Êxodo 10

Ki’gu’mo cha munane: Nzige

1 Gu’ku' Mulungu wamuwi’laga Mose, "Yaga ku’mwa Falao. Ene namuv’ezyaga av’e na moyo mulambu haki’mo na v’akumba v’akwe ki’gele mbezye lu’manyi’lo lwa migaka mugati' nav’o. 2 Hangi' na inywe mwize muv’atentemuli’le v’ana na v’izu’ku’lu' v’inywe, i’vyo nav’av’ezezizye V’amisili ku' wu’daki, na ku’v’ezya lu’manyi’lo lwa migaka mugati' nav’o. Hu' i’vyo mulamanye ku’v’a ene ni' Gu’ku' Mulungu."

3 Hohene Mose na Aloni v’ayaga ku’mwa Falao na v’amuwi’laga, "Gu’ku' Mulungu, Mulungu wa V’aebulania, ali’yomba i’vi: ‘Mpaka nanali' u’kwendeleya ku’kaana kwitunia ha mbele yanne? V’aleku’li’le v’antu' v’anne v’awu’ke, ki’gele v’akanyisenge. 4 U’lu' u’kaane ku’v’aleku’li’la v’antu' v’anne v’awu’ke, nhana, igolo ndalete nzige ziyi’tinge nsi' yako. 5 Nsi' yose ya Misili yi’lakumbwe na nzige zyeni’zyo mpaka yi’laleke kwigela. Zilalye ki’la chene i’cho chasigali’lile ha itungo lya nvula i’yo ya mawe. Hangi' zilalye ki’la madu’tu' ago gafulumile ku' miti' mu migu’nda zinywe. 6 Nzige zyeni’zyo zilokale mu nnumba zyako, mu nnumba zya v’akumba v’ako na zya V’amisili v’ose. Zilav’e na wingi u’wo ninga v’a sinywe na v’agu’ku' v’inywe v’akaali' v’awonage ku’fuma ku’v’yalwa kwav’o mpaka walelo.’ " Hohene Mose wahafumaga hamwa Falao.

7 V’akumba v’amwa Falao v’amuwu’zyaga, "Vihe, muntu' mwenu’yu' alaku’tusye mpaka nanali'? V’aleku’li’le v’antu' v’enav’a v’awu’ke v’aye v’akamwisenge Gu’ku' Mulungu, Mulungu wav’o. Vihe, u’kaali' ku’manya ku’v’a nsi' yakav’ipa?"

8 Haho Mose na Aloni v’itanagwa v’asu’v’e ku’mwa Falao, nawe wav’awi’laga ati', "Yagi mukamwisenge Gu’ku' Mulungu, Mulungu winywe. Ali’vi nu’wu’zya, v’a nde muku’ya nav’o?" 9 Mose wasu’v’yaga ati', "Ku’ku’ya na v’asu’mbana na v’aniki', v’anamala na v’akiku’lu', haki’mo na v’ana v’iswe v’a ki’ki’ma na v’a ki’gosya, haki’mo na ng’ombe, nkolo na mbu’li ziswe zyose. Ku’ku’ya iswe v’ose ku’nguno ku’li’kamuv’ezezya mwanya Gu’ku' Mulungu."

10 Falao wav’awi’laga ati', "Gu’ku' Mulungu av’e haki’mo na inywe, u’lu' muleku’li’le muwu’ke haki’mo na v’aki' v’inywe na v’ana v’inywe. Yi’manyi’kile ku’v’a muli' na ndaka mbi mu myoyo zinywe. 11 Ayi' ng’o yi’kakowoleka! V’agosya du' av’o v’aku’ya ku’kamwisenga Gu’ku' Mulungu, ku’nguno lyeni’lo hu' lyene muli’lombaga." Haho Aloni na Mose v’asagagwa ha mbele ya minso gamwa Falao.

12 Gu’ku' Mulungu wamuwi’laga Mose, "Golola mukono gwako mu igu’lya na nsi' ya Misili, ki’gele nzige ziyi’kumbe nsi', na ku’lya mimelo zyose i’zyo zyasigalile ha itungo lya nvula ya mawe." 13 Hohene wawu’syaga mulanga gwakwe na ku’gu’sunga ha igu’lya na nsi' ya Misili. Gu’ku' Mulungu waletaga muyaga ku’fuma mu ki’ya, na gwayumaga lyu’v’a zelele wu’ziku’pee. Aho wu’ziku' wasyaga muyaga gwenu’go gwaletaga nzige. 14 Nzige zyayi’kumbaga Misili yose na zyasambalaga hose mu nsi'. Nzige zyeni’zyo zyav’age idale ihanya muno, li’kaali' kwigela idale ki’ti' lyeni’lo na li’kasye ligele hangi'. 15 Nzige zyeni’zyo zyayi’kumbaga nsi' yose ya Misili, mpaka nsi' yose yav’aga giti. Zyalyaga mimelo zyose na visumo vyose vya ku' miti' i’vyo ndi' vyasigali’lile ha itungo lya nvula ya mawe. Hadu’hu' idu’tu' ninga li’mo i’lo ndi' lyasigali’la ku' miti' ninga ku' ki’la mumelo mu nsi' ya Misili.

16 Haho Falao wav’itanaga Mose na Aloni wangu', na ku’v’awi’la, "Nav’ezyaga wu’kenagu’zi ku’mwa Gu’ku' Mulungu, Mulungu winywe, na ku' winywe. 17 Ku’nguno yeni’yo nu’mulomba muntondole wu’kenagu’zi wanne kenaka du'. Mukandombele ku’mwa Gu’ku' Mulungu, Mulungu winywe, ansini’zye lu’fu lwenu’lu'." 18 Hohene Mose wawu’kaga hamwa Falao, na wamulombaga Gu’ku' Mulungu. 19 Nawe Gu’ku' Mulungu wagalu’laga muyaga ku’v’a mudaki gu’fumi’i’le mu mweli, nago gwaziwu’syaga nzige zyose na ku’zipepemuli’la mu Nyanza ya Shamu. Ku’du’hu' nzige ninga yi’mo i’yo ndi' yasigali’la mu nsi' yose ya Misili. 20 Ali’vi Gu’ku' Mulungu wagu’v’ezyaga moyo gwamwa Falao ku’v’a mulambu, nawe Falao akav’aleku’li’lile V’aizilaeli v’awu’ke.

Ki’gu’mo cha kenda: Giti totolo

21 Gu’ku' Mulungu wamuwi’laga Mose, "Golola mukono gwako mu igu’lya mu ilunde, ki’gele yi’v’eho giti totolo mu nsi' yose ya Misili, i’yo yi’ku’v’av’ezya v’antu' v’apalapasye mu giti." 22 Hohene Mose wawu’syaga mukono gwakwe mu igu’lya mu ilunde, na giti nhanya yayi’kumbaga nsi' yose ya Misili ku' nsiku' idatu'. 23 V’antu' v’alekaga kwiwona, ninga ku’segezya ku’fuma aho ki’la mwene yamusangi’laga giti ku' nsiku' zyeni’zyo idatu'. Ali’vi V’aizilaeli v’ose v’av’age na mwanga ku' Gosheni u’ko ndi' v’ikalile.

24 Haho Falao wamwitanaga Mose, wamuwi’laga, "Yagi mukamwisenge Gu’ku' Mulungu, Mulungu winywe, v’aki' v’inywe na v’ana v’inywe muyage nav’o. Ali’vi ng’ombe, nkolo na mbu’li zinywe muzileke." 25 Ali’vi Mose wasu’v’yaga ati', "Yi’li’ku’dima u’ku’leku’li’le ku’sole na ndimu zya vitaambo vya ku’zigya na zya vitaambo vingi', ki’gele ku’kamwisenge Gu’ku' Mulungu, Mulungu wiswe. 26 Yi’li’ku’dima ku’wu’ke na mitugo ziswe, ku’du’hu' chu’ga ninga ki’mo cha ku’sigala. Ku’nguno mugati' na mitugo zyeni’zyo ku’kamanya i’zyo zili’koov’iwa ku’mufumi’zya Gu’ku' Mulungu, Mulungu wiswe, ki’taambo. Ku' itungo lyeni’li' ku’kaali' ku’manya ndimu zya Ku’sogola mpaka aho ku’lafike kwenu’ko."

27 Ali’vi Gu’ku' Mulungu wagu’v’ezyaga moyo gwamwa Falao ku’v’a mulambu. Falao wakaanaga ku’v’aleku’li’la V’aizilaeli v’awu’ke. 28 Hangi' wamuwi’laga Mose ati', "Hafume ha mbele yanne! Wiangali’le muno. Ku’du' wize u’mbone hangi'. Lu’siku' u’lize ha mbele yanne u’lafwe." 29 Mose wasu’v’yaga ati', "Yi’v’age ki’ti' i’vi wayombaga. Nkasye nize ku’ku’wona hangi'!"