Êxodo 15

Lwi’mbo lwamwa Mose

1 Haho Mose haki’mo na V’aizilaeli v’amwi’mbi’laga Gu’ku' Mulungu lwi’mbo u’u’lu':

"Nku’mwi’mbi’la Gu’ku' Mulungu, ku’nguno wakindaga ku' lu’kumo muno.

Falasi na muliina falasi wav’atagi’laga mu nyanza.

2 Gu’ku' Mulungu ali' nguzu zyanne na lwi’mbo lwanne,

na wav’aga wu’pi’zya wanne.

Mweni’ki’li' ali' Mulungu wanne, nanne nku’mukumi’li’zya,

ali' Mulungu wamwa v’av’a wanne, nanne nku’muku’zya.

3 Gu’ku' Mulungu ali' mukowozi wa wu’lu’gu',

Gu’ku' Mulungu hu' lina lyakwe.

4 Mikokoteni zya wu’lu’gu' zyamwa Falao na v’asilikale v’akwe, wav’atagi’laga mu nyanza.

V’ahanya v’a ku’mwa Falao av’o v’atoneke, v’anyumelaga mu Nyanza ya Shamu.

5 Minzi' ga ha mwev’a gav’akumbaga, v’agwi’laga mu nyanza ki’ti' iwe.

6 Mukono gwako gwa mulyi’la, ev’e Gu’ku' Mulungu, gwav’aga na lu’kumo lwa nguzu.

Ku' mukono gwako, ev’e Gu’ku' Mulungu, wav’azimangu’zyaga v’anisi.

7 Mugati' na wu’hanya wa lu’kumo lwako, wav’agwisizye ha nsi' av’o v’av’age v’ali’ku’hangi’li’zya.

Ki’sila chako chapanki’lile na chakav’azimangu’zya. V’av’ile ki’ti' mawulule mu’u’mu mu moto.

8 Ku' myu’ye zyako minzi' ndi' gikuminga,

mav’i’mbi' ndi' gi’ma wi’i’ma ki’ti' igelele,

myev’a ndi' zidima hagati' ya nyanza.

9 Mwanisi ndi' wayomba ati', ‘Nku’v’alondezya na ku’v’adima.

Nku’v’asampa vintu' mpaka nnamba yanne yi’male.

Nku’kwesa lu’panga lwanne, na mukono gwanne gu’ku’v’azimangu’zya.’

10 Ali’vi ev’e ndi' wapuga ku' myu’ye yako, nyanza yav’akumba.

V’anyumelaga mu minzi' ki’ti' mawe mu minzi' mingi.

11 Ev’e Gu’ku' Mulungu, ali' nde mugati' na milungu u’yo ali' ki’ti' ev’e?

Nde ali' ki’ti' ev’e, u’yo ali' na wu’sondo wu’hanya,

wa kogohya ku' lu’kumo, wa ku’kaamazya ku' migaka?

12 Wagololaga mukono gwako gwa mulyi’la, na nsi' yav’amilaga v’anisi v’iswe.

13 Mugati' na chelu' chako wav’alondolile v’antu' v’ako av’o wav’akomolile.

Ku' nguzu zyako wav’alondolile ku' wikalo wako wu’sondo.

14 V’antu' v’a makabi’la v’igagwa na ku’tetema,

wu’satu wav’apandi’kaga v’a ku' Wu’filisiti.

15 V’ahanya v’a ku' Edomu v’ogohaga, v’alondozi v’a ku' Mowabu v’atetemaga ku' wov’a,

v’antu' v’a ku' Kanaani v’agwaga magongofuka.

16 Wu’su’pu na wov’a vyav’agwi’laga.

Ku' nguzu zya mukono gwako v’aku’lembela ki’ti' iwe,

mpaka aho v’antu' v’ako, ev’e Gu’ku' Mulungu, v’alamali’le ku’v’i’ta,

mpaka v’antu' av’o wav’akomolile v’amali’le ku’v’i’ta.

17 Ev’e u’lav’ingi’zye na ku’v’ikazya ku' lu’gu’lu' lwako, u’ko waku’sogolile,

ev’e Gu’ku' Mulungu, ku’v’a ha wikalo wako,

hantu' hasondo aho wahahandi’lile ku' makono gako, ev’e Gu’ku'.

18 Gu’ku' Mulungu aku’tema nhananhana yose!"

19 Itungo i’lo falasi zyamwa Falao haki’mo na mikokoteni zyakwe zya wu’lu’gu' na v’aliina falasi, aho ndi' v’ingi’la mu nyanza, Gu’ku' Mulungu wagasu’v’yaga minzi' ga mu nyanza, gav’akumbaga. Ali’vi V’aizilaeli ndi' v’av’i’ta ha nsi' nyu’mu hagati' na nyanza.

20 Hangi' Miliamu, u’yo mufumbu’zi, ilu’mbu’ye na Aloni, wasolaga kagoma mu makono gakwe, na v’aki’ma v’angi' v’ose v’av’age v’amulondile na tu’goma twav’o ku’no v’ali’sapa. 21 Haho Miliamu wav’atongelelaga lwi’mbo u’u’lu':

"Mwi’mbi’lagi Gu’ku' Mulungu ku’nguno wakindaga ku' lu’kumo muno.

Falasi na v’aliina falasi wav’atagi’laga mu nyanza."

Minzi' malu’lu'

22 Hangi' Mose wav’alondolaga V’aizilaeli ku’fuma ku' Nyanza ya Shamu, na kwingi’la ku' ibalangu' lya Shuli. V’ayu’mbaga lu’gendo lwa nsiku' idatu' mu ibalangu' nav’o v’akawine minzi', ninga madoo. 23 Aho v’afikaga ku' Mala, v’apotagwa ku’ganywa minzi' ga henanho ku’nguno ndi' malu’lu'. Yeni’yo hu' nguno ya ku’hitana henanho Mala*15:23 Lina "Mala" ku' Ki’ebulania nguno yayo "wu’lu’lu'" ninga "wu’satu.". 24 Haho v’antu' v’amwisayi’li’li’laga Mose, ku' ku’yomba, "Ku’nywe ki'?" 25 Mose wamuli’li’laga Gu’ku' Mulungu, nawe Gu’ku' Mulungu wamulagi’laga ki’pande cha muti'. Haho Mose waki’tagi’laga mu minzi', nago minzi' gagalu’kaga na ku’v’a masoga.

Hohene Gu’ku' Mulungu wav’apaga V’aizilaeli nhama na wu’yangu' ki’gele av’ageme. 26 Wayombaga, "U’lu' mbe mugu’degeleke visoga muzwi gwanne, ene Gu’ku' Mulungu, Mulungu winywe, na ku’v’ezya ago gali’gelani’la ha mbele yanne, na ku’ku’zya nhama na milagi' zyanne zyose, hohene ene nkasye mmuletele malwile ki’ti' ago ndi' nav’afili’la V’amisili. Ku’nguno ene hu' ni' Gu’ku' Mulungu wa ku’mupi’zya inywe."

27 Haho V’aizilaeli v’afikaga ku' lwandi' lwa Elimu, u’ko kwav’age na tu’sela iku’mi na tu’v’i’li', na miti' maku’mi mupungati' zya mitende. Nav’o v’awonaga v’atu’u’le nkambi' yav’o kwenu’ko bi’hi' na minzi'.