Êxodo 25

Kalu’mbi’lo ku’nguno ya Ihema Isondo

1 Mugati' na nsiku' zyeni’zyo, Gu’ku' Mulungu wamuwi’laga Mose ati', 2 "U’v’awi’le V’aizilaeli v’anfumi’zye kalu’mbi’lo. U’lav’e u’li’pokela kalu’mbi’lo ku’nguno yanne ku’fuma ku' ki’la muntu' u’yo alav’e ali’fumya ku' moyo gwa ku’togwa. 3 Aka hu' kalu’mbi’lo ako u’lav’e u’li’pokela ku’fuma mu makono gav’o: mawe ga feza, zahabu na shaba, 4 wu’zi wa langi ya bululu, zambalawo na yazaa, wu’zi wa katani nsoga, wu’yenze wa mbu’li, 5 ndi’li' zya ng’ondi i’zyo ziv’ililwe langi yazaa, ndi’li' zya ndimu zingi' zya mu nyanza, magogo ga muti' gwa mugu’nga, 6 maguta ga muzeituni ku’nguno ya tala, visanjo ku’nguno ya maguta ga ku’v’ila na wu’bani wu’motu, 7 mawe ga mupango ga shohamu, na mawe gangi' ga mupango ku’nguno ya ki’zibao na kamufuko ka ha ki’kuv’a ku’nguno ya muhozya muhanya. 8 Hangi' V’aizilaeli v’ambezezye hantu' hasondo, ki’gele nikale mugati' yav’o. 9 V’ambezezye ihema lyeni’lo haki’mo na vilwani’lo vyalyo vyose, na ku’gelani’zya ki’ti' i’vi nku’ku’lagi’la.

Isandi’ko lya wu’sangi’lwa

10 "U’lav’ezye isandi’ko lya mbawo zya mugu’nga. Li’v’e na wu’lihu wa sentimita igana li’mo na iku’mi, wu’gali’nhu li’v’e na sentimita maku’mi mukaga na mukaga, na wi’i’ma walyo li’v’e na sentimita maku’mi mukaga na mukaga. 11 Nanho u’lali’kumbi’le zahabu nsoso mugati' na ha ibala, na ku’li’pilimya lu’ki’go lwa zahabu ki’la lwandi'. 12 Hangi' u’lasule pete ine zya zahabu, na ku’zitunga ku' magu’lu' galyo ane, pete iv’i’li' lwandi' lu’mo na pete iv’i’li' lwandi' lwa wu’v’i’li'. 13 U’lav’ezye na miti' iv’i’li' zya mugu’nga na ku’zikumbi’la zahabu. 14 Miti' zyeni’zyo u’lazisweke ku' pete i’zyo zili' mu mbazu zya isandi’ko, ku’nguno ya ku’li’sombela. 15 Hangi' miti' zyeni’zyo zilikale haho ha pete zya isandi’ko, ku’du' zize zisiniwe. 16 Mugati' na isandi’ko lyeni’lo u’latu’u’lemo mav’ale av’i’li' ga mawe ga wu’sangi’lwa u’wo ndaku’pe.

17 "U’lav’ezye nfundi' ya wu’swanano ku' zahabu nsoso. Wu’lihu wayo wu’lav’e wa sentimita igana li’mo na iku’mi na wu’gali’nhu wayo sentimita maku’mi mukaga na mukaga. 18 Hangi' u’lav’ezye na masu’mbano av’i’li' ga wikole na v’amalaika v’akelubi ku' zahabu i’yo yi’sulilwe ku' nnundo, na ku’gatu’u’la ku' ki’la mpelo ya nfundi'. 19 U’latu’u’le isu’mbano li’mo ku' mpelo yi’mo na isu’mbano li’ngi' ku' mpelo ya wu’v’i’li'. Masu’mbano genago u’lagatu’u’le gav’e ki’ntu' ki’mo na yeni’yo nfundi', ku' mpelo zyose iv’i’li'. 20 Masu’mbano genago galav’e ganzile manana gago ku' igu’lya, na ku’yi’kumbi’la nfundi'. Nago galav’e gilolile, ku’no gayi’dolekile nfundi'. 21 Mugati' na isandi’ko u’latu’u’le mav’ale av’i’li' ga mawe ga wu’sangi’lwa ago ndaku’pe, na ha igu’lya yalyo u’latu’u’le nfundi'. 22 Nanne ndav’e nu’poma nanho henanho ha igu’lya na nfundi', i’lo li’li' hagati' ya v’akelubi v’enav’o v’av’i’li' av’o v’ali' ha igu’lya na isandi’ko lya wu’sangi’lwa. Ndav’e nu’su’nsu’mu’la nanho henanho na ku’ku’pa milagi' zyose ku’nguno ya V’aizilaeli.

Meza ya migate misondo

23 "Nanho u’lav’ezye meza ya mbawo zya mugu’nga yi’v’e na wu’lihu wa sentimita maku’mi munane na munane, wu’gali’nhu wayo sentimita maku’mi ane na ine, na wi’i’ma wayo sentimita maku’mi mukaga na mukaga. 24 Meza yeni’yo u’layi’kumbi’le zahabu nsoso, na ku’yi’pilimi’zya lu’ki’go lwa zahabu ki’la lwandi'. 25 Hangi' u’lav’ezye kalu’bawo na ku’yi’pilimi’zya meza ki’la lwandi', na u’lakapilimi’zye lu’ki’go lwa zahabu. Kalu’bawo kenako kalav’e na wu’gali’nhu wa sentimita munane. 26 U’lav’ezye pete ine zya zahabu ku’nguno ya meza yeni’yo, na ku’zizwi’ka ku' ki’la mugu’lu' gwa meza yeni’yo. 27 Pete zyeni’zyo u’lazitu’u’le ziv’e bi’hi' na ako kalu’bawo, ki’gele ziv’e hu' ha ku’dimi’zya i’zyo miti' zya ku’yi’sombela meza. 28 U’lav’ezye miti' zya mugu’nga ziv’e zya ku’yi’sombela meza, na ku’zikumbi’la zahabu. 29 Hangi' u’lav’ezye viseme vyayo ku' zahabu nsoso: sahani na tu’viseme ku’nguno ya wu’bani, na vikombe na mabakuli ku’nguno ya ku’pu’ngu’li’la kalu’mbi’lo ka ki’neneko. 30 U’lazitu’u’le migate misondo ha igu’lya na meza ziv’e ha mbele yanne ku' matungo gose.

Ki’nala cha ku’tu’u’li’la tala

31 "U’lav’ezye ki’nala cha ku’tu’u’li’la tala ku' zahabu nsoso i’yo yi’sulilwe ku' nnundo. Kikali’lo chacho, kamuti' kacho, vikombe vyacho, magundo gacho na mauwa gacho, vyose viv’e ki’ntu' ki’mo. 32 Matambi' mukaga gafumi’le mu mbazu zyacho, matambi' adatu' gav’e lwandi' lu’mo, na matambi' adatu' lwandi' lwa wu’v’i’li'. 33 Ku' ki’la itambi' mugati' na genago mukaga ku’lav’e na vikombe vidatu' vya wikole na malawu' ga muti' gwa mulozi, ki’la ki’mo na magundo gacho na malawu' gacho. 34 Ku' kamuti' vilav’e vili’ho vikombe vine i’vyo viv’eziv’ilwe ku' wikole wa malawu' ga mulozi, haki’mo na magundo gavyo na malawu' gavyo. 35 Ki’la lwandi' u’lo lu’lav’e lu’li’fumi’i’la matambi' av’i’li', ha nsi’li’li' yaho halav’e na igundo li’mo li’mo. 36 Magundo genago na matambi' gago galav’e ki’ntu' ki’mo na cheni’cho ki’nala cha ku’tu’u’li’la tala, na vyose vilav’e vya zahabu nsoso i’yo yi’sulilwe ku' nnundo. 37 Hangi' u’lav’ezye tala mupungati', na ku’zitu’u’la ha igu’lya na ki’nala cheni’cho, ki’gele zimu’li’ke ha mbele yacho. 38 U’lav’ezye mikasi zya ku’gelani’zi’zya wu’tambi' na sahani zyayo vyose viv’e vya zahabu nsoso. 39 U’latu’mi’le kilo maku’mi adatu' na itano zya zahabu nsoso*25:39 Kilo maku’mi adatu' na itano ku' Ki’ebulania yi’li' talanta yi’mo. ku’v’ezezya ki’nala cha ku’tu’u’li’la tala haki’mo na vilwani’lo vyacho vyose. 40 Wangali’le aho u’li’viv’ezya u’viv’ezye ki’ti' i’vyo walagi’lilwe ku' lu’gu’lu'."