1 भगवान सारा लग हइ बचन दय रथै कि ऊ सारा के उप्पर किरपा करही, ऊ अपन बचन के जसना ओखर उप्पर दया करिस।✝21:1 इब्रानिन 11:11 2 सारा लादा हे हुइस अउ डोकरी हे अब्राहम के निता अक्ठी लरका पइदा करिस, सही टेम हे जसना भगवान बचन दय रहै, ओसनेन हुइस। 3 सारा टोरवा के पइदा करिस अउ अब्राहम ओखर नाम इसहाक रखिस।✝21:3 मत्ती 1:2; लूका 3:34 4 भगवान के आदेस के जसना अब्राहम आठ रोज होय के बाद इसहाक के खतना करिस।✝21:4 प्रेरितो 7:8 5 अब्राहम सव साल के रथै, जब ओखर टोरवा इसहाक पइदा हुइस। 6 सारा कथै, "भगवान मोके खुस कर दय हबै, अउ हर अक्ठी मनसे जउन ई बारे हे सुनहिन ता मोर लग खुस हुइहिन। 7 कउ हइ नेहको सोचथै, कि सारा अब्राहम के निता डोकरी हे उके अक्ठी टोरवा दइ सकही, पय मै डोकरी हे अक्ठी टोरवा दय हव।" 8 ऊ टोरवा बडा हुइ गइस अउ ओखर दूध के छांडय गइस, तब जउन रोज इसहाक के दूध छांडय गइस, ऊ रोज अब्राहम खाना पीना रखिस।✝21:8 गलातियों 4:22; इब्रानिन 11:11

9 बीते टेम हे मिस्री दासी हाजिरा अक्ठी टोरवा के पइदा करिस, अब्राहम ऊ टोरवा के बाफ रथै, सारा हाजिरा के टोरवा के खेलत देखिस। 10 इहैनिता सारा अब्राहम लग कथै, "हाजिरा अउ ओखर लरका के इहां लग पठोय दे, जब हम मरब ता हमर सगलू डेरा इसहाक के मिलही, मै नेहको चाहथो कि ओखर लरका इसहाक के संग उन डेरन के बटवारा होय।" 11 हइ सगलू बात अब्राहम के बोहत दुख कर देथै, ऊ अपन टोरवा इस्माएल के निता दुखी रथै।✝21:11 गलातियों 4:29-30 12 पय भगवान अब्राहम लग कथै, "ऊ टोरवा के बारे हे जादा दुख झइ हो, अउ हाजिरा के बारे दुख झइ हो, जउन सारा चाहथै, तै उहै कर, तोर लरका इसहाक कर लरका लग चलही।✝21:12 रोमियो 9:7; इब्रानिन 11:18 13 पय मै तोर हाजिरा के लरका के आसीस देहुं, काखे ऊ तोर लरका आय, इहैनिता मै ओखर परवार के अक्ठी बडा देस बनइहों।" 14 दूसर रोज अब्राहम बोहत सुबेन्ने उठिस अउ कुछ खाना अउ खलरी के थइला हे पानी हाजिरा के दइ दइस, हाजिरा उन चीजन के धरिस अउ अपन लरका के संग उहां लग कढ गइस, हाजिरा ऊ जिघा के छांडिस अउ ऊ बेरसेबा के पतेरा हे भटके लगिस। 15 कुछ टेम बाद हाजिरा के सगलू पानी बढाय जथै, पीय के निता कुछु पानी नेहको बचाथै, इहैनिता हाजिरा अपन लरका के अक्ठी पुडरा के तरी धर देथै। 16 हाजिरा उहां लग कुछ दुरिहां गइस, तब ऊ रुकथै अउ बइठ जथै, हाजिरा सोचथै कि मोर लरका मर जइ काखे उहां पानी नेहको रथै, ऊ अपन टोरवा के मरत नेहको देखै चाहथै, अउ ऊ बोहत रोमै लग जथै। 17 भगवान लरका के रोमै के आरो के सुनिस, भगवान अपन दूत के पठोथै हाजिरा के लिघ्घो, अउ ओखर लग पूंछथै, तोके का हुइ गय हबै? झइ डर, जिहां तोर लरका हबै, उहां लग भगवान ओखर आरो के सुने हबै। 18 उठ अपन हाथ लग लरका के सम्भार, काखे मै उके बोहत मनसेन के बाफ बनइहों। 19 तब भगवान ओखर आंखी के हइ मेर लग उंघारथै, कि ऊ अक्ठी पानी के कुंवा देख सकै, इहैनिता हाजिरा कुंवा कर लिघ्घो गइस, अउ अपन थइला के पानी लग भर के पिलाइस। 20 अउ भगवान ओखर संग रथै, जब तक ऊ बढ नेहको गइस, अउ ऊ पतेरा हे रहत-रहत धनही चलामै के सिख जथै। 21 ओखर दाय मिस्र लग ओखर निता दुलही लइस, उन पारान नाम के पतेरा हे रहै लागथै।

22 तब अबीमेलेक अउ सुपाही पीकोल अब्राहम लग बात करिस, पीकोल अबीमेलेक राजा के सुपाही रथै, "तै जउन कुछु करथस, भगवान तोर संग रथै।✝21:22 उत्पति 26:26 23 इहैनिता तै भगवान के आगू किरिया खा, हइ किरिया खा कि तै मोर अउ मोर लरका के निता सही रइहे, तै हइ किरिया खा कि तै मोर पार जिहां कही रइहे ऊ देस के पार दया बाले मनसे रइहे, तै हइ किरिया खा कि मै तोर पल्ला जेकता दया बाले रहों, उतकै तै मोर उप्पर दया बाले रइहे।" 24 अब्राहम कथै, "मै किरिया खइहों।" 25 तब अब्राहम अबीमेलेक लग सिकायत करिस, ऊ इहैनिता सिकायत करिस कि अबीमेलेक के नोकर पानी के अक्ठी कुंवा के हथियाय लेथै। 26 अबीमेलेक कथै, "एखर बारे हे मै हइ नेहको जानथो, मोके नेहको पता, कि हइ कोन करे हबै, अउ तहुं एखर बारे हे मोर लग कबहुन बात नेहको करे।" 27 इहैनिता अब्राहम अउ अबीमेलेक राजा अक्ठी टीमा बांधिन, अउ अब्राहम छेडी-गेडरा गोरू अबीमेलेक के दइस। 28 अब्राहम गेडरा के सातठे छउनन के अलगे करके रखिस। 29 अबीमेलेक राजा अब्राहम लग पूंछथै, "हइ सात गेडरा के छउना के जउन तै अलगे करके रखे हबस, एखर काहिन मतलब हबै?" 30 अब्राहम कथै, "जब तै हइ सातठे छउना के लरका के लइहे ता हइ सबूत होही कि हइ कुंवा के मै खने हव।" 31 इहैनिता एखर बाद हे ऊ कुंवा बेरसेबा*21:31 सातठे गेडरा कर कुंवा कहाइस, जिहां उन अक दूसर लग टीमा बांधे रथै।✝21:31 उत्पति 26:33 32 हइ मेर लग अब्राहम अउ अबीमेलेक बेरसेबा के टीमा बंधे रथै, तब अबीमेलेक राजा अउ ओखर सुपाही पीकोल दोनोझन पलिस्तियन के परदेस हे लउट जथै। 33 अब्राहम बेरसेबा हे झाउ नाम के रूख लगाइस, अउ उहां भगवान लग भजन करिस। 34 अउ अब्राहम पलिस्तियन के देस हे बोहत दिन तक परदेसी हुइके रहिस।