Gênesis 38

यहूदा अउ तामार

1 एक टेम असना हुइस कि यहूदा अपन भाई लग अलगे हुइके कढ गइस, ऊ अदुल्लाम सहर के अक्ठी निबासी के लिघ्घो रहै लगिस जेखर नाम हीरा रथै। 2 उहां यहूदा सूआ नाम के अक्ठी कनानी डउका के टोरिया के देखिस, अउ ओखर लग काज करके ओखर लिघ्घो गइस। 3 ऊ लादा हे हुइके अउ ऊ अक्ठी टोरवा के पइदा करिस, यहूदा ओखर नाम एर रखिस। 4 ऊ फेरै लग लादा हे हुइस, ऊ अक्ठी अउ टोरवा के पइदा करिस, दाय ओखर नाम ओनान रखिस। 5 ऊ अक्ठी अउ टोरवा के पइदा करिस, दाय ओखर नाम सेला रखिस, जब ऊ उके पइदा करिस तब ऊ कजीब सहर हे रथै। 6 यहूदा अपन टोरवा एर के निता डउकी के रूप हे चुनिस, ऊ डउकी कर नाम तामार रथै। 7 पय यहूदा कर ऊ जेठ एर बोहत बेकार मनसे रथै, भगवान ओखर लग खुस नेहको रथै, इहैनिता भगवान उके मार डालिस। 8 यहूदा ओनान लग कथै, "तै अपन भाई के डउकी के संग सो, अउ तै ओखर डउका के जसना बन, अगर लरका हुइहिन ता ऊ तोर भाई एर के हुइहिन।" 9 ओनान जानथै कि हइ जोडा लग लरका पइदा ओखर नेहको होही, ओनान तामार के संग सोइस, पय ऊ उके अपन लादा हे नेहको होमै दइस। 10 एखर लग भगवान गुस्सा हुइस, इहैनिता भगवान ओनान के मार डालिस। 11 तब यहूदा अपन बहु तामार लग कथै, "अपन बाफ के घर छो लउट जा, उहै छो रइहे अउ तब तक काज झइ करबे, जब तक मोर नानहस टोरवा सेला बडा झइ हुइ जाय।" यहूदा के डर रथै कि सेलो अपन भाइयन के जसना मारे जाय, तामार अपन बाफ के घर छो लउट गय। 12 बाद हे सूआ के टोरिया यहूदा के डउकी मर गइस, यहूदा अपन सोक के टेम के बाद अदुल्लाम अपन संगी हीरा के संग गेडरन के चूंदी काटे बालेन के लिघ्घो तिम्नाथ गइस। 13 तामार के हइ पता हुइस कि ओखर ससुर यहूदा अपन गेडरा के ऊन काटै के निता तिम्नाथ जथै। 14 तामार बिधवा बाले कपडा उतार देथै इहैनिता ऊ दूसर कपडा पहनिस अउ मुंह के ढांक लइस, तब ऊ तिम्नाथ सहर के लिघ्घो एनैम छो जाय बाले रास्ता के बगल हे बइठे रथै, तामार जानथै कि यहूदा के नानहस टोरवा सेला अब बडा हुइ गय हबै, पय यहूदा ओखर लग काज नेहको करिस। 15 यहूदा उहै रास्ता लग यातरा करिस, ऊ उके देखिस, पय सोचिस कि ऊ बेस्या हबै, काखे मुंह ढंके हर रथै। 16 इहैनिता यहूदा ओखर लिघ्घो गइस अउ बोलिस, "मोके अपन संग सोमै दे।" यहूदा नेहको जानथै कि ऊ ओखर बहु तामार हबै। तामार बोलथै, "तै मोके केतका देबे?" 17 यहूदा जबाब देथै, "मै अपन झुंड लग तोके अक्ठी नबा छेडी पठोहुं।" ऊ जबाब देथै, "मै इके स्बीकार करथो, पय पहिले तै मोके कुछ रखै दे।" 18 यहूदा पूंछथै, मै छेडी पठोहुं एखर साबूत के निता तै मोर लग काहिन लय चाहत? तामार जबाब देथै, "तोर सील, नटेरी के डोरा अउ तोर हाथ के डंडा," यहूदा हइ चीज उके दइ दइस अउ ओखर संग सोइस, तामार ओखर लग लादा हे हुइस। 19 एखर बाद ऊ उठके कढ गइस, ऊ मुंह हे ढंके बाले कपडा हटाय दइस, अउ बिधवा डउकी के कपडा पहिन लइस। 20 यहूदा अपन अदुल्लामवासी संगी हीरा के तामार के घर ओखर टीमा करे हर छेडी दे के निता पठोइस, यहूदा हीरा लग खास करके सील अउ हाथ के डंडा ओखर लग लामै के निता कहिस, पय हीरा ओखर पता नेहको लगाय सकिस। 21 हीरा एनैम सहर के कुछ मनसेन लग पूंछथै, "रास्ता के टाठा हे जउन बेस्या रथै ऊ कछो हबै?" मनसे कथै, "इहां कबहुन कउनो बेस्या नेहको रथै।" 22 इहैनिता यहूदा के संगी यहूदा के लिघ्घो लउट गइस अउ ओखर लग कथै, "मै ऊ डउकी के पता नेहको लगाय सको, जउन मनसे ऊ जिघा हे रथै, उन गुठेइन कि उहां कबहुन कउनो बेस्या नेहको रथै।" 23 इहैनिता यहूदा कथै, "उके ऊ चीज के रखे देया, मै नेहको चाहथो कि मनसे हमर मजाक उडामै, मै उके छेडी दे चाही, पय हम ओखर पता नेहको लगाय सकन हइ बात बोहत हबै।" 24 करीबन तीन महिना बाद कउनो यहूदा लग कथै, "तोर पुतउ तामार बेस्या के मेर पाप करे हबै अउ अब ऊ लादा हे हबै।" तब यहूदा कथै, "उके बाहिर निकारा अउ मार डाला, ओखर सरीर के भूंज डारा।" 25 जब मनसे उके बाहिर निकारत रहै तब ऊ अपन ससुर के हइ संदेस पठोथै, जउन मनसे के हइ चीज हबै, ओखर उप्पर मोके गरब हबै, किरपा धियान लग देखा कि हइ चीज सील, डोरा अउ डंडा कोनहर मनसे करे हबै? 26 यहूदा उन चीजन के चीन लेथै, अउ कथै, "हइ ठीक कथै, मोर गलती हबै, मै अपन टीमा के जसना अपन टोरवा सेला के इके नेहको दयों," अउ यहूदा ओखर संग फेर नेहको सोइस। 27 जब तामार के लरका पइदा करे के टेम आइस अउ उके पता चलथै, कि मोर लादा हे जुडवा लरका हबै। 28 जब ऊ लरका के पइदा करत रथै तब अक्ठी टोरवा हाथ बाहिर निकाडिस, दादी ओखर हाथ पकडिस अउ ओखर हाथ हे अक्ठी लाल डोरा बांध के कथै, हइ लादा लग पहिलेन बाहिर निकडे हबै। 29 पय ऊ लरका अपन हाथ वापिस भित्तर तीन लइस, तब दूसर लरका पहिले पइदा हुइ गय, तब दादी कथै, तहिन पहिलेन बाहिर निकडै हे आगू आय, इहैनिता उन ओखर नाम पेरेस धरिस। 30 ओखर पइदा के बाद ओखर भाई जेखर हाथ हे लाल डोरा बांधे रथै, लादा लग बाहिर निकडिस, ओखर नाम "जेरह" धरे गइस।