1 जब अब्राहम मम्रे नाम बांझ रूख के लिघ्घो दुपहरी के बहोत घाम हे अपन तम्बू के दूरा हे बइठे रथै, तब परभु ओखर आगू परगट होथै। 2 अब्राहम अपन आंखी उठाय के देखथै, मोर आगू तीनठे डउका ठाढ हबै, जब अब्राहम उनके देखिस, अउ ऊ उनखर लिघ्घो गइस अउ उनके परनाम करिस। 3 अब्राहम कथै, "हे परभु, तै अपन हइ सेबक के संग चुटु देर अउ रुक जा। 4 मै तुम्हर निता गोड धोमै के निता पानी लाथो, तुम रूख के तरी बइठ जा। 5 मै तुम्हर निता कुछ खाय के निता खाना लाथो, अउ तुमके जेतका खाय के होय, ओतका खा, एखर बाद तुम अपन यातरा सुरुवात कर सकथा। उन तीनो मनसे कथै, हइ बोहत अच्छा हबै, जसना तै चाहथस, ओसनेन कर।" 6 अब्राहम हरबी तम्बू हे गइस, अउ सारा लग कथै, "हरबी तीनठे रोटियन के निता सोला किलो पिसान लगभग तइयार कर।" 7 तब अब्राहम अपन गाय मवेसिन के लिघ्घो दउरिस, अउ ऊ सब लग अच्छा अक्ठी रकरा लइस, अब्राहम रकरा के हरवाहन के दइस, अउ उनखर लग कथै, कि रकरा के हरबी मारा अउ खाय के निता खाना तइयार करा। 8 अब्राहम दूध अउ दही अउ पाले हर पसु के पके हर मांस तीनो डउकन के लिघ्घो पोरस देथै, जब तक उन खाना खात रथै, तब तक अब्राहम रूख कर तरी उनखर संग ठाढ रथै।✝18:8 इब्रानिन 13:2 9 उन मनसेन अब्राहम लग पूंछथै, "तोर डउकी सारा कछो हबै?" अब्राहम उनखर लग कथै, "ऊ तम्बू हे हबै।" 10 तब भगवान कथै, "मै अगहन के मउसम हे फेरै आहुं, ऊ टेम तोर डउकी सारा अक्ठी टोरवा के पइदा करही," जउन बात भगवान अब्राहम लग कथै, सारा तम्बू हे उन सगलू बात के सुनथै।✝18:10 रोमियो 9:9 11 अब्राहम अउ सारा दोनोझन बोहत डोकराय जथै, सारा पीरा के उमर के पार कर चुके रथै, ओखर मासिक धरम बन्द हुइ चुकथै।✝18:11 रोमियो 4:9 12 सारा मन हे हसिस अउ खुद लग कथै, "मै अउ मोर डउका दोनोझन डोकराय गय हवन, मै लरका पइदा करै के निता बोहत डोकरी हुइ गय हव।" 13 तब भगवान अब्राहम लग कथै, "सारा काखे हसिस? ऊ काखे बोलिस, कि मै डोकरी हुइ गय हव, का लरका के पइदा कर सकिहों? 14 का भगवान के निता कउनो काम मुस्किल हबै? मै आमै बाले टेम हे तोर लिघ्घो आहुं, अउ सारा कर लरका पइदा हुइ।" 15 सारा अपन बात लग पलट जथै, काखे ऊ डर गय रथै, सारा कथै, "मै नेहको हसे यहों," भगवान कथै, "नेहको तै जरूर हसे हवस।"✝18:15 1 पतरस 3:6

16 तब उन डउका उहां लग उठथै, उन सदोम सहर के पल्ला देखथै, अउ उहै पल्ला चल पडथै, अब्राहम उनखर बिदा करै के निता उनखर संग कुछ दुरिहां तक संग गइस। 17 परभु सोचथै, "मै जउन काम करै के जथो, का उके अब्राहम लग छुपाय रखो? 18 अब्राहम लग अक्ठी बडा अउ सक्तिसाली देस बन जही, इहै कारन भुंइ के सगलू मनसेन आसीस पइहिन।✝18:18 उत्पति 12:3; प्रेरितो 3:25; गलातियों 3:8 19 मै अब्राहम के चुने हव कि ऊ अपन लरकन अउ परवार के, जउन ओखर बाद रइहिन, सिक्छा दे कि उन सही रास्ता अउ नियाव के काम करै अउ मोर रास्ता हे चलत रहै, तब मै ऊ बचन के पूर करिहों जउन भगवान अब्राहम के दय हव।" 20 परभु कथै, "सदोम अउ अमोरा सहर के मनसेन बुराई, पाप बोहत बढ गय हबै। 21 इहैनिता मै उहां जइहों अउ देखहुं, कि का हालत उतकै बेकार हबै जेतका मै सुने हव, तब मै सही-सही जान लइहों।" 22 तब उन मनसे मुडिन अउ सदोम सहर छो चल पडथै, पय अब्राहम भगवान के आगू ठाढ रथै। 23 तब अब्राहम भगवान लग कथै, "हे भगवान, का तै बेकार मनसेन के नास करै के संग निक्खा मनसेन के नास करै के बात सोचथस? 24 अगर ऊ सहर हे पचास निक्खा मनसे हुइहिन ता का उनही तउभरमा तै सहर के नास कर दइहे? जरूर तै उहां रहै बाले पचास मनसे के निता ऊ सहर के नास नेहको करिहे। 25 जरूर तै उस सहर के बचाय लइहे, बेकार मनसेन के मारै के निता तै निक्खा मनसेन के नास नेहको करिहे, अगर असना हुइस ता निक्खा अउ बेकार मनसे अक्कै हुइ जइहिन, दोनोझन के सजा मिलही, तै पूर भुंइ के न्याय करे बाले हबस, मै जानथो कि तै न्याय करबे।" 26 तब भगवान कथै "अगर मोके सदोम सहर हे पचास निक्खा मनसे मिलहिन, ता उनखर कारन मै उहां के सगलू मनसेन के छमा कर देहुं।" 27 तब अब्राहम कथै, "हे भगवान, तोर बरोबर हे मै केबल धूर अउ राख यहों, पय अपन गुरू लग बात करै के हिम्मत करथो। 28 अगर पचास निक्खा मनसे लग कम होय ता का तै पांच कम होय जाय के कारन सगलू सहर के नास कर दइहे?" भगवान कथै, "अगर मोके उहां पइतालिस मनसे निक्खा मिलहिन ता मै उनही नास नेहको करहुं।" 29 फेरै अब्राहम कथै, "अगर तोके उहां केबल चालीस निक्खा मनसे मिलहिन ता का तै सगलू सहर के नास कर दइहे?" तब भगवान कथै, "अगर मोके चालीस निक्खा मनसे उहां मिलहिन ता मै सहर के नास नेहको करहुं।" 30 तब अब्राहम कथै, "हे भगवान किरपा करबे मोर उप्पर गुस्सा झइ होबे, मोके अउ पूंछय दे, अगर सहर हे केबल तीस निक्खा मनसेन हुइहिन ता का तै सगलू सहर के नास कर दइहे?" भगवान कथै, "अगर मोके तीस निक्खा मनसे उहां मिलहिन ता मै सहर के नास नेहको करिहों।" 31 फेरै अब्राहम कथै, "हे भगवान, का मै तोके फेरै कास्ट देथो, अउ पूंछथो, कि अगर बीस निक्खा मनसेन उहां हुइहिन ता?" ता का ऊ सहर के नास कर देबे? भगवान कथै, "अगर मोके बीस निक्खा मनसेन उहां मिलहिन ता मै नास नेहको करिहों।" 32 तब अब्राहम कथै, "हे भगवान तै मोर लग गुस्सा झइ होबे आखरी बेर कस्ट दे का मउका दे, अगर तोके उहां दस निक्खा मनसे मिलहिन ता तै काहिन करिहे?" भगवान कथै, "अगर सहर दस निक्खा मनसेन मिलहिन ता मै सहर नास नेहको करिहों।" 33 एखर बाद भगवान अब्राहम लग बात करै का बन्द कर दइस, इहैनिता भगवान उहां लग कढ गइस अउ अब्राहम अपन घर छो लउट आथै।