Mateus 18

Kulinga mbuli kwa mtumigwa ija hogela kumgongo

21 Amala Petulo kamuwinza Yesu kamuuza, "Ivo, ndugu yangu yahanisovula nigele kumgongo mala nyingahi? Ivo, mala saba?" 22 Yesu kamwidikila kamulongela, "Silonga mala saba tu, mbali sabini mala saba. 23 Ndiyo mana ufaume wa kuulanga kwa Mulungu uilinga na mfaume imwe kalawa kuita kulola hisabu za watumigwa wake. 24 Viyasongile kupeta, kagaligwa munhu imwe yakalile yodaigwa chiasi cha sente mimilioni mingi. 25 Munhu iyo hakalile na chinhu cha kuliha, ivo mfaume wake kalagiza yaguligwe yeye na mwehe wake na wanage na vose yeli navo ili kuliha choyodaigwa. 26 Baho ija mtumigwa kamtumbalila mavindi kalonga, ‘Nokupula unionele bazi nokuliha deni jako.’ 27 Ija mfaume kamonela bazi, na kamlekela deni jake kamleka yasegele. 28 Mbali ija mtumigwa kasegela, kamvika imwe mwa watumigwa wayage yakalile na deni da sente chidogo. Kamgoga kamfida, ‘Liha deni jangu!’ 29 Iyo mtumigwa miyage kamtumbalila mavindi kampula, ‘Unionele bazi nokuliha.’ 30 Mbali yeye halondile kugela kumgongo, ila kamgala muing’anda yakufungila wanhu mbaka baho honda yamlihe dija deni. 31 Ivo watumigwa wayage viwaonile mbuli ino wagevuzika ng’hani na waita kumlongela mndewa wao mbuli ija ilawilile. 32 Baho ija mfaume kamkema mtumigwa iyo kamlongela, ‘Gweye mtumigwa wihile ng’hani! Kunipula na niye nigela kumgongo deni jako jose. 33 Ivo, haulondeke kumonela bazi mtumigwa miyago kama vinikuonele bazi?’ 34 Baho, iyo mfaume kagevuzika ng’hani kamsola ija mtumigwa, kamgala muing’anda yakufungila wanhu wamdununze mbaka hondayalihe deni jose." 35 Yesu kakomeleza kwa kulonga, "Vino ivo Tata yangu yeli Kuulanga kwa Mulungu vonda yawatendele kama na mweye homgela kumgongo waja muwadai.