Êxodo 25

Isandi’ko lya wu’sangi’lwa

10 "U’lav’ezye isandi’ko lya mbawo zya mugu’nga. Li’v’e na wu’lihu wa sentimita igana li’mo na iku’mi, wu’gali’nhu li’v’e na sentimita maku’mi mukaga na mukaga, na wi’i’ma walyo li’v’e na sentimita maku’mi mukaga na mukaga. 11 Nanho u’lali’kumbi’le zahabu nsoso mugati' na ha ibala, na ku’li’pilimya lu’ki’go lwa zahabu ki’la lwandi'. 12 Hangi' u’lasule pete ine zya zahabu, na ku’zitunga ku' magu’lu' galyo ane, pete iv’i’li' lwandi' lu’mo na pete iv’i’li' lwandi' lwa wu’v’i’li'. 13 U’lav’ezye na miti' iv’i’li' zya mugu’nga na ku’zikumbi’la zahabu. 14 Miti' zyeni’zyo u’lazisweke ku' pete i’zyo zili' mu mbazu zya isandi’ko, ku’nguno ya ku’li’sombela. 15 Hangi' miti' zyeni’zyo zilikale haho ha pete zya isandi’ko, ku’du' zize zisiniwe. 16 Mugati' na isandi’ko lyeni’lo u’latu’u’lemo mav’ale av’i’li' ga mawe ga wu’sangi’lwa u’wo ndaku’pe.

17 "U’lav’ezye nfundi' ya wu’swanano ku' zahabu nsoso. Wu’lihu wayo wu’lav’e wa sentimita igana li’mo na iku’mi na wu’gali’nhu wayo sentimita maku’mi mukaga na mukaga. 18 Hangi' u’lav’ezye na masu’mbano av’i’li' ga wikole na v’amalaika v’akelubi ku' zahabu i’yo yi’sulilwe ku' nnundo, na ku’gatu’u’la ku' ki’la mpelo ya nfundi'. 19 U’latu’u’le isu’mbano li’mo ku' mpelo yi’mo na isu’mbano li’ngi' ku' mpelo ya wu’v’i’li'. Masu’mbano genago u’lagatu’u’le gav’e ki’ntu' ki’mo na yeni’yo nfundi', ku' mpelo zyose iv’i’li'. 20 Masu’mbano genago galav’e ganzile manana gago ku' igu’lya, na ku’yi’kumbi’la nfundi'. Nago galav’e gilolile, ku’no gayi’dolekile nfundi'. 21 Mugati' na isandi’ko u’latu’u’le mav’ale av’i’li' ga mawe ga wu’sangi’lwa ago ndaku’pe, na ha igu’lya yalyo u’latu’u’le nfundi'.