1 ओ सर्ग, मेरी तरफा खे त्यान दे,

ताकि आऊँ बोलूँ;

ओर ओ तरती,

मेरे मुंए रिया गल्ला सुण!

2 मेरा उपदेश बर्खा जेड़ा बरसणा

ओर मेरी गल्ला पाल़े जेड़िया टपकणियां,

जेड़ी अरे काओ पाँदे

रिमजिम बर्खा ओर

डाल़िया पाँदे बऊत बर्खा।

3 मां तो यहोवे रे

नाओं रा प्रचार करना।

तुसे आपणे परमेशरो री

महिमा खे मानो!

4 से चट्टान ए,

तेसरा काम खरा ए ओर

तेसरी सारिया बाटा न्याय रिया ए।

से सच्चा परमेशर ए,

तेसरे कोई खोट निए,

से तर्मी ओर सीदा ए।*

5 पर इस्राएली जातिया रे

लोक चूठे ए,

यो बिगड़ी गे रे,

यो आपणे कलंको रिया बजअ ते;

यहोवे रे माठे-बेटिया नि बणी सके।*

6 ओ मूर्ख ओर

निर्बुद्धि जातिया रे लोको, तुसे

यहोवे रे कामा रा ये बदला देओऐ;

क्या से तेरा बाओ निए,

जिने ताखे पछयाण दित्ती?

तिने तूँ बणाया

ओर स्थिर बी कित्तेया।

7 बीते रे दिना खे याद कर,

पीढ़ी-पीढ़िया रे

साला रे बारे दे सोचो ओर समजो;

आपणे बाओ ते पूछो

ओर तेस तुसा खे बताणा;

आपणे स्याणेया ते सवाल पूछो

ओर तिना तुसा खे बताणा।

8 जेबे परमपरदान परमेशरे

एकी-एकी जातिया खे तिना री

आपणी जमीना रा पाअग बांडी ता

ओर माणूं लग-लग बसाए,

तेबे तिने जातिया-जातिया रे

लोका रे बन्ने इस्राएलिया री

गिणतिया रे मुताबिक ठराए।*

9 कऊँकि यहोवे रा निज पाअग इस्राएल*,

तेसरी आपणी प्रजा ए;

याकूब तेसरा ठराया रा निज पाअग ए।

10 यहोवे से सुनसाण जगा रे,

सुनसाण ओर गरजणे वाल़ेया डांगरा ते

परी री बंजर जमीना रे पाया,

तिने से चऊँ कनारे ते

केरी की तेसरी देखपाल़ कित्ती

ओर आपणी आखी री पुतलिया

जेड़ा सम्बाल़ी की राखेया।

11 जिंयाँ उकाब पंछी आपणे

कोअले खे ईलाई-ईलाई की

आपणे बच्चेया खे ऊबे-ऊबे उड़ाओआ,

आपणे पंख फैलाई की तिना खे पकड़ोआ,

तिना खे आपणे पंखो पाँदे चकी लओआ।

12 तिंयाँ ई यहोवा कल्ला ई इस्राएलो री

अगुवाई करदा रया;

ओर तेस साथे कोई

पराया देवता नि था।

13 यहोवे तेसखे तरतिया री

ऊच्चिया-ऊच्चिया जगा रे

सवारी कराई ओर

ओर इस्राएलो खे

डोरूआ री फसल खुल़ाई,

यहोवे चट्टानी ते

सईत निकयाल़ी की तेसखे चटाया

ओर सख्त चट्टानी ते

तेल निकयाल़ी की चुसाया।

14 गायी रे दूदो रा दंईं,

ओर पेडा-बाकरिया रा दूद,

ओर मिन्टूआ री चर्बी,

बाकरे ओर बाशान जातिया रे खाडू;

ओर कणका रा खरे ते खरा

आटा बी तिने दित्तेया।

ओ इस्राएल, तूँ अंगूरा रा रस

पिया करेया था।

15 पर तूँ यशूरून* मोटा ऊई की

लाते बाणे लगेया;

तूँ मोटा ओर तगड़ा ऊईगा

ओर तेरे बदनो पाँदे चर्बी चढ़ी गी;

तेबे तैं परमेशर छाडीता,

जिने तूँ बणाया था,

ओर आपणे उद्धारो री चट्टानी साथे

मूर्खता रा बर्ताव कित्तेया।

16 इस्राएली लोके पराये देवतेया री

आराधना करी की यहोवा ईर्ष्या करने वाल़ा बणाया;

ओर नीच काम करी की

तेसरा गुस्सा पड़काया।

17 तिने पूत-प्रेता खे जो

परमेशर नि थे बलि चढ़ाए,

ओर तिना खे सेयो अणजाणे देवता थे,

सेयो तो नये-नये देवता थे

जो थोड़े ई दिना ते प्रगट ऊई रे थे,

ओर जिना ते तिना रे बुजुर्ग कदी डरे ई नि।*

18 जेसा चट्टानी ते तूँ पैदा ऊआ

तेसखे तूँ पूली गा ओर

जिने परमेशरे तूँ पैदा कित्तेया

तेसखे बी तूँ पूली गा रा।*

19 यहोवे ये देखेया कि तेसरे

माठे-बेटिये से चिढ़ाया

इजी खे यहोवे सेयो ठुकराई ते।

20 तेबे तिने बोलेया कि

मां तिना ते आपणा मूँ

लकोई देणा ओर

देखणा कि तिना रा

क्या अन्त ओआ,

कऊँकि एते जातिया रे लोक

बऊत टेडे ए ओर

तोखा देणे वाल़े पाऊ ए।*

21 तिने एड़ी चीजा मानी

की जो परमेशर नि थे,

मांदे ईर्ष्या पैदा कित्ती

ओर तिने आपणे देवतेया री

मूर्तिया रे जरीये आँऊ चिढ़ाया।

इजी री खातर मां बी

एड़े लोका रे जरीये जो चूणी

नि राखे तिना रे मनो रे

जल़न पैदा करनी;

ओर एक मूर्ख जातिया रे

जरीये सेयो चिढ़ाणा।*

22 कऊँकि मेरे कोपो री

आग पड़की गी री,

जो अधलोको री थाल़िया तक

बल़दी रणी

ओर तरती आपणी फसला समेत

स्वा ऊई जाणी ओर

पाह्ड़ा री निऊँआ रे बी

आग लगाई देणी।

23 मां तिना पाँदे

मुसीबता पाँदे मुसीबत पेजणी

ओर मां तिना पाँदे

आपणे सारे तीर छाडणे।

24 अकाल़ो सेयो तबाह करी देणे,

बऊत जादा गर्मिया ते

सेयो स्वा ऊई जाणे;

ओर बऊत बड़ी बमारिया

तिना खे लगी जाणिया;

ओर मां तिना रे

खलाफ बणो रे जानवर,

ओर तूड़ा रे लूरने वाल़े सापा रा

विष छाडी देणा।

25 बारे सेयो युद्धो रे तलवारी साथे

मरने ओर कअरो रे

पीतरे डरो साथे;

क्या कुआँरे, क्या कुआँरिया,

क्या दूद पींदा ऊआ बच्चा,

क्या स्याणे, सारे ईंयाँ ई

बर्बाद ऊई जाणे।

26 मैं बोलेया था कि

मां सेयो दूर देशो तक

तित्तर-बित्तर करी देणे,

ओर माणूंआ बीचा ते

तिना री याद तक मिटाई देणी।

27 पर माखे दुश्मणा री

छेड़-छाड़ा रा डर था,

एड़ा नि ओ कि तिना रे बैरी

तिजी खे उल्टा समजी

की ये बोलणे लगो कि

आसे आपणी बांयी री

तागती साथे जीते ओर

ये सब यहोवे नि कित्तेया।

28 कऊँकि इस्राएली जाति केसी री सला नि लंदी

ओर इना रे समज आई ई नि।

29 पला ऊँदा कि

यो अक्लमंद ऊँदे,

ताकि इजी खे समजी लंदे

ओर आपणे अन्तो रे

बारे दे सोचदे!*

30 अगर तिना री चट्टान ई

तिना खे नि बेची देंदी

ओर यहोवा तिना खे

ओरी रे आथो रे नि करदा,

तो ये किंयाँ ऊई सको था

कि तिना रे ह्जारा सिपाईया रा

पीछा एक माणूं करदा

ओर तिना रे दस ह्जार सिपाईया

खे दो माणूं नठाई देंदे?

31 कऊँकि जेड़ी म्हारी चट्टान ए,

तेड़ी तिना री चट्टान निए,

चाए म्हारे दुश्मण ई

म्हारे न्याय करने वाल़े कऊँ नि ओ।

32 कऊँकि तिना री

अंगूरा री बेल

सदोमो री अंगूरा री बेला ते

निकल़ी री ओर

गमोरा रे अंगूरा रे बगीचे री ए;

तिना रे अंगूर विषो साथे परे रे

ओर तिना रे अंगूरा रे गुच्छे कड़ुए।

33 तिना रे अंगूरा रा रस

सापो रा जा विष ए

ओर काल़े नागो जेड़ा

मारने वाल़ा विष ए।

34 क्या ये गल्ल मेरे मनो रे

ओर मेरे पण्डारो रे

मुहरा साथे बन्द नि थी

35 बदला लणा ओर

बदला देणा मेरा ई काम ए,

ये तेबे ऊणा जेबे

तिना रे पैर खड़ीसणे;

कऊँकि तिना री

मुसीबता रा दिन नेड़े ए

ओर जो दु:ख तिना पाँदे

पड़ने वाल़े ए,

से चट ई आऊणे वाल़े ए।

36 कऊँकि जेबे यहोवे

देखणा कि मेरे लोका री

शक्ति जाणे लगी री

ओर क्या कैदी, क्या आजाद,

तिना बीचा ते कोई नि बचेया,

तेबे यहोवे आपणे

लोका रा न्याय करना

ओर आपणे दासो पाँदे

दया करनी।

37 तेबे तेस बोलणा,

"तुसा रे देवता केयी गए?,

मतलब से चट्टान केयी ए जेते

पाँदे तिना खे परोसा था,

38 जो तुसा रे बलिदाना री

चर्बी खाओ थे ओर

तिना रे चढ़ाई रे अंगूरा रा रस पियो थे?

एबे सेयो ई देवते उठी की

तुसा री मताद करो ओर

सेयो ई तुसा री रक्षा करो!

39 इजी री खातर तुसे

एबे देखी लो कि

आऊँ सेईए ओर मां साथे

कोई देवता निए,

आऊँ ई प्राण लऊँआ ओर

आऊँ ई जिन्दगी देऊँआ;

आऊँ ई कायल करूँआ,

ओर आऊँ ई ठीक करूँआ;

ओर मेरे आथो ते

कोई नि छुड़ाई सकदा।

40 कऊँकि आऊँ आपणा आथ

स्वर्गो रिया तरफा खे

चकी की ये कसम खाऊँआ,

कऊँकि आऊँ

अनन्त कालो तक जिऊँदा ए,

41 इजी री खातर मां

आपणी तलवारी री तार

तेज करनी

ओर न्याय खे आपणे

आथो रे लई लूँ,

तो आऊँ आपणे बैरिया ते बदला लऊँगा।

42 मां आपणे तीर दुश्मणा रे ओर

कैदिया रे खूने की नल़वाई देणे

ओर मेरी तलवारी मास खाणा,

से खून, मारे रे ओर

कैदिया रा ओर से मास,

दुश्मणा रे लाम्बे बाल़ो वाल़े

परदाना रा ऊणा।"

43 ओ दूजी जातियो,

तेसरे आपणे लोका साथे खुशी मनाओ,

कऊँकि तेस आपणे

दासो रे खूनो रा बदला लणा;

ओर आपणे बैरिया ते

बदला लणा ओर तेस आपणे

देश ओर आपणी प्रजा रे लोका रे

पापो रिया तँईं प्राश्चित देणा।

44 एते गीतो रे सारे वचन मूसे नूनो रे पाऊ यहोशूए समेत आई की लोका खे सुणाए।

45 जेबे मूसा इना सारे वचना खे सबी इस्राएलिया खे बोली चुकेया, 46 तेबे मूसे तिना खे बोलेया, "जितणी गल्ला आज आऊँ तुसा खे चिताई की बोलूँआ, तिना सबी पाँदे आपणा-आपणा मन लगाओ ओर तिना दे, मतलब एते व्यवस्था री सारी गल्ला खे मानणे दे चौकसी करने री आज्ञा आपणे बच्चेया खे देओ। 47 कऊँकि ये व्यवस्था रे शब्द तुसा खे बेकार निए, पर तुसा री जिन्दगी ए ओर एड़ा करने ते तेते प्रदेशो दे तुसा री उम्रा रे दिन जादा ऊणे, जेतेरे मालक ऊणे खे तुसे यरदन नदिया ते पार जाणे लगी रे।"

48 फेर तेस ई दिने यहोवे मूसे खे बोलेया, 49 "तेस अबारीम पाह्ड़ो री नबो नाओं री चूँडिया पाँदे, जो मोआब प्रदेशो रे यरीहो रे सामणे ए, चढ़ी की कनान देश, जेतेखे आऊँ इस्राएलिया री निज जमीन करी की देणे लगी रा, तिजी खे देखी लो। 50 तेबे जेड़ा तेरा पाई हारूण होर पाह्ड़ो पाँदे मरी की आपणे मरे रे लोका साथे मिली गा, तेड़ा ई तूँ एते पाह्ड़ो पाँदे चढ़ी की मरी जाणा ओर आपणे मरे रे लोका बीचे मिली जाणा। 51 इजी री बजअ ये थी कि सीन नाओं री सुनसाण जगा दे, कादेशो रे मरीबा नाओं री सूबल़ा पाँदे, तुसे दुँईं इस्राएली समाजो बीचे मां साथे विश्वासघात कित्तेया, कऊँकि तुसे इस्राएलिया बीचे आऊँ पवित्र नि ठराया। 52 इजी री खातर से देश जो आऊँ इस्राएलिया खे देऊँआ, तां आपू सामणे देखी लणा, पर तूँ तेती जाई नि सकदा।"