Mateus 14

Yesu anguvapela chilyo vanu kulutila elufu tsihanu

13 Yesu hoavaga kuhulika ndongwa tso tsamupasile Yohana akakwinaje mutumbwi na kuwuka, akabitaje hono ho haduhu munu yoyuve. Lechelelo vanu hovavaga kutsela vakahumaje ku miji jawo kwa magulu vakakolaje mulubali lwa lulenga kubita hono hoavaga Yesu. 14 Yesu hoavaga kwika mu mutumbwi akavawonaje vanu wolofu, akawawonelaje lusungu, ihyo akavaponetsaje namwa tsawo. 15 Hoyavaga kufika mumihe vadahitswa vake vakamufwataje na kumulonjela Yesu, "Hono hano hali mbuga ng’ani na litsuva lihele, lelo uvalaje vanu iva vabite vakigulile chilyo ili valye." 16 Yesu akavalonjelaje, "Sivan’ganika kuwuka, lechelelo mun’ganika henye muvapele filyo." 17 Vene vakamulonjelaje, "Hano hogali mabumunda gahanu na somba tsivili hela." 18 Yesu akavalonjelaje, "Mundetele hano." 19 Akavalonjelaje vanu vikale hasi mu misoli, Yesu akategulaje gala mabumunda gahanu na tsila somba tsivili, akagalamaje Kilanga na kumulumba Mulungu. Kaha akamegasaje gala mabumunda na somba tsila na kuvapela vadahitswa vake, nawo vakavapelaje vanu. 20 Vanu veka vakalyaje na kwiguta. Hambele vadahitswa vakaholaje filyo fyo fisije na fikamemaje fitangula kumi na fivili. 21 Vanu veka wovalyeye vavaga vafisile valume elufu tsihanu bila kuvavala vadala na vana.