1 ମାରି ନିନ୍‌ ଇୟାୱିଜୁ ନିୟମ୍‌ ୱାରିଙ୍ଗ୍‌ ୱେର୍‌ନିକା । 2 ନିନ୍‌ ଏବ୍ରୀୟ ଦାସ୍‌ କଟିଙ୍ଗା, ୱାନ୍‌ ସୋ ବାର୍‌ସେକ୍‌ ସେବା କିନାନ୍‌; ମାରି ସାତ୍ ନମ୍ୱର୍‌ତି ବାର୍ସେକ୍‌ଦୁ ୱାନ୍‌ ଆରେନେ ମୁକୁଡ଼ାନାନ୍‌ । 3 ଜଦି ୱାନ୍‌ ଅରେନ୍‌ ୱାନାମାନାନ୍‌, ଆଦେଙ୍ଗ୍‌ ୱାନ୍‌ ଅରେନ୍‌ ସନାନ୍‌; ମାରି ଜଦି ୱାନ୍‌ ପେଡ଼ି ଆଜି ୱାନାମାନାନ୍‌, ଆଦେଙ୍ଗ୍‌ ୱାନି ଆଡ଼ି ୱାନି ୱାଲେ ସନା ସନାତ୍‌ । 4 ମାରି, ଜଦି ୱାନି ସାଉକାରି ୱାନିଙ୍ଗ୍‌ ପେଡ଼ି କିନା ସିନାମାନାନ୍‌ ମାରି ଆୟା ଆଇମାଦିଙ୍ଗ୍‍ କଡ଼ର୍‌ ଆଇଲିକ୍‌ ଜନମ୍‌ ଆତି ମାର୍ରିଙ୍ଗା, ଆଦେଙ୍ଗ୍‌ ଆୟା ଆଇମା ମାରି ତାନି କଡ଼ର୍‌ ଆଇଲିକା ମୁସୁକୁ ୱାନି ସାଉକାର୍‍ତି ଅଦିକାର୍‌ ଆନାତ୍‌ ମାରି ୱାନ୍‌ ଅରେନେ ସୋସି ସନାନ୍‌ । 5 ମାତର ନାନ୍‌ ନିଜେଦି ମାଲିକ୍‌ତିଙ୍ଗ୍‌, ମାରି, ନିଜେଦି ଆଡ଼ିଙ୍ଗ୍‌ ମାରି କଡ଼ର୍‌ ଆଇଲିକାଙ୍ଗ୍‌ ଜିବନ୍‌ ନୋନାନ୍‌, ଆଦେଙ୍ଗ୍‌ ନାନ୍‌ ମୁକ୍‌ଡ଼ାଏ, ଇୟାୱାଜା ମାଟା ଆୟା ଦାସ୍‌ ଡାଟ୍‌ତାନ୍‌ ଇନାନ୍‌ 6 ଆଦେଙ୍ଗ୍‌ ୱାନି ମାଲିକ୍‌ ୱାନିଙ୍ଗ୍‌ ମାପୁରୁ ଲାକ୍‌ତୁ ଅନାନ୍‌, ମାରି, ୱାନିଙ୍ଗ୍‌ ସେର୍‌ଲା ବା ଦୁୱାର୍‌ବନ୍ଦ ଲାକ୍‌ତୁ ତାସି ୱାନି ସାଉକାର୍‌ ସୁଜିଦାନ୍‌ ୱାନି ଗିତଣିଦୁ ବରୋ କିନାନ୍‌; ଆବେଟ୍‌ ୱାନ୍‌ ୱିଜୁ କାଡ଼ା ୱାନି ସେବା କିନାନ୍‌ ।

7 ମାରି ଏନ୍‌ ଜଦି ନିଜେଦି ଗାଡ଼ିସିଙ୍ଗ୍‌ ଦାସି ୱାଜା ପର୍‌ନାନ୍‌, ଆଦେଙ୍ଗ୍‌ ୱାଦ୍‌ ଦାସରି ୱାଜା ମୁକ୍‌ଡ଼ାଜି ସଲ୍‌ଏତ୍‌ । 8 ଜଦି ତାନି ସାଉକାର୍‌ ତାନିଙ୍ଗ୍‌ ଆଡ଼ି କିତିଙ୍ଗ୍‌ବା, ଜଦି ମନ୍‌ କିନିୱାନିଙ୍ଗ୍‌ ପର୍‌ତିଙ୍ଗ୍‌ବା, ମାତର୍‌ ତାନିଙ୍ଗ୍‌ ଆୟା ଲୋକୁ ଜଦି ମନ୍‌ କିଏନ୍‌, ଆବେଟ୍‌ ୱାଦ୍‌ ତାନି ବୁବାସିମାନୁ ପରାଦେଙ୍ଗ୍‌ ଆଟ୍‌ନାତ୍‌; ମାତର୍‌ ମାଲିକ୍‌ ତାନିଙ୍ଗ୍‌ ବାଣ୍ତିସ୍‌ କିତିମାନିଙ୍ଗ୍‌ ଆଇ ଦେସ୍‌ତି ଲୋକା ଲାକ୍‌ତୁ ତାନିଙ୍ଗ୍‌ ପର୍‌ଦେଙ୍ଗ୍‌ ଅଦିକାର୍‌ ପୋଇଏନ୍‌ । 9 ଜଦି ଆୟା ସାଉକାର୍‌ ନିଜେଦି କଡ଼ ଉଣ୍ତିଙ୍ଗ୍‌ ତାନିଙ୍ଗ୍‌ ଟିକ୍‌ କିନାମାନାନ୍‌, ଆଦେଙ୍ଗ୍‌ ୱାନ୍‌ ତାନି ଉଣ୍ତିଙ୍ଗ୍‌ ଆଇଲିଦି ବିସୟ୍‌ ରିତି ଇସାବ୍‌ଦାନ୍‌ ବ୍ୟବହାର୍‌ କିନାନ୍‌ । 10 ଜଦି ଅରେନ୍‌ ଲୋକୁ ଆଇ ଆଡ଼ିଦି ୱାଲେ ପେଡ଼ି ଆନାନ୍‌, ଆର୍‌ତିଙ୍ଗ୍‌ ୱାନ୍‌ ପେରି ଆଡ଼ିଙ୍ଗ୍‌ କାଦି ୱାତିଗନ୍ଦା ମାରି ତାନି ୱାଲେ ସମାନ୍‌ତାନ୍‌ ୱିଜୁ ପାଣି କିଦେଙ୍ଗ୍‌ ଆଟ୍‌ନାନ୍‌ । 11 ଜଦି ୱାନ୍‌ ଇୟା ମୁଣ୍ଡ୍ରି ପାଣି କିଦେଙ୍ଗ୍‌ ଆଟ୍‌ଏନ୍‌, ଆବେଟ୍‌ ଆୟା ଆଇମା ଆରେନେ ମୁକୁଡ଼ାନା ସନାତ୍‌ ।

12 ଏନ୍‌ ଜଦି ଲୋକୁତିଙ୍ଗ୍‌ ଇୟାୱାଜା ଡାକ୍‌ନାନ୍‌ ଜେ ୱାନ୍‌ ସାନାନ୍‌, ଆଦେଙ୍ଗ୍‌ ସତ୍‌ନେ ୱାନିଙ୍ଗ୍‌ବା ସାନି ଦଣ୍ତ୍‌ ପୁଟ୍‌ନାତ୍‌ । 13 ଜଦି ଏମେ ଲୋକ୍‌ ଏଙ୍ଗ୍‌ ଡାକ୍‌ତେଙ୍ଗ୍‌ ବଦାକିଏନ୍‌, ମାତର ମାପୁରୁଦି ବଦାଦାନ୍‌ ୱାନି କିୟୁଦାନ୍‌ ୱାନ୍‌ ସାତିଙ୍ଗା, ଆଦେଙ୍ଗ୍‌ ଏମେ ବାଡିଦୁ ୱାନ୍‌ ରକିୟା ପୟ୍‌ଦେଙ୍ଗ୍‌ ସନାନ୍‌, ଇୟା ୱାଜା ବାଡି ନାନ୍‌ ମି ଉଣ୍ତିଙ୍ଗ୍‌ ବାସେ କିନା । 14 ମାତର ଜଦି ଏନ୍‌ ବାଣ୍ଡିସ୍‌ କିଜି ପାଡ଼ାକାଦି ଲୋକ୍‌ତିଙ୍ଗ୍‌ ଡାକ୍‌ତେଙ୍ଗ୍‌ ସାଆସ୍‌ କିନାନ୍‌, ଆଦେଙ୍ଗ୍‌ ମିର୍‌ ୱାନିଙ୍ଗ୍‌ ଜିବନ୍‌ତାନ୍‌ ଡାକ୍‌ନି ଉଣ୍ତିଙ୍ଗ୍‌ ନା ବେଦି ଲାକ୍‌ତୁରାନ୍‌ ୱାନିଙ୍ଗ୍‌ ଅନିଦେର୍‌ ।

15 ମାରି, ଏନ୍‌ ନିଜେ ବୁବା ୟାୟେଙ୍ଗ୍‌ ଡାକ୍‌ନାନ୍‌, ୱାନିଙ୍ଗ୍‌ ସତ୍‌ନେ ସାନି ଦଣ୍ତ୍‌ ପୁଟ୍‌ନାତ୍‌ ।

16 ମାରି ଏନ୍‌ ଲୋକାଙ୍ଗ୍‌ ଡଙ୍ଗାଁ କିଜି ଜଦି ପର୍‌ନାନ୍‌, ୱାନ୍‌ ୱାନି ଅଦିକାର୍‌ତାନ୍‌ ପୋଇନାନ୍‌, ଆର୍‌ତିଙ୍ଗ୍‌ ୱାନିଙ୍ଗ୍‌ ସତ୍‌ନେ ସାନି ଦଣ୍ତ୍‌ ପୁଟ୍‌ନାତ୍‌ ।

17 ଏନ୍‌ ନିଜେ ବୁବା ୟାୟେଙ୍ଗ୍‌ ଆନାଦୁରିଆ ସିନାନ୍‌, ୱାନିଙ୍ଗ୍‌ ସତ୍‌ନେ ସାନି ଦଣ୍ତ୍‌ ପୁଟ୍‌ନାତ୍‌ ।

18 ମାରି ଜଦି ଲୋକୁ ଅରେନ୍‌ ମାରି ଅରେନ୍‌ ୱାନିୱାଲେ ଜାଟିଙ୍ଗ୍‌ ଆବୁ ଆବୁ ଅରେନ୍‌ ଆଇ ୱାନିଙ୍ଗ୍‌ କାଲୁଦାନ୍‌ ବା ମୁଟିଦାନ୍‌ ଡାକ୍‌ତିଙ୍ଗ୍‌, ୱାନ୍‌ ସାଏଣ୍ଡା କସ୍ଟ ଆନାନ୍‌ 19 ମାରି ୱେନ୍‌କା ନିଙ୍ଗିଁଜି ବାଡିଗା ଆସ୍‌ସୋ ଆତ୍ରେ ବୁଲାନାନ୍‌, ଆଦେଙ୍ଗ୍‌ ଆୟା ଡାକ୍‌ତିକାନ୍‌ ଦସ୍‌ଦାନ୍‌ ମୁକ୍‌ଡ଼ାନାନ୍‌; କେବଲ ୱାନିଙ୍ଗ୍‌ ୱାନି ପାଣି ବୁଡାତିକା ମାରି ମାୟାମ୍‌ ଡାବୁଙ୍ଗ୍‌ କାର୍‌ସୁ ସିଦେଙ୍ଗ୍‌ ପଡ଼ାନାତ୍‌ ।

20 ମାରି ଜଦି ଏନ୍‌ ନିଜେଦି ଦାସ୍‌ ଦାସିରିଙ୍ଗ୍‌ ବାଡିଗା ଦାନ୍‌ ଡାକ୍‌ତିଙ୍ଗା, ୱାନ୍‌ ଜଦି ୱାନି କିୟୁଦୁ ଆୟା ଦାପ୍ରେ ସାନାନ୍‌, ଆଦେଙ୍ଗ୍‌ ୱାନ୍‌ ସତ୍‌ନେ ସାନି ଦଣ୍ଡ୍‌ ପୋଇନାନ୍‌ । 21 ମାତର ୱାନ୍‌ ଜଦି ଅର୍‌ନେଣ୍ଡ୍‌ ବା ରିନେନ୍‌ ଜିନାମାନାନ୍‌, ଆଦେଙ୍ଗ୍‌ ମାଲିକ୍‌ ସାନି ଦଣ୍ଡ୍‌ ପୋଇଏନ୍‌; ଇର୍ରିଙ୍ଗା ୱାନ୍‌ ୱାନି ଦନ୍‌ ୱାଜା ।

22 ମାରି ଜଦି ମେମାର୍‌କୁ ନିଜେନିଜେ ଜାଟିଙ୍ଗ୍‌ ଆବୁ ଆବୁ ଏମେ ପଟାଦୁ ମାନି ଆଇମାଦିଙ୍ଗ୍‍ ଡାକ୍‌ତିଙ୍ଗା ଜଦି ପଟାଦୁ ମାନି କଡ଼ ନାସ୍ଟୁ ଆନାନ୍‌, ମାତର ୱେନ୍‌କା ମାରି ଇନି ବାଦା ଗଟାଏତିଙ୍ଗା, ଆଦେଙ୍ଗ୍‌ ଆୟା ଆଇମାଦି କନ୍‌ଲିସି ଏଣ୍ଡେସ୍‌ ଦାବି କିନାନ୍‌, ଆୟା ଇସାବ୍‌ଦାନ୍‌ ୱାନ୍‌ ଡାବୁଙ୍ଗ୍‌ ସିନାନ୍‌, ମାରି, ୱାନ୍‌ ନ୍ୟାୟ୍‌କିନି ଲୋକା ଇସାବ୍‌ଦାନ୍‌ ଆକା ସିନାନ୍‌ । 23 ମାତର ଜଦି ଇନି ବାଦା ଗଟାନାତ୍‌, ଆଦେଙ୍ଗ୍‌ ୱାନି ଜିବନ୍‌ ବାଦ୍‌ଲୁ ଜିବନ୍‌, 24 କାଣ୍‌ଗା ବାଦ୍‌ଲୁ କାଣ୍‌ଗା, ପାଲ୍‌କୁ ବାଦ୍‌ଲୁ ପାଲ୍‌କୁ, କିୟୁ ବାଦ୍‌ଲୁ କିୟୁ, ପାଦାମ୍‌ ବାଦ୍‌ଲୁ ପାଦାମ୍‌, 25 ୱିସାମ୍‌ ବାଦ୍‌ଲୁ ୱିସାମ୍‌, ଗାଉ ବାଦ୍‌ଲୁ ଗାଉ, ମାଡ୍‌ଡାକ୍‌ନି ବାଦ୍‌ଲୁ ମାଡ୍‌ଡାକ୍‌ନି, ଦଣ୍ଡ୍‌ ଆନାତ୍‌ ।

26 ମାରି ଜଦି ଏନ୍‌ ନିଜେଦି ଦାସ୍‌ ଦାସିରି କାଣାଗାଦୁ ଡାକ୍‌ତିଙ୍ଗା ଆକା ନାଷ୍ଟୁ ଆନାତ୍‌, ଆଦେଙ୍ଗ୍‌ ୱାନ୍‌ ୱାନି କାଣାଗାଦି ବାଦ୍‌ଲୁ ୱାନିଙ୍ଗ୍‌ ମୁକ୍‌ଡ଼ା କିନାନ୍‌ । 27 ମାରି, ଡାକ୍‌ତିଙ୍ଗ୍‌ ନିଜେ ଦାସ୍‌ ଦାସିରି ପାଲ୍‌କୁ ରୁକ୍‌ତିଙ୍ଗା, ୱାନ୍‌ ଆୟା ପାଲ୍‌କୁଦି ଉଣ୍ତିଙ୍ଗ୍‌ ୱାନିଙ୍ଗ୍‌ ମୁକ୍‌ଡ଼ା କିନାନ୍‌ ।

28 ମାରି, କଡି ଏମେ ମେମାର୍‌ଏନ୍‌ ବା ଆଇମାଦିଙ୍ଗ୍‌ ଉର୍‌ତିଙ୍ଗା ୱାର୍‌ ଜଦି ସାନାର୍‌, ଆଦେଙ୍ଗ୍‌ ଆୟା କଡି କାଲୁଦାନ୍‌ ଡାକ୍‌ତିଙ୍ଗ୍‌ ସାନାତ୍‌, ମାରି ତାନି କାଣ୍ଡା ତିନ୍‌ଡ୍ରେଙ୍ଗ୍‌ ଆଏତ୍‌; ମାତର କଡିଦି ସାଉକାର୍‌ ଦଣ୍ତ୍‌ ପୋଇଏନ୍‌ । 29 ମାତର ଆୟା କଡି ଆଗ୍‌ଡ଼ିରାନ୍‌ ଉର୍‌ଜିମାର୍ହାତ୍‌, ଆବେଣି ସାକି ତାନି ସାଉକାର୍‌ତିଙ୍ଗ୍‌ ସିତିଙ୍ଗ୍‌ବା ତାନିଙ୍ଗ୍‌ ୱାନ୍‌ ତର୍‌ଇ ଉଣ୍ତିଙ୍ଗ୍‌ ଆକା ଜଦି ଏମେ ମେମାରି ବା ଆଇମାଦିଙ୍ଗ୍‌ ସାପିସ୍‌ କିନାତ୍‌, ଆର୍‌ତିଙ୍ଗ୍‌ ଆୟା କଡି କାଲୁଦାନ୍‌ ଡାକ୍‌ସି ସାପିସ୍‌ନାର୍‌; ମାରି, ତାନି ସାଉକାର୍‌ତି ବା ସାନି ଦଣ୍ତ୍‌ ପୁଟ୍‌ନାତ୍‌ । 30 ଇର୍ରିଙ୍ଗ୍‌ବା ୱାନି ଜିବନ୍‌ ଜିନି ଉଣ୍ତିଙ୍ଗ୍‌ ଡାବୁଙ୍ଗ୍‌ କାର୍‌ସୁ ସିଦେଙ୍ଗ୍‌ ଆନାତ୍‌, ଆଦେଙ୍ଗ୍‌ ୱାନ୍‌ ଜିବନ୍‌ ମୁକୁଡ଼ାନି ଉଣ୍ତିଙ୍ଗ୍‌ ୱିଜୁ ମାଟା ସିତିମାନି ଡାବୁଙ୍ଗ୍‌ ସିଦେଙ୍ଗ୍‌ ଆନାତ୍‌ । 31 ଜଦି କଡ଼ଦିଙ୍ଗ୍‌ କି ଆଇଲିଦିଙ୍ଗ୍‌ ଉର୍‌ତିଙ୍ଗା, ଇୟା ସାସନ୍‌ ଇସାବ୍‌ଦାନ୍‌ ଦଣ୍ଡ୍‌ ପୋଇନାତ୍‌ । 32 ଆମାୱାନି କଡି ଜଦି ଏମେ ଦାସ୍‌ ଗି ଦାସିଙ୍ଗ୍‌ ଉର୍‌ନାତ୍‌, ଆଦେଙ୍ଗ୍‌ ୱାନ୍‌ ୱାନି ମାଲିକ୍‌ଦିଙ୍ଗ୍‌ ତିରିସ୍ ସେକଲ୍‌ ୱେଣ୍ତି ସିନାନ୍‌; ମାରି କଡି କାଲୁଦାନ୍‌ ସାନାନ୍‌ ।

33 ମାରି ଏନ୍‌ ଜଦି କୁଇଁକାଲ୍‌ ପିଡ଼ିକ୍‌ତିକା କୁତ୍‌ନାନ୍‌, ମାରି କୁଇଁକାଲ୍‌ କାର୍‌ଜି ଆକା କୁତ୍‌ସି ପୋକ୍‌ଏନ୍‌, ଆଦେଙ୍ଗ୍‌ ଆବେନୁ ଆୟା ଲୋଇ ଏମେ କଡି କି ଗଦ ଆର୍‌ତିଙ୍ଗା, 34 ଆୟା କୁଇଁକାଲ୍‌ତି ମାଲିକ୍‌ ଆବେଣି ଡାବୁଙ୍ଗ୍‌ ସିନାନ୍‌; ୱାନ୍‌ ଆୟା କଡି ନି ଗଦଦି ମାଲିକ୍‌ଦିଙ୍ଗ୍‌ ୱେଣ୍ତି ଡାବୁଙ୍ଗ୍ ସିନାନ୍‌, ମାତର ସାତି କଡି ୱାନିଦି ଆନାତ୍‌ । 35 ମାରି ଅରେନ୍‌ୱାନି କଡି ଆଇ ଲୋକା କଡିଦିଙ୍ଗ୍‌ ଉର୍‌ତିଙ୍ଗା ଆୟା କଡି ସାତିଙ୍ଗା, ଆଦେଙ୍ଗ୍‌ ଆୟା ଜିବନ୍‌ ମାନି କଡିଦିଙ୍ଗ୍‌ ପର୍‌ଜି ତାନି ଡାବୁଙ୍ଗ୍‌ ରୁଣ୍ତି ବାଗ୍‌ କିନାର୍‌; ମାରି ସାତି କଡିଦିଙ୍ଗ୍‌ ବା ରୁଣ୍ତି ବାଗ୍‌ କିଜି ଅନାର୍‌ । 36 ମାତର କଡି ଆଗ୍‌ଡ଼ି ଉର୍‌ନିକା ନେସ୍‌ସି ଜଦି ତାନି ମାଲିକ୍‌ ତାନିଙ୍ଗ୍‌ ଜାଗାର୍‌ତାଦାନ୍‌ ଇଡ୍‌ଏନ୍‌, ଆଦେଙ୍ଗ୍‌ ଆୟା କଡିଦି ଉଣ୍ତିଙ୍ଗ୍‌ କଡି ସିନାନ୍‌, ମାତର୍‌ ସାତି କଡି ୱାନି ନିଜେଦି ଆନାତ୍‌ ।