1 ମିସର ଦେସ୍‌ତାନ୍‌ ଇସ୍ରାଏଲ ଲୋକୁ ସୋସି ମୁଣ୍ଡ୍ରି ଲେଜ୍‌କାଣି ପାର୍‌ତୁମ୍‌ ଦିନ୍‌ତୁ, ୱାର୍‌ ସିନୟ ଗରନ୍‌ ଲାକ୍‌ତୁ ଇତାର୍‌ । 2 ୱାର୍‌ ରପିଦିମ ଲାକ୍‌ତୁରାନ୍‌ ସୋସି ସିନୟ ମରୁବୁମି ଲାକ୍‌ତୁ ଇଜି, ଇସ୍ରାଏଲ ଲୋକୁ ଆୟା ବାଡିଦି ଗରନ୍‌ ଆଗ୍‌ଡ଼ି ବାସାକିତାର୍‌ । 3 ମୋଶା ମାପୁରୁ ଲାକ୍‌ତୁ ସର୍ରିଙ୍ଗ୍‌, ସଦାପ୍ରବୁ ଗରତାନ୍‌ ୱାନିଙ୍ଗ୍‌ କୁକ୍‌ସି ଇର୍ହାନ୍‌, "ନିନ୍‌ ଜାକୁବ କୁଟୁମ୍‌ଦିଙ୍ଗ୍‌ ଇୟା ମାଟା ଇନ୍‌ଆ ମାରି ଇସ୍ରାଏଲ ଲୋକାଙ୍ଗ୍‌ ଇକା ଇନ୍‌ଆ ।" 4 ମାପ୍‌ ମିସ୍ରିୟରିଙ୍ଗ୍‌ ଆମାକା କିତାପ୍‌ ମାରି ମିଙ୍ଗିଁ ଏଣ୍ଡେସ୍‌ ଡେଗା ପଟି ତାନି ପିଲେକାଙ୍ଗ୍‌ ରେକାଦୁ ସିପ୍‌ନା ତାନାତ୍‌ ଆୟା ୱାଜା ମାପ୍‌ ମିଙ୍ଗିଁ ପିଣ୍ଡ୍‌ଜି ନିଜେଦି ଲାକ୍‌ତୁ ତାତାପ୍‌, ଆକା ମିର୍‌ ସୁଡ଼ିତି ମାନିଦେର୍‌ । 5 ଇଲେଇ ମିର୍‌ ଏସେଙ୍ଗ୍‌ ମା ମାଟାଦିଙ୍ଗ୍‌ ମୋନ୍‌ ସିନିଦେର୍‌ ମାରି ମା ନିୟମ୍‌ ମାନାନିଦେର୍‌, ଆଦେଙ୍ଗ୍‌ ମିର୍‌ ୱିଜୁ ଲୋକା ମାଣାନ୍‌ ମା ନିଜେଦି ଉଣ୍ତାକିତି ଦନ୍‌ ଆନାତ୍‌; ଇର୍ରିଙ୍ଗ୍‌ ୱିଜୁ ଦୁନିଆ ମାଦି । 6 ମାରି ମିର୍‌ ମା ଉଣ୍ତିଙ୍ଗ୍‌ ଜାଜକରି ଉନ୍‌ଡ୍ରି କୁଟୁମ୍‌ ମାରି ଉନ୍‌ଡ୍ରି ପବିତ୍ର କୁଟୁମ୍‌ ଆନାତ୍‌; ଇୟାୱିଜୁ ମାଟା ମି ଇସ୍ରାଏଲ ଲୋକାଙ୍ଗ୍‌ ଇନ୍‌ଆ । 7 ଆଦେଙ୍ଗ୍‌ ମୋଶା ୱାଜି ପେରି ଲୋକାଙ୍ଗ୍‌ କୁକ୍‌ସି ସଦାପ୍ରବୁ ମାଣାନ୍‌ ଆଦେସ୍‌ ପୟ୍‌ତିମାନି ଇୟା ୱିଜୁ ମାଟା ୱାରି ଆଗ୍‌ଡ଼ି ଇର୍ହାନ୍‌ । 8 ଆବେନୁ ୱିଜେରେ ଲୋକୁ ଅର୍‌ସେ ଇର୍ହାର୍‌, ସଦାପ୍ରବୁ ଆମା ମାଟା ଇର୍ହାମାନାନ୍‌, ଆୟାକା ୱିଜୁ ମାଡ୍‌ କିନାଟ୍‌ । ନାସ୍ତିୱାଲେ ମୋଶା ସଦାପ୍ରବୁଦି ଲାକ୍‌ତୁ ଲୋକା ମାଟା ୱେର୍‌ତାନ୍‌ ।

9 ଆଦେଙ୍ଗ୍‌ ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ସୁଡ଼ୁଆ, ମାପ୍‌ ନି ୱାଲେ ୱାର୍‌ଗିନି ୱାଲେ ଲୋକୁ ଏଣ୍ଡେସ୍‌ଗି ଆକା ୱେଣ୍ଡ୍ରେଙ୍ଗ୍‌ ଆଟ୍‌ନାର୍‌, ମାରି ନିବାନୁ ୱିଜୁୱାଲେ ବିସ୍‌ବାସ୍‌ କିନାର୍‌, ଇୟା ଉଣ୍ତିଙ୍ଗ୍‌ ମାପ୍‌ ଦୁରିଦାନ୍‌ ନି ଲାକ୍‌ତୁ ୱାତାମାନାପ୍‌ ।" ଇୟା ୱେନ୍‌କା ମୋଶା ଲୋକା ମାଟା ସଦାପ୍ରବୁଙ୍ଗ୍‌ ଇର୍ହାନ୍‌ । 10 ଆଦେଙ୍ଗ୍‌ ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ଲୋକା ଲାକ୍‌ତୁ ସୋଲ୍‌ସି ନେରୁ ମାରି ୱିଗେ ୱାରିଙ୍ଗ୍‌ ପବିତ୍ର କିଆ, ମାରି ୱାର୍‌ ନିଜେ ନିଜେଦି ଆଙ୍ଗିଁ ସକା ନର୍‌ବାପିର୍‌ 11 ମାରି ମୁଣ୍ଡ୍ରି ଦିନାମ୍‌ତି ଉଣ୍ତିଙ୍ଗ୍‌ ୱିଜେରେ ତିଆର୍‌ ଆପିର୍‌; ଇର୍ରିଙ୍ଗ୍‌ ମୁଣ୍ଡ୍ରି ଦିନ୍‌ତୁ ସଦାପ୍ରବୁ ୱିଜୁ ଲୋକା ଆଗ୍‌ଡ଼ି ସିନୟ ଗରନ୍‌ ମୁସୁକୁ ରେତାଜି ୱାନାନ୍‌ । 12 ଇୟା ଉଣ୍ତିଙ୍ଗ୍‌ ନିନ୍‌ ଲୋକା ସାରିବେଡ଼େତି ସାନ୍ଧି ତିଆର୍‌ କିଜି ଇୟା ମାଟା ଇନ୍‌ଆ, ମିର୍‌ ଗରନତୁ ସୋନି ୱାଲେ ମାରି ଆବେନୁ ନିୟମ୍‌ଦିଙ୍ଗ୍‌ ସୁଡ଼ୁଜି ଜାଗାର୍‌ତା ଆଦୁ; ଏନ୍‌ ବା ଗରନ୍‌ ତରିନ୍‌ ସୁଡ଼ୁନାନ୍‌, ୱାନ୍‌ ସାନାନ୍‌ । 13 ଏ କିୟୁ ତାନିଙ୍ଗ୍‌ ମୁଟ୍‌ମାଟ୍‌, ମାତର ୱାନ୍‌ ସତ୍‌ନେ କାଲୁଦାନ୍‌ ଡାକାୟ୍‌ଆଜି ସାନାନ୍‌, ମାରି ଇଟାଦାନ୍‌ ଗୁତାନାନ୍‌; କଡିଗରିଏଙ୍ଗ୍‌ ଆପିୟି ଗି ଲୋକୁ ଆପିର୍‌, ଏସେଙ୍ଗ୍‌ବା ୱାର୍‌ ଜିଏର୍‌; ମୋରିଦି ଆଉଲି ଆତିଙ୍ଗ୍‌ ୱାର୍‌ ଗରନ୍‌ ସାନ୍ଧି ନିଙ୍ଗ୍‌ଜି ୱାନାର୍‌ ।"

14 ଇୟାୱେନ୍‌କା ମୋଶା ଗରତାନ୍‌ ରେସି ୱାଜି ଲୋକା ଲାକ୍‌ତୁ ୱାଜି ୱାରିଙ୍ଗ୍‌ ପବିତ୍ର କିତାନ୍‌, ମାରି ୱାର୍‌ ନିଜେ ନିଜେଦି ଆଙ୍ଗିଁ ପାସିୟା ନର୍‌ବାତାର୍‌ । 15 ଆବେଟ୍‌ ୱାନ୍‌ ଲୋକାଙ୍ଗ୍‌ ଇର୍ହାନ୍‌, "ମିର୍‌ ମୁଣ୍ଡ୍ରି ଦିନ୍‌ତି ଉଣ୍ତିଙ୍ଗ୍‌ ତିଆର୍‌ ଆଦୁ; ନିଜେ ନିଜେଦି ଆଡ଼ି ଲାକ୍‌ତୁ ସୋଲ୍‌ମାଟ୍‌ ।"

16 ମୁଣ୍ଡ୍ରି ଦିନ୍‌ତି ସାଲ୍‌ଦି ଆତାତ୍‌, ବାଦଡ଼ ଗାର୍ଜାଜି ମାରି ମିର୍‌ସି ମାରି ଗରନ୍‌ ମୁସୁକୁ ନାଣ୍ଡ ବାଦଡ଼୍‌ ମାରି ନାଣ୍ଡ ଆଉଲିଦାନ୍‌ ବାଜା ମୋରି ଆଦେଙ୍ଗ୍‌ ଆସ୍‌ତାତ୍‌; ଆବେନୁ ଗୁଡ଼ାଦୁ ମାର୍‌ଇ ୱିଜୁ ଲୋକୁ ତିଲାଜି ତିର୍‌ଗିତାର୍‌ । 17 ଆବେଟ୍‌ ମାପୁରୁଦି ୱାଲେ ବେଟ୍‌ ଆନି ଉଣ୍ତିଙ୍ଗ୍‌ ମୋଶା ଲୋକାଙ୍ଗ୍ ବାସା ବାଡିଦାନ୍‌ ସପ୍‌ସିତାନ୍‌, ଆବେଟ୍‌ ୱାର୍‌ ଗରନ୍‌ ଆଡିଗି ନିର୍ହାର୍‌ । 18 ନାସ୍ତିୱାଲେ ସିନୟ ଗରନ୍‌ ଗୋଇ ମାର୍ହାତ୍‌, ଇର୍ରିଙ୍ଗ୍‌ ସଦାପ୍ରବୁ ସିସୁଦି ୱାଜା ଆୟା ମୁସୁକୁ ରେତାନ୍‌; ଆବେନୁ ବାଟିଦି ଗୋଇ ୱାଜା ଆବେନୁ ଗୋଇ ନିଙ୍ଗିଁତାତ୍‌, ମାରି ୱିଜୁ ଗରନ୍‌ ନାଣ୍ଡ ଡିଡ଼ିତାତ୍‌ । 19 ମାରି, ମୋରି ଆଉଲି ମାରି ନାଣ୍ଡ ଆତାତ୍‌, ମୋଶା ଇର୍ହାନ୍‌, "ଆବେଣାନ୍‌ ମାପୁରୁ ଉନ୍‌ଡ୍ରି ମାଟାଦାନ୍‌ ୱାନିଙ୍ଗ୍‌ ୱେର୍‌ତାନ୍‌ ।" 20 ସଦାପ୍ରବୁ ସିନୟ ଗରନ୍‌ ମୁସୁକୁ, ଇର୍ରିଙ୍ଗ୍‌, ଗରନ୍‌ ମାଡ଼ିଦୁ ରେତି ୱେନ୍‌କା ମୋସେଙ୍ଗ୍‌ ଆୟା ଗରନ୍‌ ଦାମୁକୁଦାନ୍‌ କୁକୁତାନ୍‌; ଆବେଟ୍‌ ମୋଶା ଗରନ୍‌ତୁ ଏକ୍‌ତାନ୍‌ । 21 ନାସ୍ତିୱାଲେ ସଦାପ୍ରବୁ ମୋସେଙ୍ଗ୍‌ ଇର୍ହାନ୍‌, "ନିନ୍‌ ରେତାଜି ସୋଲ୍‌ସି ଲୋକାଙ୍ଗ୍ ନେଗେଣ୍ଡ୍‌ତାନ୍‌ ୱେର୍‌ଆ, ସିଲେତିଆଙ୍ଗା ସଦାପ୍ରବୁଙ୍ଗ୍‌ ସୁଡ଼ୁଦେଙ୍ଗ୍‌ ସାନ୍ଦି ନାମାକିର୍‌, ୱାରି ମାଣାନ୍‌ ଏସୋ ଲୋକୁ ନାଷ୍ଟୁ ଆନାର୍‌ । 22 ମାରି ଆମା ଜାଜକର୍‌ ସଦାପ୍ରବୁଦି ଲାକ୍‌ତୁ ମାନାର୍‌, ୱାର୍‌ ବା ନିଜେଦିଙ୍ଗ୍‌ ପବିତ୍ର କିପିର୍‌, ସିଲେତିଙ୍ଗା ୱାନ୍‌ ୱାରିଙ୍ଗ୍‌ ଡାକ୍‌ନାନ୍‌ ।"

23 ଆବେଟ୍‌ ମୋଶା ସଦାପ୍ରବୁଙ୍ଗ୍‌ ଇର୍ହାନ୍‌, "ଲୋକୁ ସିନୟ ଗରନ୍‌ତୁ ଏକ୍‌ତେଙ୍ଗ୍‌ ଆଟ୍‌ଏର୍‌; ଇର୍ରିଙ୍ଗ୍‌ ନିନ୍‌ ଆଟ୍‌ୱା ମାଟା ୱେର୍‌ସି ମାଙ୍ଗିଁ ଇର୍ହିମାନି, ଗର୍‌ତି ସାନ୍ଦି କିଜି ମାରି ପବିତ୍ର କିଆ ।"

24 ଆବେଟ୍‌ ସଦାପ୍ରବୁ ୱାନିଙ୍ଗ୍‌ ଇର୍ହାନ୍‌, ସାଙ୍ଗ୍‌ଆ, ଗରତାନ୍‌ ରେଆ; ମାରି, ହାରୋଣଙ୍ଗ୍‌ ଅର୍‌ସେ ଅସି ଗରନ୍‌ତୁ ଏକ୍‌ନି: ମାତର୍‌ ଜାଜକର ନି ଲୋକା ମୁସ୍‌କୁ ସଦାପ୍ରବୁ ଏଣ୍ତେସ୍‌ ସାପିସ୍‌ କିଏନ୍‌, ଇୟାଉଣ୍ତିଙ୍ଗ୍‌ ୱାର୍‌ ୱାନି ଆଗ୍‌ଡ଼ି ୱାନି ଉଣ୍ତିଙ୍ଗ୍‌ ସାନ୍ଦି ନାମାକିର୍ । 25 ଆବେଟ୍‌ ମୋଶା ଲୋକା ଲାକ୍‌ତୁ ରେସି ସଲ୍‌ସି ୱାରିଙ୍ଗ୍‌ ଆୟାୱାଜା ମାଟା ୱେର୍‌ତାନ୍ ।