1 इन बातन के बाद अब्राम अक्ठी सपना देखथै, उके भगवान के अक्ठी संदेस मिलथै, "हे अब्राम झइ डेरा, मै तोर रक्छा करिहों अउ मै तोके अक्ठी बडा इनाम देहुं।" 2 पय अब्राम कथै, "हे भगवान, हे परभु, तै मोके काहिन दइहे? मोर कउनो लरका नेहको आय, इहैनिता मोर हरवाह दमिस्क सहर के एलीएजेर मोर मरै के बाद सगलू कुछु पाही।" 3 अब्राम कथै, "तै देख ले, तै मोके कउनो टोरवा नेहको दय हबस, इहैनिता मोर घर हे पइदा अक्ठी हरवाह मोर सगलू डेरा पाही।" 4 तब भगवान कर हइ बचन अब्राम के लिघ्घो पहुंचिस, ऊ कथै, "तोर डेरा के तोर हरवाह नेहको पाही, तोर अक्ठी टोरवा होही अउ तोरै टोरवा तोर डेरा*15:4 सम्पत्ति पाही।" 5 तब भगवान अब्राम के बाहिर लइ जथै, ऊ कथै, "बादर के देख, कइन मेर के तराइयन के देख, हइ एतका हबै कि तै गिनो नेहको सकथस," आमै बाले टेम हे "तोर घराना असनेन होही।"✝15:5 रोमियो 4:18; इब्रानिन 11:12 6 अब्राम भगवान के उप्पर बिस्वास करिस, भगवान ओखर बिस्वास के अक्ठी निक्खा काम मानिस।✝15:6 रोमियो 4:3; गलातियों 3:6; याकूब 2:23 7 भगवान अब्राम लग कथै, "मै उहै परभु यहों, जउन हइ देस तोर हक हे दे के निता तोके कसदी जात के ऊर सहर लग निकार लाय हव, हइ मै इहैनिता करे हव कि हइ परदेस मै तोके दइ सको, तै हइ परदेस के अपन वस हे कर सकस।" 8 अब्राम भगवान लग पूंछथै, "हे परभु, हे भगवान, मोके कइसन बिस्वास होय कि हइ परदेस मोके मिलही?" 9 भगवान ओही जबाब देथै, "हम अक्ठी टीमा बांधब, तै मोर निता तीन-तीन साल के अक्ठी बछिया, छेडी, गेडरा, पिन्डुक अउ अक्ठी परेबा के लरका मोर लिघ्घो लइ आनबे।" 10 अब्राम हइ सगलू चीज भगवान के लिघ्घो लइ जथै, एखर बाद अब्राम इन परानिन के मार डारिस अउ हर अक्ठी के दुइ-दुइ खंडा कर देथै, अउ उन खंडा के आमने-सामने धरथै, पय ऊ चिराइयन के दुइ खंडा नेहको करिस। 11 जब मांस खाय बाले चिरइया बेदी हे चढाय हर मांस के खाय के निता आय रथै, उनके अब्राम भगाय देथै। 12 जब बेरा बुढे लगिस तब अब्राम के बोहत नींद आ जथै, अउ देखा बडा भय अउ अंधियार उके चारो पल्ला घेर लेथै, 13 तब भगवान अब्राम लग कथै, "हइ बात जरूर जान ले तोर लरका अनचिन्हार देस हे जइहिन, जउन उनखर देस नेहको होही, उहां हरवाह बनके रइहिन अउ चार सव साल तक उनखर उप्पर दुख होत रही।✝15:13 निरगमन 1:1-14; प्रेरितो 7:6 14 पय जउन देस उनके हरवाह बनइहिन, उके मै सजा देहुं, एखर बाद उन बहोत धन के संग उहां लग निकर अइहिन।✝15:14 निरगमन 12:36; 12:40-41; प्रेरितो 7:7 15 तै बोहत साल तक जिन्दा रइहे, तै सान्ति के संग मरिहे अउ तै अपन पुरखा के लिघ्घो गाडे जइहे। 16 चार सव पीढी के बाद तुम्हर मनसेन हइ परदेस हे फेरै अइहिन, काखे एमोरी मनसे के निता सजा पामै के टेम नेहको आय हबै।" 17 जब बेरा बुढ जथै, ता बोहत अंधियार छाय जथै, तब अक्ठी धुंवा बाले अंगठी अउ अक्ठी जलत मसाल उन खंडा के बीच हुइके गुजरिस। 18 हइ मेर ऊ रोज भगवान अब्राम के बचन दइस अउ ओखर संग टीमा बांधिस, भगवान कथै, "मै हइ परदेस के तोर लरकन के दइहों, मै मिस्र के नदिया अउ बडा फरात के बीच के परदेस उनके देहुं। 19 मतलब जिहां केनी, कनिज्जिया, कदमोनियन, 20 हित्ती, परिज्जी, रपाई, 21 एमोरी, कनानी, गिर्गासी अउ यबूसी मनसे रथै।"