उत्पत्ति 18

23 तब अब्राहम भगवान लग कथै, "हे भगवान, का तै बेकार मनसेन के नास करै के संग निक्खा मनसेन के नास करै के बात सोचथस? 24 अगर ऊ सहर हे पचास निक्खा मनसे हुइहिन ता का उनही तउभरमा तै सहर के नास कर दइहे? जरूर तै उहां रहै बाले पचास मनसे के निता ऊ सहर के नास नेहको करिहे। 25 जरूर तै उस सहर के बचाय लइहे, बेकार मनसेन के मारै के निता तै निक्खा मनसेन के नास नेहको करिहे, अगर असना हुइस ता निक्खा अउ बेकार मनसे अक्कै हुइ जइहिन, दोनोझन के सजा मिलही, तै पूर भुंइ के न्याय करे बाले हबस, मै जानथो कि तै न्याय करबे।" 26 तब भगवान कथै "अगर मोके सदोम सहर हे पचास निक्खा मनसे मिलहिन, ता उनखर कारन मै उहां के सगलू मनसेन के छमा कर देहुं।" 27 तब अब्राहम कथै, "हे भगवान, तोर बरोबर हे मै केबल धूर अउ राख यहों, पय अपन गुरू लग बात करै के हिम्मत करथो। 28 अगर पचास निक्खा मनसे लग कम होय ता का तै पांच कम होय जाय के कारन सगलू सहर के नास कर दइहे?" भगवान कथै, "अगर मोके उहां पइतालिस मनसे निक्खा मिलहिन ता मै उनही नास नेहको करहुं।" 29 फेरै अब्राहम कथै, "अगर तोके उहां केबल चालीस निक्खा मनसे मिलहिन ता का तै सगलू सहर के नास कर दइहे?" तब भगवान कथै, "अगर मोके चालीस निक्खा मनसे उहां मिलहिन ता मै सहर के नास नेहको करहुं।" 30 तब अब्राहम कथै, "हे भगवान किरपा करबे मोर उप्पर गुस्सा झइ होबे, मोके अउ पूंछय दे, अगर सहर हे केबल तीस निक्खा मनसेन हुइहिन ता का तै सगलू सहर के नास कर दइहे?" भगवान कथै, "अगर मोके तीस निक्खा मनसे उहां मिलहिन ता मै सहर के नास नेहको करिहों।" 31 फेरै अब्राहम कथै, "हे भगवान, का मै तोके फेरै कास्ट देथो, अउ पूंछथो, कि अगर बीस निक्खा मनसेन उहां हुइहिन ता?" ता का ऊ सहर के नास कर देबे? भगवान कथै, "अगर मोके बीस निक्खा मनसेन उहां मिलहिन ता मै नास नेहको करिहों।" 32 तब अब्राहम कथै, "हे भगवान तै मोर लग गुस्सा झइ होबे आखरी बेर कस्ट दे का मउका दे, अगर तोके उहां दस निक्खा मनसे मिलहिन ता तै काहिन करिहे?" भगवान कथै, "अगर सहर दस निक्खा मनसेन मिलहिन ता मै सहर नास नेहको करिहों।" 33 एखर बाद भगवान अब्राहम लग बात करै का बन्द कर दइस, इहैनिता भगवान उहां लग कढ गइस अउ अब्राहम अपन घर छो लउट आथै।