Provérbios 9

Hawnaw te Ngaeenaw

1 Hawnaw nynh a kya-e

tung tungsari kha suee zah,

a inn kha a sakku vae.

2 A sarangpaw hae kha theih zah,

a misutui te a pyde vae,

a ccaboi kha mah a phae vae.

3 A ryalahtu nopi hae kha a saw vae hae,

khua lungkhu ahang huanaw hmin

kyate sia zah,

4 "Tuanaw a zya hae paw nanning,

hynhlang rang oh!" a ci.

Tuanaw a hoi lei hae paw kalan khe,

5 "Rang oh, ka sanlou hynh ae oh lah,

ka pyde vae paw misutui hynh neih oh.

6 Ngaeenaw kha cciataw oh lah,

hiin ccavae oh,

hawnaw laanpi kha zui oh," a ci.

Ahawpaw te Angaeepaw Laesahnaw

7 Ccungccaw a saryathyapaw kha

a thuiheipaw tuh

maethya a bongkuh cih;

ccungccaw hoyleipaw kha

a thuiheipaw tuh vaemaw a mue cih.

8 Ccungccaw a saryathyapaw kha

na thuihei zetuh,

hung ae huahan cih;

ccungccaw hawpaw kha

thuihei lah, ae sungsah cih.

9 Mihawpaw kha thuihei lah,

houh a haw cih;

midingpaw kha ccangpah lah,

thyanaw houh a mue cih.

10 Bawipaw rawrinaw tuh

hawnaw athotakawnaw nynh thua,

Athyaapaw Pachia kha nynaw tuh

akhupaw nynaw nynh thua.✝9.10: Job 28.28; Sam 111.10; Ptb 1.7

11 Pawccecize kamaw liate

na hiinshe asae cih zah,

na hiin kum kha

biachih pya na thua cih.

12 Na haw ze, namaw

thanenaw hanlan athua cih;

Ccungccaw na sarya ze,

tuh-e tuh na makhaete na teing cih.

Ngaeenaw nynh Kokunaw te Byakinpyakunaw

13 Angaeepaw nopi tuh a roi accae;

a tuanaw zya zah,

pawpaw mah nyh khyh.

14 A inn thuakaw kya a haung,

khua lungkhu ahangnaw hmin kya

umpaw haungnaw kyakhe a haung,

15 mih laanpi lawbabin lan

a cceih hae paw kha ko hae zah,

16 "Tuanaw a zya hae paw,

hynhlang rang oh!" a cipya hae.

Tuanaw a hoi lei hae paw kyakhe,

17 "Rupaw tui tuh e zah,

aruh lante aepaw sanlou tuh athua,"

a cipya hae.

18 Thuasalama tuin kyakhe

michi hae um hae zah,

a mikhia hae tuh akhupaw

michi khua kya nynh

a um hae cipaw kha

minmin nynh nyh khyh hae.