उत्पत्ति 26

इसहाक गरार हे निवास

1 एक बेर अकाल पडिस, हइ अकाल ओसना रथै जसना अब्राहम के टेम हे पडे रथै, इहैनिता इसहाक गरार सहर हे पलिस्तियन के राजा अबीमेलेक राजा के लिघ्घो गइस। 2 भगवान इसहाक लग बात करिस, भगवान इसहाक लग हइ बात करिस, "मिस्र देस छो झइ जा, उहै देस हे रह जेहमा रहै के आदेस तोके मै दय हव। 3 उहै देस हे रह अउ मै तोर संग रइहों, मै तोके आसीस दइहों, मै तोके अउ तोर परवार के हइ सगलू परदेस दइहों, मै उहै करिहों जउन मै तोर बाफ अब्राहम के बचन दय हव। 4 मै तोर परवार के बादर के तराइया के मेर बोहत बढइहों अउ मै सगलू परदेस तोर परवार के दइहों, भुंइ के सगलू देस तोर परवार के कारन मोर आसीस पइहिन। 5 मै इहैनिता करिहों कि तोर बाफ अब्राहम मोर बात के माने हबै, अउ मै जउन कुछु कहे हव, ऊ करे हबै, अब्राहम मोर आदेसन नियम के माने हबै।" 6 इसहाक रुकिस अउ गरार सहर हे रहै लगिस। 7 इसहाक के डउकी रिबका बोहत सुन्दर रथै, ऊ जिघा के मनसेन इसहाक लग रिबका के बारे हे पूंछथै, इसहाक कथै, "हइ मोर बेहन आय।" इसहाक मोर डउकी कहे लग डरथै, काखे उहां के मनसे ओखर डउकी के पामै के निता ओही मार डरहिन।✝26:7 उत्पति 12:13; 20:2 8 जब इसहाक के उहां रहत बोहत टेम बीत गय, तब अक रोज पलिस्तियन के राजा अबीमेलेक झकिया लग देखथै, कि इसहाक अपन डउकी रिबका के संग छेडखानी करथै।