakomanga womberi, wantu woseri yawaweza kulikomanga kwanjira wantemba mpaka wazewi, washemitwi, kila muntu kakola shintu sha kulikomangira na kutulwa mumpaka kala kwa nkondu. 22 Pawimukiti mandawira yakuyi, mshenji guweriti gumetameta pampindi pa mashi Wamoabu yawaweriti uwega wa pili, pawagaloliti gawoneka kuwera masheri handa mwazi. 23 Walonga, "Agu ndo mwazi! Nakaka wafalumi watatu awa walikomanga weni kwa weni na kulaguwa! Tugendeni twakatoli lopola!"

24 Kumbiti pawasokiti mulugonjeru lwa Israeli, wantu wa Israeli wawakomangiti na womberi watuga isi. Wantu wa Israeli wawafata mpaka Moabu agawu pawawalaga, 25 na kuyibomola miji yawu. Kila pawapititi palirambu liherepa, kila muntu kadankiliti libuwi mpaka kila lirambu limema mabuwi, ntambu iraayi wadiwa mbwiru zoseri za mashi na kudumula mitera yoseri iherepa. Shakapanu, gusigala mji mkulu gwa Kiri Hereseti gweka yakuyi, gweni viraa waguma luhemberu waguzyengeta na kugulopola.

26 Mfalumi gwa Moabu pakawoniti handa nkondu imgendela werindiri, kawatoliti wantu wakuyi miya saba wakulikomanga kwa magumba, kafiliti kupena mashonta ga wankondu wakuyi kupitira kwa mfalumi gwa Edomu, kumbiti kasinda. 27 Panu kamtola mwana gwakuyi gwa kwanja ndo mekaweri mfalumi pahala pakuyi, kamlaviya kaweri tambiku ya kulunguziwa pampindi pa shibambaza sha mji. Wantu wa Israeli pawawoniti aga, wakalaziwa nentu. Waguleka mji agu na kuwuya muisi yawu.