उत्पत्ति 26

इसहाक गरार हे निवास

1 एक बेर अकाल पडिस, हइ अकाल ओसना रथै जसना अब्राहम के टेम हे पडे रथै, इहैनिता इसहाक गरार सहर हे पलिस्तियन के राजा अबीमेलेक राजा के लिघ्घो गइस। 2 भगवान इसहाक लग बात करिस, भगवान इसहाक लग हइ बात करिस, "मिस्र देस छो झइ जा, उहै देस हे रह जेहमा रहै के आदेस तोके मै दय हव। 3 उहै देस हे रह अउ मै तोर संग रइहों, मै तोके आसीस दइहों, मै तोके अउ तोर परवार के हइ सगलू परदेस दइहों, मै उहै करिहों जउन मै तोर बाफ अब्राहम के बचन दय हव। 4 मै तोर परवार के बादर के तराइया के मेर बोहत बढइहों अउ मै सगलू परदेस तोर परवार के दइहों, भुंइ के सगलू देस तोर परवार के कारन मोर आसीस पइहिन। 5 मै इहैनिता करिहों कि तोर बाफ अब्राहम मोर बात के माने हबै, अउ मै जउन कुछु कहे हव, ऊ करे हबै, अब्राहम मोर आदेसन नियम के माने हबै।" 6 इसहाक रुकिस अउ गरार सहर हे रहै लगिस। 7 इसहाक के डउकी रिबका बोहत सुन्दर रथै, ऊ जिघा के मनसेन इसहाक लग रिबका के बारे हे पूंछथै, इसहाक कथै, "हइ मोर बेहन आय।" इसहाक मोर डउकी कहे लग डरथै, काखे उहां के मनसे ओखर डउकी के पामै के निता ओही मार डरहिन।✝26:7 उत्पति 12:13; 20:2 8 जब इसहाक के उहां रहत बोहत टेम बीत गय, तब अक रोज पलिस्तियन के राजा अबीमेलेक झकिया लग देखथै, कि इसहाक अपन डउकी रिबका के संग छेडखानी करथै। 9 अबीमेलेक राजा इसहाक के बुलाथै अउ कथै, "हइ टोरिया तोर डउकी आय, तै हमर लग काखे कहे कि हइ मोर बेहन आय।" इसहाक ओखर लग कथै, "मै डरत रहों कि तै ओही पामै के निता मोके मार डरहे।" 10 अबीमेलेक राजा कथै, "तै हमर संग बुरा करे हबस, हमर मनसे कउनो डउका तोर डउकी के संग सोय सकथै, तब ऊ बडा पाप के दोसी होतै।" 11 इहैनिता अबीमेलेक राजा सगलू मनसे के चेतन्त करथै, "हइ डउकी के कउ बुरा करथै, अगर कउ इनके चोंट पहुंचाथै, ता ऊ मनसे के जान लग मार दय जही।" 12 इसहाक ऊ देस हे जमीन हे खेती करिस अउ उहै साल सव गुना दाना पइस, भगवान उके आसीस दइस। 13 इसहाक धनी हुइ गइस, ऊ जादा लग जादा धन इकठ्ठा करिस जब तक ऊ धनी नेहको हुइ गइस। 14 ओखर लिघ्घो गेडरा*26:14 भेंड छेडी, गोरू अउ बोहत सेबक-सेबिका रथै, पय पलिस्ती मनसे ओखर लग इसाय लागथै। 15 जउन कुंवा के इसहाक के बाफ अब्राहम के सेबक ओखर जियत हे खोदे रथै, ओही पलिस्ती मनसे माटी लग पाट देथै। 16 अबीमेलेक राजा इसहाक लग कथै, तै हमर लिघ्घो लग कढ जा, काखे तै हमर लग बोहत सक्तिसाली बन गय हबस। 17 इहैनिता इसहाक ऊ जिघा के छांडिस अउ गरार के नान हस नदिया के लिघ्घो जाय के तम्बू खडा करके उहै रहै लगिस। 18 जउन कुंवा ओखर बाफ अब्राहम के जियत हे खोदे गय रथै, उके इसहाक फेरै खोदिस, काखे पलिस्ती मनसे अब्राहम के मिरतू के बाद उन कुंवन के माटी लग पाट दय रथै, इसहाक उन कुंवन के उहै नाम धरथै जउन ओखर बाफ धरे रहै। 19 जब इसहाक के हरवाह नान हस नदिया के लिघ्घो कुंवा खोदिन, ता ऊ कुंवा लग अक्ठी पानी के झिरना मिलथै। 20 तब गरार के बरेदी इसहाक के बरेदी लग लडै लग जथै, उन कथै, हइ पानी हमर हबै। फेर इसहाक ऊ कुंवा के नाम एसेक धरिन, काखे उन इसहाक लग झगडा करे रथै। 21 इसहाक के हरवाह दूसर कुंवा खोदथै, उहां के मनसे ऊ कुंवा के निता झगडा करिन, इहैनिता इसहाक ऊ कुंवा के नाम सितरा धरिस। 22 इसहाक उहां लग हटिस अउ दूसर कुंवा खोदिस, ऊ कुंवा के निता झगडा करै के निता कउनो मनसे नेहको आइन, इहैनिता इसहाक ऊ कुंवा के नाम रहोबोत धरिस, ऊ कथै, "भगवान इहां हमके जिघा दय हबै, हम इहां बढब अउ इहै जमीन हे सफल हुइबे।" 23 ऊ जिघा लग इसहाक बेरसेबा छो गइस। 24 भगवान उहै रात इसहाक लग कथै, "मै तोर बाफ अब्राहम के भगवान यहों*26:24 हूं, झइ डेरा, मै तोर संग हव, अउ मै तोके आसीस दइहों, मै तोर परवार के बडा बनइहों, मै अपन हरवाह अब्राहम के कारन हइ करिहों।" 25 इहैनिता इसहाक ऊ जिघा हे भगवान लग पराथना करै के निता उहां अक्ठी बेदी बनाइस, इसहाक उहां अपन तम्बू गाडिस, ओखर हरवाह उहां अक्ठी कुंवा के खोदिन।

इसहाक अउ अबीमेलेक

26 अबीमेलेक राजा गरार लग इसहाक के देखै के निता आइस, अबीमेलेक राजा अपन संग मन्तरी अहुज्जत अउ सुपाही पीकोल के लाइस।✝26:26 उत्पति 21:22 27 इसहाक उनखर लग कथै, तुम मोर लिघ्घो काखे आय हबा? तै तो मोके बैरी मानथस, तै मोके अपन देस लग निकार दय रहस। 28 उन जबाब देथै, "हम देखे हबन कि भगवान तोर संग हबै, हम चाहथन कि तोर संग टीमा बंधी, अउ तै हमके अक्ठी बचन दे। 29 हम तोके चोंट नेहको पहुंचाय हबन, हम अब तोके हइ बचन दे कि तै हमके चोंट नेहको पहुंचइहे, हम तोके सान्ति लग पठोय रहन, अब साफ हबै कि भगवान तोके आसीस दय हबै।" 30 इहैनिता इसहाक उनखर निता खाना बनवाय रथै, अउ सगलू झन खाइन पियन। 31 दूसर रोज सुबेन्ने उठिन, उन आपस हे बचन दइन अउ किरिया खाइन, तब इसहाक उनके सान्ति लग बिदा करिस, अउ उन खुसी लग ओखर लिघ्घो लग कढ जथै। 32 उहै रोज इसहाक के हरवाह आयके अक्ठी कुंवा के बारे हे बताइस जेही उन खोदे रथै, उन इसहाक लग कथै, हमके पानी मिल गय हबै। 33 इहैनिता इसहाक ऊ कुंवा के नाम सिबा धरिस, अउ ऊ सहर अबहुंन बेरसेबा कहाथै।

एसाव के बिदेसी डउकी

34 जब एसाव चालीस साल के हुइस, ऊ हित्ती डउकी लग काज करिस, अक्ठी बैरी कर टोरिया यहूदीत रथै, दूसर एलोन कर टोरिया बासमत रथै। 35 दोनो पुतउ*26:35 बहु के कारन इसहाक अउ रिबका के मन के दुखी होथै।