उत्पत्ति 45

यूसुफ खुद के अपन भाइन हे परगट करिस

1 तब यूसुफ उन सब के आगू जउन ओखर लिघ्घो अगल बगल ठाढ रथै, खुद के अउ नेहको रोक सकिस अउ चिल्लाय के कथै, "मोर अगल बगल लग सब मनसे के बाहिर कर देया।" जब यूसुफ खुद के भाई के आगू परगट करिस तब ओखर संग कउ नेहको रथै।✝45:1 प्रेरितो 7:13 2 तब ऊ चिल्ला चिल्लाय के रोमै लग जथै अउ मिस्र देस के मनसे सुनिन अउ फिरोन के घर के मनसे एखर संदेस मिलिस। 3 यूसुफ अपन भाई लग कथै, "मै यूसुफ हव, का अब तक मोर बाफ जिन्दा हबै?" ओखर भाई ओही जबाब नेहको दइ सकथै, काखे उन ओखर आगू घबराय गय रथै। 4 फेर यूसुफ अपन भाई लग कथै, "मोर लिघ्घो आबा।" हइ सुनके ऊ लिघ्घो गइन, फेर ऊ कथै, "मै तुम्हर भाई यूसुफ हव, जेही तुम मिस्र देस लग आय बाले के हाथ हे बेच दय रथा। 5 अब परेसान झइ होबा, तुम अपन करे हर गलती के निता दुख झइ होबा, ऊ मोर निता भगवान के योजना रथै कि मै इहां आव, मै इहां तुम्हर जीवन बचामै के निता आय हव। 6 पिछले दुइ साल लग ई देस हे अकाल पडथै, अबे पांच साल अउ बाकी हबै, ऊ टेम हे न नागर चलही अउ न फसल होही। 7 इहैनिता भगवान तुम्हर लग मोके पहिले पठोय हबै जेखर लग मै ई देस हे तुमके बचाय सको, अउ तुम्हर लरका बच सकै। 8 इहैनिता तुम नेहको, पय भगवान मोके इहां पठोय हबै, उहै मोके फिरोन के बाफ जसना बनाइस, ताकि मै ओखर सगलू परवार अउ सगलू मिस्र देस के परभु रहों।" 9 हरबी करा अउ मोर बाफ के लिघ्घो जाय के उनखर लग कहा, तोर टोरवा यूसुफ हइ कथै, भगवान सगलू मिस्र देस के मालिक मोके बनाय हबै, अब झइ रुका पय मोर लिघ्घो लइके आ जा।✝45:9 प्रेरितो 7:14 10 तुम गोसेन परदेस हे रइहा, तुम अपन टोरवा, नाती, छेडी गेडरा, गाय गोरू अउ अपन सगलू चीज सहित मोर लिघ्घो रइहा। 11 अकाल के पांच साल हे मै तुम्हर देख-रेख करिहों, हइ मेर तोर अउ तोर परवार के जउन चीज हबै, उनखर तोके खोय के नेहको पडही। 12 यूसुफ अपन भाई लग बात करत रथै, ऊ कथै, "अब तुम देखत रहा कि हइ सहीमा मै हव, अउ तुम्हर भाई बिन्यामीन जानथै कि हइ मै यहों। मै तुम्हर भाई तुम्हर लग बात करथो। 13 इहैनिता मोर बाफ लग मोर मिस्र देस के जादा डेरा के बारे हे कहे, तुम जउन इहां देखे हबा, ऊ हर चीज के बारे हे मोर बाफ के गुठे, अब हरबी करा अउ मोर बाफ के लइके मोर लिघ्घो आबा।" 14 तब यूसुफ अपन भाई बिन्यामीन के गले लगाय के रोमै लगिस, उहो ओखर गले लगाय के रोइस। 15 ऊ अपन सगलू भाई के चूमिस अउ उनही गले लगाय के रोइस, एखर बाद यूसुफ के भाई ओखर लग बात चीत करिस। 16 हइ बात के संदेस यूसुफ के भाई आय हबै, तब फिरोन के भवन तक पहुंच गइस अउ एखर लग फिरोन अउ ओखर हरवाह खुस हुइन। 17 इहैनिता फिरोन यूसुफ लग कथै, असना करा कि, "अपन भाई लग कहि दे कि उनके जेतका दाना चाही लइ ले अउ अपन पसु हे लाद के कनान देस छो लउट जाय। 18 उहां लग ऊ अपन बाफ अउ अपन सगलू परवार के लइके तुम्हर लिघ्घो आमै, मै उनके मिस्र देस के सब लग निक्खा चीज देहुं, ऊ मिस्र देस के निक्खा चीज खइहिन। 19 उनके आदेस देया कि ऊ नान-नान लरका अउ डउकी के निता मिस्र देस लग गाडी लइ जाय अउ अपन बाफ के लइके आमै। 20 ऊ अपन सामान के चिन्ता झइ करै, काखे सगलू मिस्र देस के निक्खा चीज उनखरै हबै।" 21 याकूब के टोरवा असना करिन, यूसुफ उनके फिरोन के आदेस के जसना गाडी दइस, रास्ता के निता खाना पीना दइस। 22 यूसुफ हर भाई के अक-अक्ठी जोडा कपडा दइस, पय बिन्यामीन के पांच जोडा कपडा दइस अउ यूसुफ ओही तीन सव चांदी के खोटन्ना दइस। 23 ऊ अपन बाफ के हइ चीज पठोइस, दस गदहा हे लदे मिस्र देस के निक्खा चीज, दस गदही हे लदे दाना अउ रोटी अउ बाफ के यातरा के निता भोजन चीज पठोइस। 24 तब यूसुफ अपन भाई के जाय के निता कहिस, जब ऊ जामै का हुइन तब यूसुफ उनखर लग कथै, "सीधा घर छो जा अउ रास्ता हे झइ लडिहा।" 25 हइ मेर भाई मिस्र देस के छांडिन अउ कनान देस हे अपन बाफ याकूब के लिघ्घो गइन। 26 उन अपन बाफ के गुठेइन, "यूसुफ अबे जिन्दा हबै, ऊ पूरे मिस्र देस के राजा हबै।" उनखर बाफ चकित हुइस, याकूब उनखर बात हे बिस्वास नेहको करिस। 27 तब उन अपन बाफ लग यूसुफ के सगलू बात गुठेइस, जउन ऊ उनखर लग कहे रथै, जब याकूब उन गाडी के देखिस, जउन यूसुफ ओही लामै के निता पठोय रथै, तब ऊ बोहत जादा खुस हुइस। 28 इस्राएल याकूब कथै, "अब मोके बिस्वास हबै कि मोर टोरवा यूसुफ अबे जिन्दा हबै, मै मरै लग पहिले उके देख सकहूं।"