MATAYO 25

Wuhigo wa wudugo

31 Yesu akalongaje kuta, "Luvala lo akutsa Mwana va Munu kota Muntsajila hamwe na vatantsi veka va kilanga va Mulungu, iho ho akikala mwilanga mu chigoda chake cha Wuntsajila kuno mwene yo Muntsajila. 32 Vanu va inyi tseka vakukong’ana halutalo hake, nayo akuvabagula kota hila mudimi fyo atsibagulaga ng’olo na mene. 33 Akutsivika ng’olo kulubali lwake lwa kwililo na mene akutsivika kulubali lwake lwa kwichiji. 34 Iho ho Mutwa akuvalonjela vala yovali lubali lwake lwa kwililo kuta, Mutse henye yo mutambichilwe na Dada vangu, muwuhale wuntsajila wo wavisilwe kwasawuli yenyu kuhuma hala inyi hoyavaga ying’acha kuwumbwa. 35 Kwasawuli hontsavaga na ntsala henye mwamelye chilyo, hontsavaga na ng’alu mwamelye malenga ntsang’weye, na hontsavaga ntsi mujentsi mwandibulitse. 36 Hala hontsavaga ntsilihela myenda mwafwisile myenda, na hontsavaga ntsimutamwa mwanamise, na hontsavaga mu nyumba ya wuwopwa mwatsitse kunjendela. 37 Ihyo vala wo van’dita kota fyo an’gana Mulungu ho vakumujibula muntsajila kuta, Mutwa, hanili twakuwene una ntsala na kukupela chilyo, na hanili howavaga na ng’alu twakupelye malenga? 38 Hanili hotukakuwene uli mujentsi na twakulibulitse, awu hanili howavaga ulihela mwenda tukakufwikaje? 39 Hanili hotukakuwene uli mutamwa tukakutamisaje, awu hanili howavaga muwopwa tukatsaje kukujendela? 40 Yula Mutwa akuvajibula, Ntsinguvalonjelani wukweli kuta, chila chinu cho mwamuditye yumwe va vang’olotsangu wo vam’bedalwa, mwanditye heni."

41 "Kaha akuvalonjela vala vanu wovali lubali lwake lwa kwichiji, Muheje halutalo hangu henye yo mukotwiche! Mubite ku moto gwa siku tseka go sigutsimikaga, go gwavisilwe kwasawuli ya Lihoka hamwe na vatantsi vake. 42 Kwasawuli ntsali na ntsala henye simwamelye chilyo, kaha ntsali na ng’alu henye simwamelye malenga, 43 hala hontsali mujentsi simwandibulitse, kaha hotsavaga mutamwa henye simwanamise, na ntsali mu muwopwa henye simwatsitse kunjendela."

44 "Ihyo nawo vakumujibula, Mutwa, hanili ho tukakuwene una ntsala, awu una ng’alu awu wuli mujentsi, awu ulihela myenda, awu mutamwa, awu uli mu wuwopwa, hetwe situkatsitse kukutanga?" 45 "Nayo akuvalonjela, Ntsinguvalonjela wukweli kuta, hila fyo mwalemile kumuditila ndongwa itso yumwe va vala yo vabedalwaga, mwalemile kunditila heni. 46 Ihyo iwo vakudibulwa ku ng’odeko ya siku tseka tso tsigaya wudugo, lechelelo vala wo vadisile kota fyo an’gana Mulungu vakubita mu wumi wo wugaya wudugo."