Êxodo 18

Wu’yangu' wamwa Yetilo ku’mwa Mose

1 Hohene Yetilo, muhozya wa V’amidiani, ise wu’kwi wamwa Mose, wigagwa mmola ya magambo gose ago Gu’ku' Mulungu wamuv’ezezizye Mose haki’mo na V’aizilaeli. Hangi' wigagwa i’vyo Gu’ku' Mulungu wav’afumizye ku' nsi' ya Misili. 2 Itungo lyeni’lo Mose wasangwa wakamusu’v’ya muki' wakwe Zipola ku’mwa ise Yetilo, nawe Yetilo wamupokelaga, 3 haki’mo na v’ana v’akwe v’av’i’li' v’a ki’gosya. Lina lya mwana wa mbele witanagwe Geleshomu, ku’nguno Mose ndi' wayomba ati', "Nav’aga mugeni mwizi’li’zi mugati' na nsi' ya wu’geni." 4 Lina lya mwana wa wu’v’i’li' witanagwe Eliezeli, ku’nguno Mose ndi' wayomba ati', "Mulungu wamwa v’av’a wanne hu' mwene mugwasya wanne, na wampi’zizye na lu’panga lwamwa Falao."

5 Hohene Yetilo, ise wu’kwi wamwa Mose, haki’mo na muki' wamwa Mose na v’ana v’amwa Mose v’ose v’av’i’li', v’amuyi’laga Mose u’ko ku' ibalangu', u’ko wav’age atu’u’lile nkambi' ku' lu’gu’lu' lwamwa Mulungu. 6 Yetilo watu’mi’zyaga nkombe ku’mwa Mose ku’yomba ati', "Ene Yetilo mukwiyo nizile ku' wako, haki’mo na muki' wako na v’ana v’ako v’av’i’li'." 7 Ku’nguno yeni’yo Mose wafumaga ku’kamusu’mbi’la mukwiye, wamusungami’laga na ku’musu’na. V’igisi’li’zyaga na v’ingi’laga mu ihema. 8 Haho Mose wamutentemuli’laga mukwiye magambo gose ago Gu’ku' Mulungu wamuv’ezezizye Falao na V’amisili ku’nguno ya V’aizilaeli. Hangi' wamuwi’laga lu’duko u’lo v’alu’pandi’kile mu nzi’la, na i’vi Gu’ku' Mulungu wav’age ali’v’api’zya. 9 Yetilo watogeziv’agwa muno ku’nguno ya wu’soga u’wo Gu’ku' Mulungu wav’av’ezezizye V’aizilaeli, ku' ku’v’api’zya v’afume mu makono ga V’amisili. 10 Hangi' Yetilo wayombaga ati', "Akumu’kiwe Gu’ku' Mulungu u’yo wamupi’zizye ku’fuma mu makono ga V’amisili, haki’mo na makono gamwa Falao. 11 Gi’si' namanya ku’v’a Gu’ku' Mulungu ali' muhanya ku’ki’la milungu zyose, ku’nguno wav’akomolaga v’antu' v’enav’a ku’fuma mu makono ga V’amisili, av’o ndi' v’av’av’ezezyage V’aizilaeli mpazi’i’la." 12 Hangi' Yetilo, ise wu’kwi wamwa Mose, waletaga ki’taambo cha ku’zigya haki’mo na vitaambo vingi' ku’mwa Mulungu. Nawe Aloni haki’mo na v’anamala v’a Izilaeli v’ose v’izaga ku’lya ki’liwa haki’mo na Yetilo, ha mbele yamwa Gu’ku' Mulungu.

13 Wangalu’ke ndiyu', Mose wikalaga ki’gele av’ayangu’le v’antu', na v’enav’o v’antu' v’i’maga na ku’muzyema Mose ku’fuma ndiyu' mpaka mpi’ndi'. 14 Hohene Yetilo aho wawonaga gose ago Mose ali’v’av’ezezya v’antu' wayombaga ati', "Igambo ki' lyeni’li' i’lo u’li’v’av’ezezya v’antu'? Ku’nguno ev’e u’li’v’ayangu’la v’antu' v’enav’a winene, na v’antu' v’ose v’i’maga na ku’ku’zyema ku’fuma ndiyu' mpaka mpi’ndi'?" 15 Nawe Mose wasu’v’yaga ku' mukwiye ati', "V’antu' v’ali’wiza ku' wanne ki’gele v’awu’zye ku’mwa Mulungu. 16 U’lu' v’ali' na igambo, v’ali’wiza ku' wanne nanne nu’v’ayangu’la mugati' ya yu’mo na mwiye, na ku’v’alagi’la nhama zyamwa Mulungu na nzi’la zya nhana." 17 Hohene mukwiye Yetilo wamuwi’laga Mose ati', "Igambo lyeni’li' u’li’v’ezya li’kav’ile isoga! 18 Igambo lyeni’li' u’li’li’v’ezya, ev’e haki’mo na av’a v’antu', li’ku’v’a li’li’muzov’ya gele. U’kakowola ku’li’somba winene ku’nguno li’li' itimbu muno. 19 Gi’si' u’degeleke wu’yangu' wanne, na Mulungu av’e haki’mo nanho. Yi’li’ku’dima ev’e ku’v’a u’li’ya ha mbele yamwa Mulungu ku’nguno ya v’antu', na ku’mufili’la Mulungu magambo gav’o. 20 Nanho u’ku’v’a u’li’v’alagi’la nhama na nzi’la zya nhana zyamwa Mulungu, haki’mo na kikali’le na mili’mo i’zyo zili’koov’iwa ku’v’ezya. 21 Ali’vi ku’nguno ya magambo gangi', u’sogole mugati' na v’antu' v’ose, av’o v’amogohile Mulungu, v’a lole, na v’ayi’gayile nsawo ya ihongo. V’enav’o hu' u’v’ape wu’hanya wa madale ga v’antu' mavihu’mbi', magana, maku’mi atano na iku’mi iku’mi. 22 U’v’atu’u’le v’enav’o v’av’e hu' v’ayangu’zi v’a v’antu' mugati' na nsiku' zyose. U’v’awi’le v’aku’letele mihayo milambu, sumbwa mido mido v’av’e v’ali’ziyangu’la v’eni’ki’li'. Ku' nzi’la yeni’yi' yi’ku’ku’v’ezya ku’v’a na muligo mudo, ku’nguno nav’o v’aku’somba muligo haki’mo nanho. 23 U’lu' u’v’ezye vyeni’vi, na Mulungu u’lu' akoov’ile vyeni’vyo, hohene u’ku’kowola ku’lamba ku' muli’mo gwenu’gu', na v’antu' v’enav’a v’ose v’aku’v’a v’ali’su’v’a na ku’hola ki’la yu’mo ku' lu’go lwakwe."

24 Hohene Mose wadegelekaga wu’yangu' wa mukwiye, na wav’ezyaga vyose ki’ti' i’vyo ndi' wayangu’lagwa. 25 Haho Mose wav’asogolaga v’antu' v’a wu’kowozi mugati' na V’aizilaeli v’ose, na ku’v’av’ezya v’av’e v’ahanya v’a madale ga v’antu' mavihu’mbi', magana, maku’mi atano na iku’mi iku’mi. 26 Nav’o v’av’ayangu’laga v’antu' nsiku' zyose. Mihayo mido mido v’ayangu’laga v’eni’ki’li'. Ali’vi mihayo milambu zyene v’amuletelaga Mose. 27 Aho wav’ezyaga vyeni’vyo, Mose haki’mo na mukwiye v’idahyaga, nawe Yetilo wasu’v’aga ku' nsi' yakwe.