1 जब अब्राम निन्यानबे साल के हुइस, भगवान अब्राम लग सपना हे आय के कथै, मै सब लग सक्तिमान भगवान यहों, मोर निता हइ काम करा, मोर आदेस के माना अउ सही रास्ता हे चला। 2 अगर तै हइ काम करिहा ता मै अपन अउ तोर बीच हे अक्ठी टीमा तइयार करिहों, मै तोर मनसेन के अक्ठी बडा देस बनामै के बचन देहुं। 3 अब्राम अपन मूंड के जमीन हे झुकाइस तब भगवान ओखर लग बात करिस अउ कथै, 4 "देख, तोर संग मोर हइ टीमा हबै, तै कइनठेन देस के बाफ बनिहे। 5 मै तोर नाम के बदल दइहों, तोर नाम अब्राम नेहको रहि, अब लग तोर नाम अब्राहम होही, मै तोर नाम इहैनिता रखथो कि तै कइठे देस के बाफ बनिहे। 6 मै तोके बोहत लरका दइहों, तोर लग नबा देस पइदा हुइहिन अउ तोर लग नबा राजा पइदा हुइहिन। 7 मै अपन अउ तोर बीच अक्ठी टीमा बंधिहों, हइ टीमा सगलू लरकन के निता होही, मै तोर अउ तोर लरकन के बीच के भगवान रइहों, हइ टीमा हरमेसा के निता बने रही। 8 अउ मै हइ परदेस तोके अउ तोर लरकन के दइहों, मै ऊ परदेस तोके देहुं जेखर लग तुम यातरा करत हबा, मै तोके कनान देस देहुं, मै तोके हइ परदेस हरमेसा के निता दइहों अउ मै तोर भगवान रइहों।"✝17:8 प्रेरितो 7:5 9 भगवान अब्राहम लग कथै, "अब टीमा के हइ तोर भाग हबै, मोर हइ टीमा के तै अउ तोर लरका पालन करहिन। 10 हइ मोर टीमा हबै, जेखर पालन तोके करे के हबै, हइ टीमा मोर अउ तोर बीच अउ हइ तोर सगलू लरका के निता हबै, हर अक्ठी लरका जउन पइदा हुइहिन ओखर खतना*17:10 देह कर सुध्दिकरन करै के निता जरूर होही।✝17:10 प्रेरितो 7:8; रोमियो 4:11 11 तै अपन खलरी के हइ जान के कटबे कि अपन अउ मोर बीच के टीमा हबै ओखर इहै चिन्हा होही। 12 जब टोरवा आठ रोज के हुइ जाय, तब तै ओखर खतना करबे, हर अक्ठी टोरवा चाहे ऊ तोर घर के पइदा होय या परदेसी होय या पइसा दइके खरीदे गय होय, सब के खतना होय के जरूरी हबै। 13 हइ मेर तोर देस के हर अक्ठी लरका के खतना होही, जउन टोरवा तोर घर हे पइदा होही या हरवाह के रूप हे खरीदे गय होय उन सगलुन के खतना होही। 14 हइ मोर नियम हबै अउ मोर अउ तोर बीच के टीमा आय, जउन कउ के खलरी के खतना नेहको होही ऊ तुम्हर मनसेन लग अलगे कर दय जही, काखे ऊ मोर टीमा के टोरे हबै।✝17:14 उत्पति 21:4"

15 भगवान अब्राहम लग कथै, "तै अपन डउकी सारय के सारय झइ कहबे, अब नबा नाम देहुं, ओखर नाम सारा होही। 16 मै उके आसीस देहुं मै तोके ओखर दवारा अक्ठी टोरवा देहुं अउ तै बाफ कहाबे, अउ ऊ देस के दाय कहाही अउ कइठे राज के राजा ओखर लग पइदा हुइहिन।" 17 अब्राहम अपन मूंड जमीन हे झुकाइस, पय ऊ हंसिस अउ अपन मन हे बोलथै, "का सव साल के डोकरा के लरका हुइ सकथै? का नब्बे साल सारा लादा हे हुइ सकथै?" 18 अब्राहम भगवान लग कथै, हे परभु, "इस्माइल तोर नजर हे बने रहै, इहै बोहत हबै।" 19 भगवान कथै, "तोर डउकी सारा तोर निता अक्ठी अउ टोरवा के पइदा करी, तै ओखर नाम इसहाक रखबे मै ओखर संग टीमा बंधिहों, हइ टीमा असना होही जउन ओखर सगलू लरका के संग हरमेसा बने रही।✝17:19 गलातियों 4:7-8 20 तै मोर लग इस्माइल के बारे हे पूंछे रहस अउ मै तोर बात के सुने हव, मै उके आसीस देहुं, ओखर बोहत लरका हुइहिन, ऊ बाराठे बडा राजन के बाफ होही, ओखर परवार अक्ठी बडा देस बनही। 21 मै अपन टीमा इसहाक के संग बनइहों, इसहाक उ टोरवा होही जेही सारा पइदा करही, हइ टोरवा अगले साल इहै टेम हे पइदा होही।" 22 जब भगवान अब्राहम लग बात करै के बन्द करै के बाद अब्राहम अकेल्ले रहि गय, भगवान ओखर लग दुरिहां स्वरग हे कढ जथै। 23 अब्राहम अपन टोरवा इस्माइल के अउ अपन घर हे पइदा सगलू हरवाहन के बुलाइस, अउ जउन पइसा लग खरीद के लाय रथै, अब्राहम के घर के सगलू डउका अउ टोरवा के खतना उहै रोज भगवान के बचन के जसना उनखर खलरी के काट दय गइस। 24 जब अब्राहम के खलरी के खतना करे गइस तब ऊ निन्यानबे साल के रथै। 25 जब ओखर टोरवा इस्माइल के खलरी के खतना करे गइस तब ऊ तेरह साल के रथै। 26 अब्राहम अउ ओखर टोरवा इस्माइल के खतना एक्कै रोज करे गइस। 27 उहै रोज अब्राहम के घर के सगलू डउकन के खतना हुइस, अब्राहम के घर के पइदा या पइसा दइके खरीदे गय हर हरवाहन के खतना अक्कै रोज उनखर खलरी काट दय गय रहिन।