Êxodo 33

Ilagi’li’zyo lya ku’wu’ka ku' Sinai

1 Hangi' Gu’ku' Mulungu wamuwi’laga Mose, "Wu’ka henanha, ev’e haki’mo na v’antu' av’o wav’afumizye ku' nsi' ya Misili, muye ku' nsi' i’yo nav’alagana Abalahamu, Isaka na Yakobo, aho ndi' nayomba, ‘Ndav’ape v’av’yalwa v’inywe nsi' yeni’yi'.’ 2 Ene ndamutu’me malaika amutongelele, nanne ndav’asage V’akanaani, V’aamoli, V’ahiti, V’apelizi, V’ahivi na V’ayebusi. 3 Yagi ku' nsi' ya lu’tongo i’yo yi’li’keneneka mav’eele na wu’ki'. Ali’vi ku’nguno inywe muli' na myoyo milambu, nkasye nje haki’mo na inywe, ku’du' nize muzimangu’zye mu nzi’la."

4 V’antu' aho v’igagwa mmola yeni’yo mbi, v’ali’laga muno, hangi' ku’du’hu' muntu' ninga yu’mo u’yo wazwalaga wu’lembo wakwe. 5 V’av’ezyaga vyeni’vyo ku’nguno Gu’ku' Mulungu wasangwa wamuwi’laga Mose ati', "V’awi’le V’aizilaeli, ‘Inywe muli' v’antu' v’a myoyo milambu. U’lu' nje haki’mo na inywe ku' itungo ido du', nku’muzimangu’zya. Ku’nguno yeni’yo muzule wu’lembo winywe ki’gele manye lya ku’muv’ezezya.’ " 6 Hohene, V’aizilaeli v’awu’zulaga wu’lembo wav’o, henanho ha lu’gu’lu' lwa Holebu na v’akazwalile hangi' ninga ku' mbele ya musi’nzo.

Ihema lya Ku’sangi’zya

7 Nawe Mose wav’age na ki’ti’le cha ku’li’ki’ndi’ka ihema katanalo na nkambi'. Ihema lyeni’lo wali’paga lina, Ihema lya Ku’sangi’zya. Yav’age muntu' u’yo wakoov’age wu’yangu' ku’mwa Gu’ku' Mulungu, wayage ku' Ihema lya Ku’sangi’zya, i’lo lyav’age katanalo na nkambi'. 8 Hangi' Mose aho wav’age ali’fuma ku’ya ku' ihema lyeni’lo, v’antu' v’ose v’i’i’mage ha mizigo zya mahema gav’o, na ku’mulola Mose mpaka aho ali’wingi’la mugati' na ihema lyeni’lo. 9 Ha itungo i’lo Mose ali’wingi’la mu ihema lyeni’lo, i’lo ilunde li’li' ki’ti' nhi’ngi' lyasookage ha muzigo gwa ihema, haho Gu’ku' Mulungu wayombage na Mose. 10 V’antu' v’ose aho v’av’age mbe v’ali’wona i’lo ilunde li’li' ki’ti' nhi’ngi' ya ha muzigo gwa ihema, ki’la yu’mo waku’v’i’i’lage ha muzigo gwa ihema lyakwe. 11 I’vi hu' vyene Gu’ku' Mulungu wayombage na Mose ki’ti' minso ku' minso, yaani ki’ti' muntu' na munwaniye. Hangi' Mose wasu’v’age ku' nkambi', ali’vi musu’mbana Yoswa, mwana wamwa Nuni, u’yo wav’age mugwasya wakwe, ndi' akamufumaga mu ihema.

Mose ali’lomba ku’wona lu’kumo lwamwa Gu’ku' Mulungu

12 Mose wamuwi’laga Gu’ku' Mulungu ati', "Lingaga! Ev’e u’li’mbwi’la, ‘V’alondole v’antu' v’enav’a,’ ali’vi u’kampile mmola ati', nde u’lamutu’me av’e haki’mo nanne. Ninga i’vyo wayombile ati', ‘Nku’manyile lina lyako, nanho wapandi’kile wu’soga ha mbele yanne.’ 13 Gi’si' nu’kwikonga, u’lu' napandi’kaga wu’soga ha mbele yako, u’ndagi’le nzi’la zyako, ki’gele mpandi’ke ku’ku’manya na kwendeleya ku’pandi’ka wu’soga ha mbele yako. Hangi' wizu’ki’le ku’v’a nsi' yeni’yi' v’ali' v’antu' v’ako."

14 Haho Mulungu wasu’v’yaga ati', "Ene mweni’ki’li' nku’ya haki’mo nanho, na ku’ku’lembezya." 15 Hangi' Mose wayombaga ati', "U’lu' u’kav’ile ku’ya haki’mo niswe, hohene, ku’du' u’ku’sinie henanha. 16 Ku’nguno yi’ku’manyi’ka vihe ku’v’a napandi’kaga wu’soga ha mbele yako, ene haki’mo na v’antu' v’ako? Sumbwa du' ku’nguno ya ev’e ku’ya haki’mo na iswe yi’ku’manyi’ka ku’v’a ene haki’mo na v’antu' v’ako ku’li' v’a heke mugati' na v’antu' v’ose mu welelo."

17 Gu’ku' Mulungu wamuwi’laga Mose ati', "Nku’ku’v’ezezya igambo lyeni’li' i’lo walombaga, ku’nguno wapandi’kaga wu’soga ha mbele yanne, nanne nku’manyile lina lyako." 18 Haho Mose wayombaga, "Nu’kwikonga u’ndagi’le lu’kumo lwako." 19 Nawe Gu’ku' Mulungu wasu’v’yaga ati', "Nku’v’i’tya wu’soga wanne wose ha mbele yako, nanne nku’li’kumalu’sya lina lyanne, ‘Gu’ku' Mulungu.’ Ene ndamuwonele ki’sa u’yo ntogilwe ku’muwonela ki’sa, na ku’musayi’la u’yo ntogilwe ku’musayi’la. 20 Ali’vi u’kasye u’kowole ku’mbona wu’syu' wanne, ku’nguno ku’du’hu' muntu' u’yo akowolile ku’mbona nawe av’e muzuwu’ku." 21 Hangi' Gu’ku' Mulungu wamuwi’laga Mose ati', "Lingaga, ku’li' na lwandi' lwa bi’hi' nanne u’lo ukwi’ma ha igu’lya na itale. 22 Lu’kumo lwanne aho lu’ku’v’a lu’li’v’i’ta, nku’ku’tu’u’la mu mpembo ha itale na nku’ku’kumbi’la na mukono gwanne, mpaka aho nku’v’a nav’i’ta. 23 Hangi' nku’gu’sinia mukono gwanne nanho u’ku’mbona ku' nnuma, ali’vi wu’syu' wanne u’ku’leka ku’wu’wona."