1 अब्राहम अक्ठी अउ डउकी लग काज करिस, जेखर नाम कतूरा रथै।✝25:1 1 इति 1:32,33 2 कतूरा जिम्रान, योकछान, मदना, मिद्यान, इसबाक अउ सहै के पइदा करिस। 3 योकछान लग सेबा अउ ददान के हुइस, ददान के लरका अस्सूर लतूसी अउ लुम्मी मनसे हुइन। 4 मिद्यान कर टोरवा एपा, एपेर, हनोक, अबीदा अउ एल्दा हुइन, हइ सगलू टोरवा अब्राहम अउ कतूरा लग पइदा हुइन। 5 अब्राहम अपन सब कुछ इसहाक के सउप देथै। 6 पय अपन रखेल डउकी लग पइदा टोरवा के सिबाय भेंट दइके अपन जियत हे अपन टोरवा इसहाक लग दुरिहां, पूरब दिसा छो पठोय देथै।

7 अब्राहम एक सव पचहत्तर साल तक जिन्दा रहिस। 8 अब्राहम धीरे-धीरे कमजोर होत गइस, अउ ऊ पूर जीवन जिइस अउ मर गइस, ऊ लम्बा जीवन जिइस, अउ अपन पुरखन के संग गाडे गइस। 9 ओखर टोरवा इसहाक अउ इस्माइल उके मकपेला के गुफा हे गाडिन, हइ गुफा हित्ती सोहर के टोरवा एप्रोन के खेत हे हबै, हइ मम्रे के पूरब हे रथै। 10 हइ उहै गुफा हबै, जेही अब्राहम हित्ती मनसेन लग खरीदे रथै, अब्राहम के ओखर डउकी सारा के संग गाडे गइस। 11 अब्राहम के मरै के बाद भगवान इसहाक के आसीस दइस अउ इसहाक लहैरोई नाम के कुंवा के लिघ्घो रहै लगिस। 12 अब्राहम कर टोरवा इस्माइल जउन सारा के मिस्री हरवाहिन हाजिरा लग पइदा होय रथै, ओखर हइ खानदान हबै। 13 इस्माइल कर टोरवन के नाम पहिला टोरवा कर नाम नबायोत रथै, तब ओखर बाद केदार, अदबेल, मिबसाम हुइस। 14 मिस्मा, दूमा, मस्सा, 15 हदद, तेमा, यतूर, नापीस अउ केदमा हुइन। 16 हइ इस्माइल कर टोरवन के नाम रथै, इनखर नाम के जसना इनखर गांव अउ गढ के नाम हुइस, इहै बारह अपन-अपन इलाका के मुखिया बनिन। 17 जब इस्माइल एक सव तीस साल के हुइस, तब ऊ आखरी सांस लइके मर गइस, ऊ अपन पूरवजन के संग माटी हे मिल गइस। 18 इस्माइल के मनसे हवीला लग सूर तक, जउन मिस्र देस के पूरब हे अउ अस्सूर के रास्ता हे हबै, उहां उन रहत रहिन, हर मनसे अपन भाई-बेहन के बिरोध बसे हर रथै।

19 हइ अब्राहम कर टोरवा इसहाक के परवार के किस्सा हबै, अब्राहम इसहाक के पइदा करे रथै। 20 जब इसहाक चालीस साल के हुइस ता ऊ रिबका लग काज हुइस, रिबका पद्दनराम के रहै बाले रथै, ऊ अरामी बतूएल के टोरिया रथै, अउ लाबान के बेहन रथै। 21 इसहाक के डउकी के लरका नेहको होथै, इहैनिता इसहाक भगवान लग बिनती करिस, अउ भगवान इसहाक के बिनती के सुन लेथै तब रिबका लादा हे रथै। 22 जब रिबका लादा हे हुइस तब ऊ अपन लरका लग बोहत परेसान हुइस, लरका ओखर लादा हे आपस हे लडथै, रिबका भगवान लग बिनती करिस अउ कथै, "मोर संग असना काखे होथै।" 23 भगवान ओखर लग कथै, "तोर लादा हे दुइठे देस हबै, अउ दुइ परवार के राजा तोर लग पइदा हुइहिन*25:23 होंगे अउ ऊ दुइ जात हे बट जइहिन, अक्ठी टोरवा दूसर टोरवा लग बलवान होही, बडा टोरवा नान टोरवा के सेबा करही।" 24 अउ जब टेम पूरा हुइस ता रिबका जुडवा लरका के पइदा करिस। 25 पहिला लरका लाल रथै, ओखर सगलू सरीर कम्बल के जसना रोमा रथै, इहैनिता ओखर नाम एसाव धरिन। 26 जब दूसरा टोरवा पइदा हुइस, ऊ एसाव के एडी के पकडे रथै, इहैनिता ऊ लरका के नाम याकूब धरथै, इसहाक के उमर ऊ टेम साठ साल रथै, जब याकूब अउ एसाव के पइदा होय रथै। 27 जब दोनो लरका बडा हुइस तब एसाव पतेरा हे रहैबाले चतुर सिकारी बनिस, पय याकूब सीधा साधा मनसे रथै, ऊ अपन तम्बू हे रथै।

28 इसहाक एसाव लग माया करथै, काखे ऊ एसाव सिकार के मांस खाय करथै, रिबका नान टोरवा याकूब लग माया करथै। 29 एक बेर एसाव पतेरा लग लउटिस, ऊ बोहत थके रथै, अउ भुखाय रथै, अउ याकूब कुछ दार के पकाउत रहै। 30 इहैनिता एसाव याकूब लग कथै, "मै भूंख लग कमजोर होउथो, तै ऊ लाल दार मसे कुछु खाये के दे।" इहै कारन हबै कि मनसे उके एदोम कथै। 31 पय याकूब कथै, "तै पहिले लरका होमै का हक*25:31 पहिलउठा, मतलब अधिकार बाफ के मरै के बाद बाफ के बोहत लग बोहत धन डेरा पहिले टोरवा के मिलथै, बडा टोरवा परवार कर नबा हकदार होथै। मोके आज देय के होही।" 32 एसाव कथै, "मै भूंख लग मरे जथो, हइ हक मोर निता काहिन फायदा होही?" 33 याकूब कथै, पहिले मोर लग किरिया खा, अउ एसाव ओखर लग किरिया खाइस, अउ ऊ अपन बडा भाई होय के हक खोय देथै। 34 एखर बाद याकूब एसाव के रोटी अउ चूर हर मसरी कर दार देथै, ऊ खाइस पीइस अउ उठके कढ गइस, हइ मेर एसाव हइ दिखाइस कि ऊ पहिले टोरवा होमै के अपन हक के परवाह नेहको करिस।