Mateus 2

Wanhu weli na ilimu ya nhondo wavika kumlola Yesu

1 Yesu viyavumbuke muikae ya Betelehemu uko Uyahudi, msimo Helode viyakalile mfaume. Bahaja tu viyavumbuke Yesu, wanhu weli na ilimu ya nhondo kulawa kuusimbukilo wa zua wavika Yelusalemu, 2 wauza,"Amwee! Kakulihi imwana, yavumbuke mfaume wa Wayahudi? Kwavija chiiona nhondo yake viilawilile kulawa kuusimbukilo wa zua, nacheye chiza kumfugamila." 3 Mfaume Helode viyahulike gago, iyo na hamwe wose wokala Yelusalemu, wagwa fufunhende ng’hani. 4 Ivo, Helode kawakema hamwe na walava nhambiko wakulu wose na wafunda ndagizi za Musa, kawauza, "Kilisito kovumbuka kulihi?" 5 Wao wamwidika, "Muikae ya Betelehemu, isi ya Yudea." Ivo viyandike mlagusi wa Mulungu.

6 ‘Ngweye, Betelehemu isi ya Yuda, gweye huli mdodo mbee muulongozi wa kae za Yudea,

Kwavija kumwako kolawa mlongozi yonda yawalongoze Waizilaeli.’"

7 Baho Helode kawakema hamgwazo wanhu weli na ilimu ya nhondo na kulonda kuvimanya vinogile kulawa kumwao msimo nhondo ija viiyoneke. 8 Amala kawalagiza waite Betelehemu kawalongela, "Gendeni mkazambwile goya mbuli za mwana iyo, muhavimanya ngalileni usenga ili na nie nidahe kuita kumfugamila."

9 Viwamtegeleze mfaume, waja wanhu weli na ilimu ya nhondo wasegela. Kumbe ija nhondo iwaonile ubanzi wa usimbukilo wa zua iwalongolela iita ima hachanha ha hanhu haja hayali imwana.

10 Viwaionile nhondo ija wadeng’helela ng’hani. 11 Ivo, wengila mng’anda, wamuona ija mwana na Malia mami yake, waja wanhu watumbala mavindi, wamfugamila. Amala wafungula mbahasha zao, wamwing’ha nhunza, ikala zahabu, ubani na mavua ga manemane.

12 Mulungu kawalalika mzi nzozi seke wabwele kwa Helode," wabwela mzikae zao kwa kubitila nzila imwenga.