1 एबे ओ इस्राएली लोको जो-जो बिदिया ओर नियम आऊँ तुसा खे सिखाणा चाऊँआ तिना सुणी लो ओर तिना पाँदे चलो; जेते कि तुसे जिऊँदे रओ ओर जो प्रदेश तुसा रे पितरा रा परमेशर यहोवा तुसा खे देओआ तिदे जाई की तेतेरे मालक ऊई जाओ। 2 जो आज्ञा आऊँ तुसा खे सुणाऊँआ तिदे ना तो कुछ बढ़ाणा ओर ना ई कुछ कटाणा, तुसा रे परमेशर यहोवे रिया जो-जो आज्ञा आऊँ तुसा खे देऊँआ सेयो तुसे मानणियां।*

3 जो काम यहोवे बालपोरो रे कित्तेया से तुसे आपू देखेया। तुसा रे परमेशर यहोवा सेयो सब माणूं तुसा बीचा ते नाश करीते, जो बालपोरो रे देवते पीछे चली पड़े थे; 4 पर तुसे तो आपणे परमेशर यहोवे साथे लिपटी की रए, तेबेई तो सब के सब आजो तक जिऊँदे ए।

5 देखो, मैं तो आपणे परमेशर यहोवे री आज्ञा रे मुताबिक तुसा खे बिदिया ओर नियम सिखाए कि जेते जगा रे अक्कदार ऊणे जाओए, तिदे तुसे तिना रे मुताबिक चलो। 6 इजी री खातर तुसे सेयो अपनाणियां ओर मानणियां, कऊँकि ओरी प्रदेशो रे लोका सामणे तुसा री बुद्धि ओर समज इना गल्ला तेई सामणे आऊणी, मतलब तिना इना सारिया बिदिया खे सुणी की बोलणा, "जरूर एते महान् प्रदेशो रे लोक अक्लमंद ओर समजदार ए।"

7 देखो, एड़ा कुण महान् प्रदेश ए जेतेरा देवता तेसरे इतणे नेड़े रओआ, जेड़ा म्हारा परमेशर यहोवा आसा रे नेड़े रओआ, जेबे-जेबे आसे तेसखे पुकारूएँ से म्हारी प्रार्थना सुणोआ? 8 फेर एड़ा कुण जा महान् प्रदेश ए जेसगे एड़िया बिदिया ओर नियम ए जेड़ी कि ये सारी व्यवस्था तार्मिक ए जेतेखे आऊँ आज तुसा सामणे देऊँआ?

9 ये बऊत जरूरी ए कि तुसे आपणे बारे दे चौकस रओ ओर आपणे मनो री बड़ी चौकसी करो, केथी एड़ा नि ओ कि जो-जो गल्ला तुसे आपणी आखी साथे देखिया तिना खे पूली जाओ ओर सेयो पूरी जिन्दगी तुसा रे दिलो ते निकल़ी जाओ, बल्कि तुसे सेयो आपणे माठेया-बेटिया ओर पोते-पोतिया गे बी सुनाणियां। 10 खास करी की तेस दिनो रिया गल्ला जेस दिने तुसे होरेब पाह्ड़ो गे आपणे परमेशर यहोवे रे सामणे खड़े थे, जेबे यहोवे माखे बोलेया था, "तिना लोका खे मांगे कट्ठा कर ओर मांगे लई आओ ताकि आऊँ तिना खे आपणियां गल्ला सुणाई सकूँ, जेते कि सेयो सीखो, ताकि जितणे दिन सेयो तरतिया पाँदे जिऊँदे रओ, तितणे दिना तक मेरा डर मानदे रओ ओर आपणे बाल-बच्चेया खे बी येई गल्ला सिखाओ।"

11 तेबे तुसे नेड़े जाई की तेस पाह्ड़ो निठे खड़े ऊए ओर से पाह्ड़ आगी साथे बल़ने लगी रा था, आगी रिया लूपिया सर्गो तक पऊँचो थिया ओर तेतेरे चऊँ कनारे तुआँ, बादल़ ओर अन्दकूप न्हेरा छाई रा था।* 12 तेबे यहोवे तेते आगी बीचा ते तुसा साथे गल्ला कित्तिया; गल्ला रा शब्द तो तुसा खे सुणेया, पर कोई नि दिशेया, बस आवाज ई सुणने लगी री थी। 13 यहोवे तुसा खे आपणी वाचा रे दस वचन बताई की तिना खे मानणे री आज्ञा दित्ती ओर सेयो पात्थरो रिया दूई फटिया पाँदे लिखी ते।

14 तेबे परमेशरे माखे तेस ई बखते तुसा खे बिदिया ओर नियम सिखाणे री आज्ञा दित्ती, ताकि जेस प्रदेशो रे मालक ऊणे खे तुसे पार जाणे वाल़े ए तेती तुसे तिना खे मानेया करो।

15 इजी री खातर तुसे आपणे बारे दे बऊत सावधान रएयो, कऊँकि जेबे परमेशरे तुसा साथे होरेब पाह्ड़ो पाँदे आगी बीचा ते गल्ला कित्तिया, तेबे तुसा खे कोई शक्ल नि दिशी, 16 केथी एड़ा नि ओ कि तुसे प्रष्ट ऊई की चाए मर्द ओ चाए जवाणस, 17 चाए तरतिया पाँदे चलणे वाल़ा कोई डांगर, चाए सर्गो दे उड़ने वाल़ा कोई पंछी, 18 चाए तरतिया पाँदे लूरने वाल़ा जन्तु, चाए तरतिया रे पाणिए बीचे रणे वाल़ी केसी मछलिया रे रूपो री कोई मूर्ति खणी की बणाई लओ, 19 या जेबे तुसे सर्गो रिया तरफा खे आखी चकी की, सूरज, चाँद ओर तारेया खे, मतलब सर्गो रे सारे तारे देखो, तेबे बईकी की तिना गे माथा टेकी की तिना री सेवा करने लगो जो तुसा रे परमेशर यहोवा तरतिया पाँदलेया सबी लोका खे राखी राखे। 20 तुसा खे यहोवा मिस्र प्रदेशो ते निकयाल़ी की ल्याया जो लोए रे पट्ठे जेड़ा था, ताकि तुसे तेसरी प्रजा रा निज पाअग ठईरो, जेड़ा आज बी ए।

21 तेबे तुसा रिया बजअ ते यहोवे मांते गुस्से ऊई की कसम खाई, "तूँ यरदन नदिया ते पार नि जाई सकणा ओर जो खरा प्रदेश इस्राएलिया रा परमेशर यहोवा तिना खे तिना रा निज पाअग करी की देओआ, तिदे तूँ नि जाणा।" 22 पर माखे एथी प्रदेशो दे मरना पड़ना, आऊँ तो यरदनो ते पार नि जाई सकदा; पर तुसे पार जाई की तेस खरे प्रदेशो रे मालक ऊई जाणे। 23 इजी री खातर तुसे आपणे बारे दे सावधान रओ, केथी एड़ा नि ओ कि तुसे तेसा वाचा खे पूली की, जो तुसा रे परमेशर यहोवा तुसा साथे बानी राखी, केसी ओरी चीजा री मूर्ति खणी की बणाओ, जेतेखे तुसा रे परमेशर यहोवा तुसा खे ना करी राखी। 24 कऊँकि तुसा रा परमेशर यहोवा स्वा करने वाल़ी आग ए, से जल़न राखणे वाल़ा परमेशर ए।

25 जे तेते प्रदेशो रे रंदे-रंदे बऊत दिन बीतणे पाँदे ओर आपणे माठे पोते पैदा ऊणे ते बाद, तुसे बिगड़ी की केसी चीजा रे रूपो री मूर्ति खणी की बणाओ ओर ईंयाँ आपणे परमेशर यहोवे रे खलाफ बुराई करी की तेसखे दु:खी करी देओ, 26 तो आऊँ आज सर्ग ओर तरतिया खे तुसा रे खलाफ गवा करी की बोलूँआ कि जेस प्रदेशो रे मालक ऊणे खे तुसे यरदनो ते पार चली रे तिदे तुसे चट ई नाश ऊई जाणे ओर बऊत दिन तक नि रणे, पर बुरी तरअ ते नाश ऊई जाणे। 27 ओर यहोवे तुसे प्रदेशो-प्रदेशो रे लोका बीचे तित्तर-बित्तर करने ओर जिना देशा रे लोका बीचे यहोवे तुसे पऊँचाणे तिना रे तुसे थोड़े जेई रई जाणे। 28 ओर तेती तुसा माणूंआ रे बणाए रे लकड़िया रे ओर पात्थरा रे देवतेया री पूजा करनी, जो ना देखदे, ना सुणदे, ना खांदे ओर ना ई सिंगदे। 29 पर तेती बी जे तुसे आपणे यहोवे खे टोल़ोगे, तो से तुसा खे मिली जाणा, शर्त ये कि तुसे आपणे पूरे मनो ते ओर आपणे सारे प्राणो ते तेसखे टोल़ो।

30 आखरी रे दिना रे जेबे तुसे मुसीबता दे पड़ो, तेबे यो सारिया बिपदा तुसा पाँदे पड़नियां, तेबे तुसे आपणे परमेशर यहोवे रिया तरफा खे फिरना ओर तेसरी मानणा। 31 कऊँकि तेरा परमेशर यहोवा दयालु परमेशर ए, तेस ना तो तुसे छाडणे ओर ना ई नाश करने ओर जो वाचा तिने तुसा रे पितरा ते कसम खाई की बानी राखी, से नि पूलणी।

32 जदुओ ते परमेशरे माणूं पैदा करी की तरतिया पाँदे राखेया, तदुओ ते लई की तूँ आपणे पैदा ऊणे रे दिनो तको रिया गल्ला पूछ ओर सर्गो रे एकी कूणे ते दूजे कूणे तको रिया गल्ला पूछ, क्या एड़ी बड़ी गल्ल कदी ऊईया सुणने रे आई? 33 क्या कोई माणूं परमेशरो री आवाज आगी बीचा ते आऊँदे ऊए सुणी की जिऊँदा रया, जेड़ी तुसे सुणी राखी? 34 तेबे क्या परमेशरे ओर केसी जातिया खे दूजी जातिया बीचा ते निकयाल़ने खे लक बानी की परीक्षा, चिह्न, चमत्कार, युद्ध, तागतबर आथ ओर बढ़ाई रिया बांयी ते एड़े बड़े डराऊणे काम कित्ते, जेड़े तुसा रे परमेशर यहोवा मिस्रो रे तुसा रे देखदे ऊए कित्ते?

35 ये सब तुसा खे दखाया, ताकि तूँ जाणी लओ कि यहोवा ई परमेशर ए; तेसरे जेड़ा ओर कोई अया ई नि। 36 सर्गो ते तिने तुसा खे आपणी आवाज सुणाई ताकि तुसा खे शिक्षा देओ ओर तरतिया पाँदे तिने तुसा खे बड़ी आग दखाई ओर तेसरे वचन आगी बीचा ते आऊँदे ऊए ताखे सुणे। 37 तिने जो तेरे पितरा साथे प्यार राखेया, इजी बजअ ते तिना ते बाद तिना रे वंश चूणी ले ओर आजीर ऊई की तुसा खे आपणी बड़ी सामर्था साथे मिस्रो ते इजी खे निकयाल़ी की ल्याया, 38 ताकि तांते बड़ी ओर सामर्थी जातिया खे तेरे आगे ते नठाई की, ताखे तिना रे प्रदेशो रे पऊँचाओ ओर तिजी खे तेरा निज पाअग करी देओ, जेड़ा आजके दिने दिशोआ।

39 इजी री खातर आज जाणी लओ ओर आपणे मनो रे सोची बी लओ कि ऊबे सर्गो रे ओर थाले तरतिया पाँदे यहोवा ई परमेशर ए ओर कोई दूजा निए।* 40 तूँ तेसरी बिदिया खे ओर आज्ञा खे मानेया, जो आऊँ आज तुसा खे सुणाऊँआ, इजी री खातर कि तेरा ओर तांते बाद तेरे वंशो रा बी पला ओ ओर जो देश तेरा परमेशर यहोवा तुसा खे देओआ, तिदे तेरी उम्र जादा ओ।

41 तेबे मूसे यरदन नदिया ते पार पूर्वो रिया तरफा खे तीन शईर लग कित्ते, 42 ताकि जो कोई बिना जाणे ओर बिना पईले ते बैर राखी की आपणे केसी पाईए खे काई देओ, से तिना बीचा ते केसी शईरो खे नठी जाओ ओर नठी की जिऊँदा रओ, 43 मतलब रूबेन वंशिया रा बेसेर शईर जो सुनसाण जगा रे सवें शईरो रे ए ओर गाद वंशिया रे गिलादो रा रामोत ओर मनश्शे वंशिया रे बाशानो रा गोलान।

44 तेबे जो बिधान मूसे इस्राएलिया खे दित्ती से ये ए; 45 यो ई सेयो चतौणिया ओर नियम ए जो मूसे इस्राएलिया खे तेस बखते सुणाए जेबे सेयो मिस्रो ते निकल़े थे, 46 मतलब यरदनो ते पार बेतपोरो सामणे रिया तराईया रे, एमोरिया रे राजा हेशबोनवासी सिहोनो रे प्रदेशो रे, जो राजा तिने मिस्रो ते निकल़ने ते बाद काया। 47 तिने तेसरे प्रदेशो खे ओर बाशानो रे राजा ओगो खे, आपणे अक्को रे करिता, यरदन नदिया ते बाद सूरज निकल़ने रिया तरफा खे रणे वाल़े एमोरिया रे राजेया रे यो प्रदेश थे। 48 ये प्रदेश अर्नोन नदिया रे कनारे अरोएरो ते लई की सीओन पाह्ड़, जेतेखे हेर्मोन बी बोलोए, 49 तेस पाह्ड़ो तको रा सारा देश ओर पिसगा री टलाना निठे अराबा रे तालो तक, यरदन नदिया री काअटिया ते पार पूर्वो रिया तरफा खे सारा अराबा ए।