1 इहैनिता याकूब मिस्र देस के अपन यातरा सुरुवात करिस, पहिले बेरसेबा छो गइस, उहां अपन बाफ इसहाक के भगवान के धन्यवाद दइस अउ उके बलि चढाइस। 2 तब भगवान रात के सपना हे याकूब लग कथै, "हे याकूब, हे याकूब," एखर बाद ऊ कथै, "काहिन आदेस हबै?" 3 तब ऊ कथै, "मै भगवान यहों, तोर बाफ के भगवान, तै मिस्र देस छो जाय लग झइ डेरा, काखे मै उहां तोर लग अक्ठी बडा देस बनाहुं। 4 मै तोर संग मिस्र देस छो जइहों अउ उहां लग तोके फेरै वापिस लइहों, तोर मिरतू हे यूसुफ तोर आंखी के बन्द करही।" 5 तब याकूब बेरसेबा लग चल पडिस, जउन गाडी फिरोन याकूब के लामै के निता पठोय रथै, ओहमा याकूब कर टोरवा अपन बाफ, नान-नान टोरवा अउ अपन डउकी के बइठाय के उनके लइ गइन। 6 उनखर लिघ्घो पसु अउ कनान देस हे उनखर अपन जउन कुछु रथै, उहो संग रथै, हइ मेर याकूब अपन सगलू लरका अउ परवार के संग मिस्र हे गइस।✝46:6 प्रेरितो 7:15 7 ओखर संग ओखर टोरवा अउ टोरिया, नाती, नतिनिया रथै, ओखर सगलू परवार ओखर संग मिस्र देस हे लइ आनिस। 8 हइ याकूब के उन टोरवन अउ परवार के नाम हबै जउन ओखर संग मिस्र देस गइन, रूबेन याकूब के पहिला टोरवा रथै। 9 रूबेन कर टोरवा, हनोक, पललू, हेस्रोन अउ कर्म्मी रथै। 10 सिमोन कर टोरवा, यमूएल, यामीन, ओहद, याकीन, सोहर अउ अक्ठी कनानी डउकी लग पइदा हुइस साउल रथै। 11 लेवी कर टोरवा गेर्सोन, कहात अउ मरारी रथै। 12 यहूदा कर टोरवा, एर, ओनान, सेला, पेरेस अउ जेरह। एर अउ ओनान के मिरतू कनान देस हे हुइ गय रथै, पेरेस कर टोरवा हेस्रोन अउ हामूल रथै। 13 इस्साकार कर टोरवा तोला, पुब्बा योब अउ सिम्रोन रथै। 14 जबूलून कर टोरवा सेरेद, एलोन अउ यहलेल रथै। 15 हइ लिया कर टोरवा रथै, जेही ऊ याकूब लग पद्दनराम इलाका हे पइदा करे रथै, ओखर टोरिया दीनो रथै, हइ सगलू टोरवा-टोरिया, नाती, नतिनिया सब के मिलायके तैंतीस झन रथै। 16 फेर गाद कर टोरवा सिय्योन, हाग्गी, सूनी, एसबोन, एरी, अरोदी अउ अरेली रथै। 17 आसेर कर टोरवा इम्ना, इस्वा, इस्वी अउ बरीया रथै, अउ उनखर बेहन सेरह रथै अउ बरीया कर टोरवा हेबेर अउ मल्कीएल रथै। 18 हइ जिल्पा जेही लाबान अपन टोरिया लिया के दय रथै, ओखर टोरवा नाती सब इहै रथै, अउ ओखर दवारा याकूब के सोलह मनसे पइदा हुइस। 19 याकूब के डउकी राहेल के टोरवा यूसुफ अउ बिन्यामीन रथै। 20 यूसुफ मिस्र देस हे ओन के पुजारी पोतीपेरा कर टोरिया लग काज हुइस अउ आसनत लग यूसुफ के दुइठे टोरवा पइदा हुइन, जेखर नाम हबै, मनस्से अउ एप्रैम। 21 बिन्यामीन कर टोरवा बेला, बेकेर, अस्बेल, गेरा, नामान, एही, रोस, मुप्पीम, हुप्पीम अउ आर्द रथै। 22 ऊ याकूब कर डउकी राहेल लग पइदा हुइन, ओखर टोरवा रथै, ई परवार हे चउदह मनसे रथै। 23 दान कर टोरवा हूसीम रथै। 24 नप्ताली कर टोरवा यहसेल, गूनी, सेसेर अउ सिल्लेम रथै। 25 ऊ याकूब अउ बिल्हा कर टोरवा रथै, बिल्हा जेही लाबान अपन बिटिया राहेल के दय रथै। ई परवार हे सात मनसे रथै। 26 हइ मेर याकूब के परवार मिस्र हे पहुंचिन, याकूब के बहुवन के छांड के कुल छियासठ मनसे रथै। 27 यूसुफ कर टोरवा, जउन ओही मिस्र देस हे पइदा होय रथै, दुइठे रथै, हइ मेर लग याकूब के परवार के मनसे जउन मिस्र देस लग आय रथै, कुल सत्तर मनसे रथै।✝46:27 प्रेरितो 7:14

28 याकूब पहिले यहूदा के यूसुफ के लिघ्घो पठोथै, यहूदा गोसेन परदेस हे यूसुफ के लिघ्घो गइस, जब याकूब अउ ओखर मनसे ऊ परदेस हे गइन। 29 तब यूसुफ के पता चलथै कि ओखर बाफ लिघ्घो आ गय हबै, इहैनिता यूसुफ अपन रथ तइयार करवाथै अउ अपन बाफ इस्राएल लग गोसेन परदेस के मिलै के निता कढ गइस, जब यूसुफ अपन बाफ के देखिस तब ऊ ओखर गले लग गइस अउ बोहत देरी तक रोथै। 30 तब याकूब यूसुफ लग कथै, "अब मै मर सकथो, काखे मै तोके देख लय हव, कि तै अब तक जिन्दा हबस।" 31 तब यूसुफ अपन भाई अउ बाफ के परवार के मनसे लग कथै, अब मै जाय के फिरोन लग कइहों, "कि मोर भाई अउ मोर बाफ के परवार जउन कनान देस हे रथै, मोर लिघ्घो आय गय हबै।" 32 हइ मनसे बरेदी हबै, काखे उन पसुन के पालत आय हबै, ऊ अपन संग गेडरा छेडी गोरू अउ अपन सगलू डेरा के लाय हबै। 33 जब फिरोन तुमके बुलाही अउ "तुम्हर लग पूंछही कि तुम काहिन काम करथा?" 34 तब तुम कहबे, "तोर सेबक, हम अउ हमर पुरखा बचपन लग अब तक पसु, छेडी, गेडरा पालत आय हवन, जेखर लग तै गोसेन परदेस हे रह सकस, मिस्र देस के रहै बाले मनसे बरेदी लग घिनाथै।"