Êxodo 11

Ki’gu’mo cha iku’mi: Ku’wu’lagwa v’av’yalwa v’a mbele

1 Hohene Gu’ku' Mulungu wamuwi’laga Mose ati', "Ku’kaali' ku’li' na ki’gu’mo ki’mo i’cho ndetile ku’mwa Falao na v’antu' v’a mu nsi' ya Misili. Haho alamuleku’li’le muwu’ke henanha, nawe u’lu' wamuleku’li’la, alamusage muku’fume ku’no kayekaye. 2 Gi’si' u’v’awi’le V’aizilaeli ati', ki’la mugosya na muki’ma yi’li’mudima alombe ku' muzenganwa wakwe vintu' vya mupango i’vyo viv’eziv’ilwe ku' mawe ga feza na zahabu." 3 Haho Gu’ku' Mulungu wav’av’ezyaga V’amisili v’av’e na moyo gwa wu’hegela ku' V’aizilaeli. Hangi' nawe Mose waku’ziv’agwa muno mu nsi' ya Misili, na ha mbele ya v’akumba v’amwa Falao, na mu minso ga v’antu' v’ose v’a mu Misili.

4 Haho Mose wamuwi’laga Falao ati', "Gu’ku' Mulungu ali’yomba i’vi: ‘Ha itungo lya wu’ziku' hagati' walelo, nku’v’i’ta hagati' na nsi' ya Misili. 5 U’lu' nav’i’ta, ki’la muv’yalwa wa mbele mu nsi' yose ya Misili aku’fwa, ku’lamuli’la muv’yalwa wa mbele wamwa Falao u’yo ikali’lile isumbi' lya wu’temi, mpaka muv’yalwa wa mbele wa muzya u’yo musya viliwa ha iwe, haki’mo na ki’la ki’v’yalwa cha mbele cha mitugo. 6 Haho ku’ku’v’a na ki’li’lo ki’hanya mu nsi' yose ya Misili, ki’li’lo i’cho ki’kaali' kwigelaga, hangi' ki’kasye kigele nhananhana. 7 Ali’vi mugati' na V’aizilaeli ku’lav’e sele, ku’du’hu' ninga mbwa i’yo yi’lav’amoke v’antu' ninga ndimu. Haho mulamanye ku’v’a Gu’ku' Mulungu ali’koma mugati' ya V’aizilaeli na V’amisili.’ 8 Hangi' v’akumba v’ako v’alize ku' wanne na ku’nku’v’i’i’la ku' iku’zyo na ku’yomba, ‘Wu’ka u’hafume, ev’e haki’mo na v’antu' v’ose av’o v’ali’ku’londa!’ Haho ndawu’ke." Hohene Mose wahafumaga hamwa Falao u’ku' ali' na ki’sila ki’daki.

9 Haho Gu’ku' Mulungu wamuwi’laga Mose ati', "Falao akaku’degeleke, ki’gele migaka zyanne zingi’he mu nsi' ya Misili." 10 Mose na Aloni ndi' v’av’ezya migaka zyeni’zyo zyose ha mbele yamwa Falao. Ali’vi Gu’ku' Mulungu wasangwa wagu’v’ezizye moyo gwamwa Falao ku’v’a mulambu. Hene akazumizye ku’v’aleku’li’la V’aizilaeli v’awu’ke mu nsi' yakwe.