Salmos 39

Dawiti Zammareta Kaabbo Edotaanes Yexxida Mazamure

1 Tani, «Inxarsan

nagara ooththontta mala

tani ta oge naagana;

iita asati

ta sinththan diza wode

ta doona gordana» gadis.

2 Tani duude mala co7u gadis;

haray attoshin lo7o miish

haasayanaappeka co7u gadis;

gido attiin ta waayey

haa darides.

3 Ta wozinay qofan seellides;

ta yuushsha qoppishin tama mala

eexxi kezides.

Histtiin tani haasaya doommadis.

4 «Abeet GODAWU!

Ta de7o wurseththanne

taas de7anaas attida gallassata

tana bessa.

Qasse ta daana layththay

ay keena qaanththako

tana erisa.

5 Neni ta layththa

qii tadhdhako keena kessadasa;

ta layththi ne sinththan

qoodan baynda mala;

tumappe asi ubbay

issito aadhdhi biza carko mala.

6 Tumappe asa duussi eesho mala;

coo mela hada haaro

shiishon daaburees;

gido attiin ooni ekkanaakko erenna.

7 «Abeet Godawu!

Neeppe attiin hara

oonakko xeelloo?

Ta hidotay nenana.

8 Ta mooro ubbaafe tana ashsha;

eeyata miichchas tana kessofa.

9 Hayssa ubbaa ooththiday

nena gidida gishshas

tani co7u gaana;

doonakka pogikke.

10 Ne boshaa ta bollafe denththa;

Ne wolqqama shochcha gaason

ta daaburadis.

11 Neni as iza nagara gishshas

seeraasanne muraasa;

izas diza al7o miish bada mala

ne wursaasa;

tumappe asi ubbay issito

carki aadhdhiza carko mala.

12 «Abeet GODAWU!

Ta woosa siya;

tana maaddanaas ta waasoza ezga.

Ta afunththaa co7u gooppa;

tani kase ta aawata ubbaa mala

bete asinne imath gidada

ne keeththan days.

13 Tani guye simma yaanaas

dandayonttaso baanaappe kase

guuththa wode ufayettana mala

tana aggaasharkkii!» gadis.