1 Ahab obisuɔtɔbi, Yoram labale Israel ɔka di Samaria, di Yuda ɔka Yehosafat lefosi lɛlɛɛ nɛnle kamɛ. Yoram lale sɛka lefosi alɛɛ anyɔ. 2 Aabla okpile di SAATE nwu anu, kafɔɔ ditale fɛ mmle di ote ku ɔya labla nii. Aakpa Baal kasumu difuɔ le di ote lase nii. 3 Kafɔɔ atadiɛ nya ɔtɔ̀, ni aabla sikpile se di Nebat obisuɔtɔbi, Yeroboam labla nii, aata alɛ Israel kafɔɔ labla sĩ nii.

4 Moab ɔka Mesa lase bafoso, ni aata Israel ɔka afosobi nkpe kɔlafa ku akunumuu nkpe kɔlafa sinwini nɛ. 5 Kafɔɔ di Ahab lakpi ni sɛmaa, Moab ɔka lataka di Israel ɔka suoto. 6 Nioso di obe nwu kamɛ Ɔka Yoram ladie di Samaria aalaasiisa Israel omuu. 7 Ni aata kafɔɔ Yuda ɔka Yehosafat kanya ka mmle alɛ: "Moab ɔka ntɔɔtaka di suoto nii. Fabatikankoe munaakpɛko Moab?"

Ni di Yuda ɔka ladiki kanya alɛ, "Kamatikanko fɔ, nte fɛ mmle fate nii, batii nii fɛ batii lɛfɔ, bapɔnkɔ nii fɛ bapɔnkɔ lɛfɔ."

8 Ni aakaalɛ alɛ, "Ɔmɛnsuku suoto bubadieko ma?"

Ni di ɔka Yoram ladiki kanya alɛ, "Diefe ni di Edom Ɔfaafuu kamɛ."

9 Nioso Israel ɔka ladie ku Yuda ɔka ku Edom ɔka. Baakyɛ baakyi, ni di ayi akuɛnsĩ kamaa, bakpɛtɛ nwu ditasinwɛ ntu baata suoto lɛma ee baata babɔkɛɛ ba di ɔkyɛ lɛma nɛ.

10 Ni di Israel ɔka lafaa aabuɛ alɛ, "Obeeye! Ɔlɛɛ ko di SAATE nwu lɛlɛɛ baka loo batiɛ nwu eesiisa alɛ ɔɔyɔ wo ankpee di Moab nnɛɛ?"

11 Kafɔɔ Yehosafat lakaalɛ alɛ, "SAATE nwu ɔlaabuɛtɛtɛ kuonwii nnaa ninfũ, alɛ buawolaa ni kamɛ di SAATE nwu nfũ munkyeko ni ɔkyɛ nɔɔ?"

Ninfɛ di Israel ɔka ɔnɔɔfotii onwii ladiki kanya alɛ, "Safat obisuɔtɔbi, Elisa nkpe ninfũ. Nnwɔɔ niatookpete ntu di Eliya*3.11 Eliya omu kpɛmblatɛ aale nnɛɛ nɛ."

12 Ni di Yehosafat labuɛ alɛ, "SAATE nwu ɔlaa nkpe di ɔkyɛ nɔɔ." Nioso Israel ɔka ku Yehosafat ku Edom ɔka lasoo baakyɛ Elisa nfũ.

13 Ninfɛ di Elisa latɔkɔ Israel ɔka alɛ, "Obe mumbla munta baawo? Tɔɔkyɛ teefɔ ɔlaababuɛtɛtɛ ku yaafɔ ɔlaababuɛtɛtɛ nfũ."

Ni di Israel ɔka ladiki kanya alɛ, "Oowo, diekye SAATE nwu nialɛɛ baka loo batiɛ aasiisa, aayɔ wo aakpee di Moab nnɛɛ."

14 Ninfɛ di Elisa labuɛ alɛ, "Nwaako di SAATE wɔ Ninlenke ni lɛnya akpe ni nkpa, nnwɔ kosumu nii, ninanle fɛ dibu nkpe lɛta Yuda ɔka Yehosafat di anu nɔɔ yi, nse ntaanyu fɔ ee bia ntofo fɔ. 15 Kafɔɔ kanunua wakoe kyitaapɛtɛ."

Obe wɔ di kyitaapɛtɛ latɔɔpɛ nii, SAATE nwu kɔnɛɛ labatika di Elisa suoto, 16 ni aabuɛ alɛ, "Nnya ɔlaa wɔ di SAATE nwu kobuɛ ni alɛ: Bibɛ sekplo biyiisa ɔtaata wɔ mmle. 17 Diekye nnya ɔlaa wɔ di SAATE nwu kobuɛ ni: Bilɔbanya kɔfɛɛfɔ ee kanto, kafɔɔ ɔtaata wɔ mmle kamayii ku ntu, ni aye, banankyue ku babɔkɛɛ bamba lee kamanyi ntu nwu. 18 Nle mmle nle lɛsaa le ninaa ni osie di SAATE nwu anu; abayɔ kafɔɔ Moab ankpee ye ninnɛɛ. 19 Bibalenkee okpoo kplɛ biala beetofo seyoyiɛ beekyisa ni ku okpoo finle biala. Bibabudi kowoso biene biala mintɛ kaasɔ, minsɔɔsa ntu ntaakɔ mmuu, minlalaasa kofe biene biala ku afuɔ."

20 Kaleesɛ oyita, di obe wɔ kamɛ manta ni oleɔta yi, nnya mi ninfa- ntu niakye Edom lɛkyɛ diabiɛ diatoofe! Ni di kasɔ nwu layii ku ntu nɛ.

21 Ninfɛ di Moab batii bamuu lanu alɛ baka ntɔɔwa ma ɔkpɛko nɛ; nioso baalɛɛ osuɔtɔ biala, babisɔ ku banɔɔfo, mba nikafuo ni akpɛsaa oklee, baalaayila di kɔmɛ kanya. 22 Obe wɔ baataka ni ku kolesɛtũ, baanya alɛ kufĩ latɔɔpɛ di ntu osi. Moab batii lanya ntu nwu di osuku nwu bɔmbɔ- fɛle ntɔ. 23 Ni baabuɛ alɛ, "Ntɔ dile! Loo baka niɛkpɛ beeloloo bawo nɛ. Nunua kakpɛ kamɛ asaa nwu nfɛ nle Moab ale!"

24 Kafɔɔ di Moab batii lawa ni Israel kasikɔ yi, ni di Israel batii lataka baakpɛ ma dialaase di obe wɔ baatoso nii. Ninfɛ di Israel batii labuo di kasɔ nwu baaloloo Moab batii nɛ. 25 Israel batii lawɔɔsa sekpoo nwu, osuɔtɔ biala kafɔɔ lafuki difuɔ aakpee di kofe biene biala kamɛ dialaase di obe wɔ kuatĩi nii. Baata ntu ntaakɔ nwu mmuu labudi, baabudi kafɔɔ kowoso biene biala. Kir Hareset okpoo lete niabu di afuɔ ninwu late nii. Kafɔɔ basuɔtɔ ba niaklee ni afuɔbi ya beenii ni sikũ lamana nwu baakyi ni baakpɛko nnwu kafɔɔ nɛ.

26 Obe wɔ di Moab ɔka lanya alɛ batoolenkee nwɔ ni di kakpɛ nwu yi, ni aakpaa mpamii bakleetɛ alafa-akuɛnsĩ aakaasa di suoto nɔɔ alɛ bɔɔbɛ manfe di bakpɛtɛ nwu kamɛ mansifi Edom ɔka nfũ, kafɔɔ batafuo. 27 Ninfɛ di Moab ɔka lamufũ obisuɔtɔbi nɔɔ kasale wɔ nikale ni ɔka sɛɛmaa nɔɔ, aayɔ aata oleɔta di okpoo kplɛ nwu oyoyiɛ suoto nɛ. Ni di ɔblɔ lawa di Israel suoto osie kanya; baadiɛ kakpɛ, baakple baasifi kasɔ lɛma kamu nɛ.