Gênesis 47

1 तब यूसुफ फिरोन के लिघ्घो गइस अउ ऊ कथै, "मोर बाफ, मोर भाई अउ उनखर सगलू परवार इहां आ गय हबै, ऊ अपन सगलू पसु, गेडरा, छेडी अउ कनान देस हे उनखर अपन जउन कुछु रथै, उनखर संग हबै, ई टेम ऊ गोसेन परदेस हे हबै।" 2 यूसुफ अपन भाई मसे पांच मनसे चुन के उनके फिरोन के लिघ्घो ठाढ करिस। 3 फिरोन यूसुफ के भाई लग पूंछथै, तुम्हर काहिन काम हबै? उन ओही जबाब देथै, हम तोर सेबक, अपन पुरखन के जसना गेडरा, छेडिन के बरेदी हवन। 4 उन फिरोन लग इहो कथै, हम मिस्र देस हे रहै के निता आय हवन, कनान देस हे बोहत जादा अकाल पडे हबै, इहैनिता तोर सेबकन के गेडरा छेडी के निता चारा नेहको हबै, अब किरपा करके अपन सेबकन के गोसेन परदेस हे रहै के आदेस दे। 5 फिरोन यूसुफ लग कथै, "तुम्हर बाफ अउ भाई तुम्हर लिघ्घो आय हबै। 6 तै मिस्र देस हे कउनो जिघा उनखर रहै के निता चुन सकथस, अपन बाफ अउ अपन भाई के सब लग निक्खा जमीन दे, उनके गोसेन परदेस हे रहन दे अउ अगर उन मसे कउनो निक्खा बरेदी हबै, ता ऊ मोर पसु के देख रेख कर सकथै।" 7 यूसुफ अपन बाफ के लिघ्घो आइस, ऊ ऊके फिरोन के लिघ्घो ठाढ करिस, याकूब फिरोन के आसिरवाद दइस। 8 फिरोन याकूब लग पूंछिस, "तोर केतका उमर हबै?" 9 याकूब फिरोन लग कथै, "बोहत जादा कस्ट के संग मोर नान जीवन रहिस, मै केबल एक सव तीस साल जीवन बितायों, मोर बाफ अउ उनखर बाफ मोर लग जादा उमर तक जिन्दा रहिन।" 10 याकूब फिरोन के आसिरवाद दइस, तब फिरोन लग बिदा लइके कढ गइस। 11 यूसुफ फिरोन के आदेस के मानिस, ऊ अपन बाफ अउ भाई के मिस्र देस हे जमीन दइस, हइ रामसेस सहर के लिघ्घो मिस्र हे सब लग निक्खा जमीन रथै। 12 यूसुफ अपन बाफ अउ भाई अउ अपन बाफ के सगलू मनसे के गिनती जसना खाना पीना के इन्तजाम कर दइस।

अकाल के टेम हे यूसुफ के परबन्ध

13 उस सगलू देस हे अकाल के टेम अउ जादा बुरा हुइ गइस, देस हे कहुं भोजन दाना नेहको रथै, हइ बेकार टेम के कारन मिस्र अउ कनान देस हे बोहत जादा गरीबी हुइ गय। 14 जेतका पइसा मिस्र अउ कनान देस हे रथै, मनसे जादा लग जादा दाना खरीदै लगिस, यूसुफ दाना बचाय के अउ उके फिरोन के महल हे जमा करवाय दइस। 15 कुछ टेम बाद मिस्र अउ कनान देस के मनसे के लिघ्घो पइसा नेहको रथै, उन अपन सगलू पइसा दाना खरीदै हे खरच कर देथै, इहैनिता मनसे यूसुफ के लिघ्घो गइस अउ बोलथै, "किरपा करके हमके खाना दे, हमर पइसा खतम हुइ गय हबै, अगर हम नेहको खउबे ता तोर देखत-देखत हम मर जउबे।" 16 यूसुफ कथै, "अगर पइसा नेहको हबै ता अपन पसु के दइ देया अउ मै उनखर बदला तुमके दाना देहुं।" 17 इहैनिता मनसे अपन पसु, छेडी, गदहा, घोडवा अउ दूसर सगलू जानवर के दाना खरीदै के निता निस्तार हे लामै लगिन अउ ऊ साल यूसुफ उनखर पसु के लइस अउ दाना दइस। 18 पय दूसर साल मनसे के लिघ्घो पसु नेहको रथै अउ दाना खरीदै के निता कुछु नेहको रथै, इहैनिता मनसे यूसुफ के लिघ्घो गइन अउ कथै, "तै तो जानथस कि हमर लिघ्घो पइसा नेहको बचे हबै अउ हमर सगलू पसु तोर हुइ गय हबै, इहैनिता हमर लिघ्घो कुछु नेहको बचे हबै, जउन कुछु बचे हबै ता केबल, हमर सरीर अउ हमर जमीन। 19 हम अउ हमर खेतवा तोर रहत काखे नास होय? तै दाना दइके हमके अउ हमर खेत के खरीद ले, तब हम अउ हमर खेतवा फिरोन के गुलाम हुइ जउबे, हमके अनाज दे, जेखर लग हम झइ मरी पय जिन्दा रही, हमर खेत झइ बरबाद होय।" 20 इहैनिता यूसुफ मिस्र देस के सगलू जमीन फिरोन के निता खरीद लइस, मिस्र देस के सगलू मनसे अपन जमीन के यूसुफ के हाथ बेच दइस, उन हइ इहैनिता करिन काखे उन बोहत जादा भूंखे रथै। 21 यूसुफ अक छोर लग दूसर छोर तक मिस्र देस हे जउन मनसे रथै, उनके ऊ सहर हे लाय के बसाय दइस। 22 अक्ठी केबल जमीन यूसुफ नेहको खरीदिस जउन पुजारिन के हक हे रथै, पुजारी के जमीन बेचै के जरूरत नेहको पडिस, काखे फिरोन उनखर काम के निता उनके बेतन दय करथै, इहैनिता उन ई पइसा के खाय के निता दाना खरीदै हे खरच करिन। 23 यूसुफ मनसे लग कथै, देखो, आज मै तुमके अउ तुम्हर खेतवन के फिरोन के निता खरीदै हव, हइ बिजहा तुम्हर निता हबै, तुम इके खेतवन हे बोवा। 24 अउ जउन कुछु होही ओखर पचमा हिस्सा फिरोन के दइहा, बाकी चार हिस्सा तुम उके अपन खेतवन हे बोवा अउ अपन-अपन लरका अउ घर के मनसे सहित खइहा पीहा। 25 उन बोलथै, "तै हमर जीवन के रक्छा करे हवस, अगर हमर मालिक हमर उप्पर किरपा द्रस्टि बनाय रखै, ता हम फिरोन के गुलाम बने रहब।" 26 इहैनिता यूसुफ ऊ टेम मिस्र देस हे अक्ठी नियम बनाइस अउ ऊ नियम अब तक चले आउथे, नियम के जसना जमीन लग हर अक्ठी उपज के पचमा हिस्सा फिरोन के हबै, फिरोन सगलू जमीन के मालिक हबै, केबल उहै जमीन नेहको हबै जउन पुजारिन के हबै।

याकूब कर आखरी बिनती

27 इस्राएली मिस्र देस के गोसेन परदेस हे रहै लगिस, उन ओखर उप्पर हक जमाय लइस, ऊ फलिन-फूलिन अउ भुंइ हे भर गइन। 28 मिस्र देस हे याकूब सतरह साल तक रहिस, हइ मेर याकूब के कुल साल एक सव सइतालिस साल के हुइस। 29 याकूब के मरै के दिन आइस तब उन अपन टोरवा यूसुफ के बुलाय के ओखर लग कथै "अगर तै मोर इज्जत करथस ता मोर जांघ के तरी हाथ मढाय के किरिया खा कि तै मोर संग किरपा अउ सही बेउहार करबे, मोके मिस्र देस हे झइ गाडबे।✝47:29 उत्पति 50:6 30 जब मै अपन पुरखा के संग मर जइहों, तब तै मोके मिस्र देस लग उठाय के उनखरै मरघटी हे रखबे।" तब यूसुफ कथै, "मै तोर टीमा के जसना करिहों।" 31 तब याकूब कथै, "मोर लग टीमा कर" अउ यूसुफ ओखर लग टीमा करिस कि ऊ इके पूर करही, तब याकूब अपन मूंड खटिया हे पाछू धरिस।✝47:31 इब्रानिन 11:21