1 Manase kaweriti na vinja lirongu na mbili pakanjiti kukolamlima Yuda, kakolamlima kulawa Yerusalemu kwa shaka sha vinja amusini na mhanu. Litawu lya mawu wakuyi liweriti Hepiziba. 2 Manase katenditi madoda kulongolu kwa Mtuwa Mlungu kwa kujera migenderanu mikontola ya maisi geni gawingitwi na Mtuwa Mlungu shaka sha wantu wakuyi Waisraeli pawaweriti wankwingira muisi. 3 Toziya kanyawiti kayi pahala pa kuguwira wamlungu wamonga, papahalibisiyitwi na Hezekiya tati gwakuyi, kanyawa vitalawanda vya kuguwira Baali na kunyawa shinyagu sha Ashera, ntambu yakatenditi Ahabu mfalumi gwa Israeli. Manase kaguwiriti na kuvitendera vintu vyoseri vya kumpindi. 4 Kanyawiti vitalawanda vya kuwaguwira wamlungu mu Hekalu pahala peni Mtuwa Mlungu kaweriti kalonga, "Hawanguwiri neni mu Yerusalemu." 5 Mumiwaga miwili ya Hekalu kanyawiti shitalawanda sha kuguwira vintu vyaviwera kulyera. 6 Kamlaviya mwana gwakuyi kuwera tambiku ya kulunguziya. Katungiti na kupuguwa pakawera pamuhera na watunga na mahoka na wahawi. Katenditi makontola gavuwa kulongolu kwa Mtuwa Mlungu na kamkalaliziya. 7 Shinyagu sha Ashera shakanyawiti kashitula mu Hekalu lyeni Mtuwa Mlungu kayiyoweleriti palongolu pa Dawudi na mwana gwakuyi Selemani. "Munumba ayi ya Yerusalemu, yaniyisyaguliti ndo pahala pakunguwira mileri. 8 Handa Waisraeli hawajimiri kutenda goseri ganiwagambiriti na kufata lagiru lyoseri ntumintumi gwaneni Musa zyakawapananiti, su hapeni niwaleki wawingwi kulawa muisi ayi yeni niwapananiti wambuyi wawu." 9 Kumbiti wapikinirandiri na Manase kawatenda watendi vidoda vikulu nentu kuliku virii vyavitenditwi na maisi geni Mtuwa Mlungu kagahalibisiyiti kulongolu kwa Waisraeli.

10 Mtuwa Mlungu kalongiti, kupitira kwa wantumintumi wakuyi wambuyi, 11 "Toziya Mfalumi Manase katenda mirandu ya kukalaziya, mirandu idoda nentu ya galii yagatenditwi na Waamori yawamlongoleriti, kawatenda wantu wa Yuda watendi viraa vidoda kwa kutendera vinyagu vyakuyi, 12 Su, vinu neni Mtuwa Mlungu, Mlungu gwa Israeli, hanjegi mji gwa Yerusalemu na isi ya Yuda, shiwembu sheni ata yoseri yanakapikaniri hakasintuki. 13 Haniyikomangi Yerusalemu ntambu ilii yantenditi Samariya na ntambu yanimtenditi mfalumi Ahabu na wiwuka wakuyi. Haniyifuti Yerusalemu handa muntu ntambu yakafuta sahani yayigululitwi na kuseniziwa. 14 Haniwaleki wantu wangu yawasigaliti na haniwatendi wankondu wawu wawakomangi na kuwatola lopola na kupokwa isi yawu. 15 Haniwatendeli goseri aga toziya wang'alambuka na kunkalaliziya kwanjira wazewi wawu pawalawiti Misri mpaka leru."

16 Nentu ya aga, paguleka vidoda vyakuyi, Manase kawatenditi wantu wa Yuda watendi vidoda palongolu pa Mtuwa Mlungu, vilavirii kawalagiti wantu wavuwa wahera likosa, mwazi gwawu gunyiririka kulawa uwega wumu wa mji mpaka uwega umonga wa mji gwa Yerusalemu.

17 Mirandu imonga ya Manase pamuhera na vidoda vyakuyi vyoseri, vilembwa mu Shitabu sha Maholu ga wafalumi wa Yuda. 18 Manase kahowiti na kufintilwa mushiwunga sha liboma lyakuyi, shinyawitwi na Uza. Na Amoni mwana gwakuyi kakolamlima pahala pakuyi.

19 Amoni kaweriti na vinja ishilini na mbili pakanjiti kukolamlima, kakolitimlima vinja viwili aku Yerusalemu. Mawu gwakuyi kashemitwi Meshulemeti, mhinga Haruzi kulawa Yotiba. 20 Katenditi makontola kulongolu kwa Mtuwa Mlungu, ntambu yakatenditi Manase tati gwakuyi. 21 Kafatiti njira yoseri yakayigendiriti tati gwakuyi na kuvitendera vinyagu vyeni tati gwakuyi kavitendiriti na kuviguwira. 22 Kamlemiti kujimira malagaliru ga Mtuwa Mlungu, Mlungu gwa wambuyi wakuyi.

23 Shakapanu wantumintumi wa Amoni watenditi mpangu gwa kumlaga Amoni muliboma lyakuyi. 24 Kumbiti wantu wa Yuda wawalaga wantu woseri yawamlagiti Amoni. Shakapanu wamlumika Yosia mwana gwakuyi pahala pakuyi.

25 Mirandu yoseri ya Amoni ilembwa mu Shitabu sha Maholu ga Wafalumi wa Yuda. 26 Amoni kafintirwa mulisembi lyaliweriti mushiwunga sha Uza, shakapanu Yosia mwana gwakuyi kakolitimlima pahala pakuyi.