MATAYO 14

Yesu an’jnda mwilanga mwa malenga

22 Luvalalulo Yesu akavalajitsaje vadahitswa vake vakwine mu mutumbwi kulongola kubita kumwambu gwa lilamba hala mwene hoavaga anguvalaga vanu. 23 Yesu hoavaga kusinda kuvalaga vanu akakwinaje kuchidunda kumusuka Mulungu. Akavaje kuko aliyeka mbaka chilo chikafikaje. 24 Chipindi icho mutumbwi gwavaga habehi na hagati na gati ha lilamba kuno gun’yugayuga kwasawuli ya mavimbi na ng’ala ngomi.

25 Hokwavaga kufika hachilo cha kuvika ntsogolo, Yesu akabitaje kwa vadahitswa vake kuno an’jnda mwilanga mwa malenga. 26 Vadahitswa vake ho vavaga kumuwona Yesu an’jenda mwilanga mwa malenga, vakavaje na muhwehwe vakatijilaje kuta, "Ilino Lilayika, vakantsaje kukola kwa muloto." 27 Lechelelo Yesu akavalonjelaje, "Mwikangatse muleche kuva na muloto, yo heni." 28 Petulo akamulonjelaje, "Mutwa, manyi yo heve undajitse ntsitse kwa heve kuno ntsin’jenda mwilanga mwa malenga." 29 Yesu akamulonjelaje, "Ale! Utse." Ihyo Petulo akikaje mu mutumbwi na kujenda mwilanga mwa malenga na kubita kwa Yesu. 30 Lechelelo Petulo hoavaga kuyiwona yila ng’ala ngomi akavaje na muloto, akantsaje kudidimila mu malenga. Akakolaje kuta, "Mutwa ung’uluse!" 31 Luvalalulo Yesu akagololaje liwoko lyake akamubataje na kumulonjela, "Heve munya litumbilo lidodo kwasawuli ya chichi wawene muhwehwe?" 32 Kahi Yesu na Petulo vakakwinasaje mu mtumbwi na ng’ala yila yikakatukaje. 33 Vadahitswa veka wo vavaga mu mutumbwi vakafugamaje na kumuhonamila Yesu na kumulonjela kuta, "Wukweli heve uli mwana va Mulungu."